常麵館 (已結業)

難得得閒同同事一齊出去食lunch，雖然我麻麻地但兩位同事都鍾情車仔麵，一於就行遠少少試吓呢間常麵館。叫左碗三餸：肥牛、墨魚丸、豬大腸撈米粉。因為我好唔鍾意食麵，好少見有食車仔麵嘅地方可以叫撈米粉，而且仲有好多款汁可以揀。印象中有咖哩汁、腩汁、瑞士汁等等，我今次就揀左瑞士汁。瑞士汁食落甜甜地，撈勻食米粉一流！餸方面牛肉都算多肥瘦適中，墨魚丸就正常無咩特別，而我個人推薦豬大腸睇得出又大又肥美。整體黎講味道唔錯，份量對男仔黎講可能有啲少。下次會再同同事黎試其他餸😆尖沙咀返工人士值得一試

我哋今日幾個人特登過嚟呢間麵館食晏， 平時落單都相安無事，但係今日對住呢位男職員無禮貌既工作態度真係頂佢唔順、佢簡直係想趕客走！事原係佢過嚟問野，我哋答左佢，佢又唔明再問，之後佢就開始發脾氣，首先佢就掉低張單比我哋，跟住我哋咪check 下內容啦，突然間佢又喺我朋友手中一手搶走張單，再掉低另一張單比我哋（嘩、佢究竟發生咩事呀發咁大脾氣掉張單落我哋枱面）雖然當時正值午市，但係樓面唔算好多客，佢根本就唔係好busy, 佢對客人嘅服務態度簡直係劣評，佢如果做得咁辛苦咪遲職囉，做咩嘢要賭老細米，我哋嚟呢度係食嘢啫，唔係嚟呢度受你氣、我哋吾係嚟呢度睇你面色架！

蘿蔔好林好食，滷水牛筋又林又入味又滑，湯底濃但麵底唔夠多，米線幼身同煙靭，雞翼牛肚爭啲啲，口感似牛腩，芫荽餃幾好食，$48包嘢飲抵食，仲要係包檸檬薏米水，啱晒我飲。👍🏻

由於鋪頭係正公司附近，所以間唔中都會嚟食lunch,試過唔同既湯底，最鐘意都係蕃茄薯仔湯再加辣汁同沙嗲車仔麵餸方面有好多選擇，lunch 3餸車仔麵仲有飲品送都唔洗$50，以尖沙咀嚟講性價比都算高。今次就嗌咗水魷魚，蘿蔔同埋牛腩。蘿蔔煮得夠晒冧同埋入味，而且無渣水魷魚亦夠晒爽口，牛腩方面都夠入味😋至於麵方面，煮既軟硬度適中，不過份量方面就略嫌偏少，女仔食可能都係岩岩夠飽，男士可以考慮加底。除咗車仔麵之外，餐廳亦有幾款飯類可以選擇。另外，餐廳冷氣方面就略嫌唔夠，夏天食都幾熱，希望餐廳係呢方面可以改善。

同阿女睇完恐龍展，就過黎呢邊睇吓有咩食，行過見到間小店就試下啦！第一次黎食野，環境都幾舒服、食物份量足夠，店員服務態度良好，味道都唔錯，亦有賣相，值得推薦嘅舖頭。

同朋友行街唔知食乜好，入黎叫咗碗3餸面，辣味好香，朋友話好鐘意。啲牛腩好入味！肥肉好易咬，仲有小食雞腳同埋時菜送好有良心既小店，叫咗杯熱既洛神花茶，好清甜。環境乾淨優美

呢排減肥食魚蛋粉食到厭見到呢間車仔麵竟然有菜底就入咗去試下點知有驚喜啵入面座位都算多最有特色係有好多聖鬥士星矢既公仔我諗fans要嚟朝下聖 哈哈至於餐牌選擇都算多 又唔貴三餸菜底餐都係$38連豆漿真係糧尾恩物我要咗個三餸下午茶餐（$43）包一杯檸檬薏米水評分：10/10個牛筋超淋又入味辣魷魚好懷舊 哈哈哈 依家好多地方都無得食但呢度好好食呀！！！！辣得過癮又爽口個米粉係我最鍾意既吸湯米粉吸哂個腩汁湯底不得了！！！跟餐既檸檬薏米水絕對唔係Hea你唔係加勁多水嗰種飲得出好足料酸酸甜甜好適合夏天值得一提既係老闆既服務態度佢好nice㗎聽到佢同朋友講邊做邊學就覺得佢份人好humble衷心祝福呢間誠意小店會愈來愈好生意

食麵多過食飯嘅我，終於搵到啱曬我口味嘅車仔麵檔。湯底飲咗無口渴試咗好多款車仔麵餸都好鍾意，特別鍾意牛脷厚切好有口感，仲有好味道嘅有牛筋、豬紅、蘿蔔、豬皮、鳳爪、瑞士雞翼、芫荽、酸齋⋯⋯選擇真係多，都未試曬，下次要去試埋多款小食。低碳飲食可以揀菜底，加三款餸$38送埋凍飲好抵食湯底選擇亦多，有豬骨淸湯、番茄薯仔洋蔥湯、麻辣湯，都好味道又唔油膩。鍾意食辣記住試成記辣汁，辣味適中。另外仲可以揀沙嗲汁、腩汁、咖哩汁真係密密食都唔會厭

今日經開尖沙咀，掙扎緊去嘉寶漢堡定常麵館，最後又忍唔住去咗常麵館，因為上次食過中辣汁唔夠辣，所以今日叫大辣汁試下另外因為冷氣關係，上次食到勁辛苦，知道係業主無搵人維修，店長都唔想，今次去見佢地放咗部風機，雖然都係熱，但都可以接受今次叫咗豬大腸+肥牛+芝士腸配河粉，蕃茄薯仔洋蔥湯，大辣一黎到已經嗅到好香蕃茄湯味大腸有8件，份量OK，不過口感麻麻，芝士腸有3條雖然都係普通雪藏野，但佢地隻芝士腸咬落有啲流心，幾好食上次食過肥牛都OK，有三片，但今次份量明顯比上次更少了而且啲肥牛碎濕濕咁而河粉睇咁多張相都見到，又係好碎，一夾起就散但湯底依然係好味的總括黎講，食過三次，每次上準都下降中依然保持到水準既只有蕃茄薯仔洋蔥湯底，粉同餸都唔得，老實講，好鍾意佢個湯底同辣，所以今次再去都幾失望

唔係第一次食常麵館，一直對佢個辣汁念念不忘，但因為佢星期日例休，所以往往都就唔到時間黎試，難得平日經開尖沙咀，一定要再去試下個辣汁三餸麵餐 $48三餸菜底餐 $38除咗車仔麵，仲有咖哩飯由於平日12:00就入座，所以都冇乜客我叫咗 肥牛+豬大腸+雞翼 河粉 (蕃茄薯仔洋蔥湯底+中辣)友人叫咗 豆卜+魚蛋+廚師腸 油麵 (豬骨湯+沙嗲汁+中辣)另外仲咗個小食 炸咖哩角友人既豬骨湯好香濃，加上沙嗲汁同辣汁，非常好味，餸都係普通野，冇乜特別至於我嗰碗車仔麵，河粉索晒蕃茄薯仔洋蔥湯好正，而且佢哋個湯真係有唔少薯仔，美中不足係，佢哋嘅辣汁比之前冇咁辣，下次可能要叫大辣食緊中途都聽到有個男人order要大辣多辣至於餸方面，滷水雞翼好入味，大腸就一般般，略嫌口感麻麻，肥牛質素唔錯但係只有三片而小食咖喱角，熱辣辣炸到脆卜卜，不過餡就真係太少，但係都冇乜要求總括嚟講:湯底出色，食完唔會口渴但係餸嘅份量偏少，而且招牌辣汁比之前冇咁辣，冇咁出色而店舖一定要改善嘅地方係，夏天真係超熱，個冷氣完全冇料到，食得好辛苦，係咁流晒汗夏天的話我會考慮外賣，如果要堂食我諗一係要整咗個冷氣先又，或者要到冬天先再去了

平時有得揀時都幾鐘意食下素 去到有肉有素嘅餐廳時通常都會揀素食 呢日黎左尖沙咀行街行到少少餓 又想平平地食一餐 揀左我首選嘅車仔麵 價廉物美 第一次食常麵館 都係睇OpenRice見到係附近就黎左餐牌有個走肉大雜麵，雖然湯底唔肯定係咪素湯底，但呢個對彈性素食者係一個幾貼心嘅選擇大雜麵有五味餸 睇落個樣都唔馬虎 餸菜排列整齊睇見都開心啲 蘿蔔清甜 冬菇夠入味 支竹係我最愛，時菜呢日係通菜，都煲得幾好味，加埋紫菜同金菇成碗麵好豐富，食得好滿足

豬大腸，牛筋，鹹牛脷，茄湯，成仔辣汁中辣，腩汁，烏冬$54(本身係$48但係因為兩個醬汁要加$3同埋烏冬都要加$3).鳳爪，芫荽豬肉餃，酸齋(菜底）$38 .熱洛神花，熱檸檬薏米.坦白講去係為左拎阿day 嘅應援物資，但估唔到有驚喜😬😬(請原諒我甘毒😃😃😃😃😃).豬大腸滷水味好夠，牛筋炆得好淋，鹹牛脷大塊而且有厚度，鳳爪似茶樓嘅鮑汁鳳爪，酸齋我覺得好食過出面啲齋鋪，而且個齋仲係分開上，芫荽豬肉餃皮薄餡靚，樣樣餸都做得唔錯，不過烏冬嗰碗比較上多油，相信應該係個辣汁偏油，而且都幾辣下，下次會試吓叫小辣睇吓會唔會冇咁多油.另外洛神花茶同埋檸檬薏米水都係其他出邊餐廳唔會一定有嘅飲品，呢度仲要免費，讚👍🏽.Cp 值及夠飽: 正常份量，價錢包埋嘢飲正常，而且係每一樣餸都係高質素.翻啅:下次會番黎食

8分性價比極高！係尖沙咀，$43有個三餸麵，仲要送杯豆漿！味道仲要唔錯！超抵！鋪頭裝修幾特別幾靚坐得比一般車仔麵檔舒服仲放左好多聖鬥士星矢呢間野唔止有車仔麵食，仲Crossover麻辣米線佢個辣好香好正唔係求其加啲辣汁扮麻辣好食過唔少所謂正宗米線鋪！牛筋、牛肚、芫荽豬肉餃配麻辣湯米線連豆漿 $46（因為麻辣湯加$3）牛筋同牛肚都好淋好入味，幾好味芫荽豬肉餃比較失色，芫荽味唔重，芫荽愛好者表示有啲失望個麻辣湯真係好正，係四川麻辣米線個種香辣味！豆漿正常，唔會係溝水溝到唔知似乜既垃圾所有野都正常發揮，唔係驚為天人咁好味但睇埋價錢同地點，我覺得好值得推介！麻辣米線黃店唔多呢間絕對係個好選擇！

網上見到咁多好評 今日Walk in嚟到呢間餐廳食午餐 叫咗一個三餸撈麵 加一杯豆漿 總共$45 價錢尚算合理👌👌豆漿好快就拎咗過嚟 可以飲住野等 大概10分鐘左右食物就嚟到 唔駛等好耐 🤣🤣🤣餸其實唔係好多（芝士腸三條 芝心丸兩粒 少量豬肉片）豬肉片冇味嘅 😅😅當然你可以加錢加好多個餸 但咁樣就好似變得唔值 （+1個餸要$10）個麵底同醬汁其實亦都唔係特別好食 可能因為叫撈麵 冇湯底 試唔到呢度嘅特色 不過可以算係不過不失 拿拿聲食完 拿拿聲番工🤗🤗🤗

呢度嘅車仔麵有平時少見嘅蕃茄薯仔洋蔥湯底揀，味道有少少偏似羅宋湯，但又唔會過酸，同油麵或米線麵底食都好夾！𓂅 牛肚、蘿蔔、芫荽豬肉餃、油麵 (蕃茄薯仔洋蔥湯)𓄹牛肚: 好入味，不過有少少過腍𓄹蘿蔔: 清甜，無渣，推薦！𓄹芫荽豬肉餃: 淡淡嘅芫荽味，啲餃幾新鮮，可以一試！𓂅瑞士雞翼、豬大腸、豬紅、米線(蕃茄薯仔洋蔥湯)𓄹瑞士雞翼: 入味，但有少少乾𓄹豬大腸: 帶有少少肥膏，幾香，好味！𓄹豬紅: 味道好香好惹味，而且完全無腥味，推薦！飲品方面比較一般，凍朱古力同凍檸檬蜜都係一般茶餐廳嘅質素