富華燒臘飯店

營業中

休息中

基本上一星期都總會去依度食一兩次早餐, 因為依度既沙嗲牛肉麵真係不得了。差唔多次次都係叫烘底牛油包, 雙蛋, 沙嗲牛肉麵 加埋杯奶茶 - $30好食既原因係應該佢係沙嗲牛肉個醬入面加左椰醬, 成個味都好香好濃, 好似食緊叻沙湯底咁濃一開始食左個烘底唔洗加錢既方包先之後食牛肉麵牛肉無根就一定架啦, 一路食麵連埋個濃湯一齊飲, 正到不得了!!食到一半將雙蛋浸埋落個湯度食, 何其滿足!最後加埋杯奶茶比例恰到好處既招牌奶茶, 一個美好既早晨就應該要咁樣。*咁岩今次朝早食早餐比較趕, 無影太多相**富華叫富華燒臘飯店, 佢依度既叉燒燒鴨又係無得輸, 下次再寫***環境同服務都係正常茶餐廳應該會遇到架囉, 但依度確實多人黎食, 坐得迫D, 服務正常

每次經過紅磡廣場的走廊時嘟發覺這間餐廳總是滿座顧客 絕無虛場到底是什麼原因呢?一次機會與老朋友聚敘於是來到這間餐廳試試點了招牌菜叉燒雞飯🙊(最多人點的餐單)呢間餐廳很懷舊 氣氛相當舒適 燈光柔和員工工作態度殷勤 會主動打招呼 安排座位等而廚房方面是開放式的 讓顧客可以看見廚房運轉呢度同其他餐廳不同之處是食物的質素 鮮味可口肉質嫩化 皮脆肉彈 入口返尋味 口齒留香 但唯一不足之處係價錢要44(加一杯凍飲) 其實未食過咁貴燒味飯 大家樂燒味已經好貴呢間更加貴 除了食物質素和整體環境衛生等OK下次應該不會再光顧 因為我食不起

切雞髀鴨髀飯炒底，加錢有髀食，好野。但點解會咁細隻既？乳雞乳鴨？點解同事們無加錢都有雞髀架？咁我仲咩要比貴啲喎。個炒飯好油呀，立立寧。鴨皮厚儲滿油，一咬爆油，肉質味道過得去，都係鵝好食好多。雞髀保持水準，皮香肉滑味道好，好味道。我將成碟好油既薑蔥油倒晒落個好油既炒飯度撈黎食，再食晒好油既燒鴨皮，油加油再加油，實在太油，食完個胃好唔舒服呢。

自由的星洲牛腩炒伊麵！阿姐話諗到咩就叫咩就得架喇 ﹗想起十幾年前係觀塘食過咖哩牛腩炒伊麵，好想再食，回味一下。咖哩牛腩炒伊麵，師傅乾炒比我噃，有點星洲炒米 feel，星洲牛腩炒伊麵？有洋蔥、青椒、芽菜、咖哩粉，乾乾地撈麵，我係想要好多咖哩汁既濕炒呢！牛腩大大舊味道幾好，無渣彈彈的。咖哩粉伊麵麻麻地，一次夠喇。

在紅磡工業區內茶餐廳文化橫行區(紅商)內賣茶餐廳快餐食物的比比皆是, 要在其中一間比較上有質素的實在唔容易, 大大間的唔一定好吃, 新開業的好多時連炒隻蛋都唔多掂, 而這間在紅商後門口有行利位置的燒味茶餐廳, 午市經常爆滿, 燒味飯OK的, 價位屬於中間價, 但在去年12月中的一個口痕中午來了叫咗個下午茶餐”雙拼三文治餐”, 估佢唔到果然十隻手指有長短呢隻係最長嗰隻, 白方飽質地係傳統式茶記三文治飽餐(好軟熟細密嗰隻)最容易識別的是中間被餡料壓偏了的同前後的比較, 有幾軟熟一望就知, 餡料的餐肉片雖簿但兩片重疊又可以令啖啖有餐肉, 煎蛋才是最精彩, 明顯地一疊疊同時中間蛋汁絕無侳僅有的保留了下來, 10 FEB第二次來時做得更出色, 比第一次更出色, 首先是蛋漿是打得更均勻不見蛋白踪影了, 中心的蛋厚度足見有成1.5cm. Layers內見的蛋汁更少,這師傅炒蛋的功力可見足以跟酒店的一教高下, 當下在手機MP3 Player按出”The Flower Duet” by Charotte Church 聽着聽着彷彿在五星級酒店內享受這令人再難忘記的美味三文治了, 這裡奶茶是一般吧

XO 醬金菇肥牛炒河走芽菜，早排食左個 XO 醬火鴨絲炆伊全走超好味，今日試埋 XO 醬金菇肥牛炒河走芽菜先，但中晒招喇！勁多韮黃同蔥，揀到我死！早知叫全走啦！味道還可以，不過勁多油，食完唔洗搽潤脣膏。河粉碎晒，要羹筷齊用囉。雪菜火鴨絲炆伊，又抽吓朋友水先。辣辣地幾好食，伊麵香而嚥韌，火鴨絲味濃香甜有咬口，好食過我碟河粉添，哈哈！

叉燒切雞髀飯炒底，餸同炒飯分開上架喎，因為炒飯由廚部出，跟燒味檔有段距離，中間隔左個水吧囉。開飯！做到出晒煙，勁燥！要對自己好啲！高質切雞髀，肌膚勁嫩勁滑，雞味香濃甜美，超好食呢！比再興、太興、廣東、君旺既燒味更好食，跟權記不相百仲啦！叉燒就較為一般，味甜有咬口，都唔錯既。炒飯底又香又有鑊氣，粒粒飽滿均勻，炒勁了得，撈埋蔥油好味到震呢！當然全部 knock out 無得剩啦。火腿奄烈，見朋友仔份奄烈咁靚，抽吓水先，呵呵。火腿奄烈靚得緊要，藝術品一樣呢！好香好滑，仲要有蛋汁流出，扒爐哥哥好利害，讚！熱辣辣即做無搵笨實，好味道！

暫時都仲未試過佢地每日既午市快餐，次次都係散叫，下次試試啦 ~咖喱牛腩拉麵加辣，中晒招，好難食，好鬼搵笨，只係一個味精湯浸拉麵，再係上面淋咖喱牛腩。麵質腍劈劈，完全唔爽口彈牙；牛腩超硬又無味。整個麵都好啖，牛無牛味、麵無麵味、咖喱無咖喱味，救命呀。焗肉醬珍寶腸意粉，上枱時只暖不熱又唔香，味道免強接受，偏淡。個碼真係太少，肉碎得啲啲、珍寶腸三片、醬唔夠撈意粉。港式意粉都算乾身，但真係煮到二十成熟，發脹晒，口感又腍劈劈。叉油雞飯，比想像中好，叉燒口感較為實淨，但味道不錯，雞肉倘算嫰滑，幾好。蔥油同甜豉油均香甜可口，但食完有點勁喝。總括黎講，試得過。

係紅磡返左工咁多年，之前都只係黎過一次食早餐咁大把，仲係食沙嗲牛麵太陽蛋，無咩特別，大路安全，無問題。依家先正正式式去試佢地既出品，見日日都排長龍，應該唔會太差掛 ~菠蘿沙嗲牛肉炒河，賣相真係麻麻，但味道還可以，唔記得叫佢要兜混添，仲有個問題係無鑊氣，唔夠熱囉。河粉就幾好，非常完整，唔會碎濕濕，都係同樣問題，唔熱囉，只係暖暖地。味道偏甜，鮮牛口感算嫰滑，無煮過時。整體黎講可以啦，係平實無咩驚喜啫。炒飯底，油就油左啲，不過好有鑊氣，熱騰騰，有功架有技巧，炒到啲飯一粒粒分開，絕唔會一舊舊或濕答答，每粒飯都有蛋包住，炒得非常香口，勁 ﹗咖喱牛腩，一睇都知層經雪過，肉色程深啡色及已無咩水份乾乾地，雖知炆肉要放過夜先入味，先會更軟腍，但心理上點都有啲怪怪地，因我好怕食煮完雪過再翻煮既食物。食落都炆得入味，口感算腍，係乾啲囉。咖喱味香濃，港式中上級，幾好。