廣記粥店

營業中

休息中

上次評粥呢次評飯.....哈.個人覺得飯正的....飯又多料....的排骨好新鮮同鮮甜.....而個份量又足夠...店員都有禮的.....唔錯

估唔到!! 食咗十幾年!! 由未搬上嚟新街市前嘅鐵皮檔，到今時今日有兩個檔位，每日勁多街坊幫親嘅旺舖，雖然佢係出品比較粗糙，食物質數唔算係好，D粥又唔係煲得好棉，腸粉皮厚過河粉，D肉又落勁多鬆肉粉! 但係十元八塊，真係平成咁嘅街坊價，唔通俾翅你食咩!但係最估唔到，我今日竟然俾人鬧! 我隻身走到收銀，叫一碗柴魚花生粥同一碗肉片粥加其他兩樣嘢，阿姐回覆"柴魚魚片"，我回覆"應該係魚花生同肉片粥"。攞嘢食時佢俾真係俾錯魚片粥我(正確嚟講佢真係落錯單)，我都無話佢錯，只係細細問咗一佢"呢個係咪我嘅?"，個收銀阿姐立即衝過來話鬧我叫錯嘢，我將以上嘅落單對話講返一次佢聽，佢就同煮粥個阿姐講話再整過俾我，叫我攞住D先，轉頭再返嚟攞肉片粥，煮粥阿姐已經開始鬧!! 咁都叫錯，明明叫錯又唔要.......喋喋不休!! 但又係最估唔到，我兩分鍾之後返轉頭碗粥，竟然再俾煮粥阿姐鬧返同一番說話!!係咪依家發咗達，巴閉咗，所以可以雜鬧客呀? 本來想買多個炒米粉外賣，但食到一肚氣，廢事又俾人鬧多次，過隔離買其他嘢算數，以後都唔會再嚟，反正聯和墟大把好嘢食。

下午茶時間,點心一早收檔,只係得粥部仲有開.碎牛肉粥 : 如果早上時段食,係會先煮一陣,但下午就唔會,同大路粥店一樣,"嗶"粥落 d 生料焗熟佢,不過今日 d 粥真係唔夠熱,碎牛肉焗左好耐都有部份唔熟.粥底今次食落口好乾,可能師傅又出山啦,下次都係食返點心好 d.p.s : 相信整個熟食市場佢最大檔,因為有三連舖

真係叫左一碗粥後..佢會立刻煲而的料的份量是接受得到...味道都唔錯.瘦肉好甜....豬潤熟的程度都是剛剛好...而又唔覺有味精...環境係一般....服務的阿姐都友善

今朝諗起廣記，咁我地就去試下~果個招乎我地既waitress好nice，態度唔錯~我地叫左︰鳳爪排骨飯︰佢d粒係一粒粒架！撈埋d豉油，正呀！燒賣︰有d啖啖肉既感覺~ 不過都可以既~金錢肚︰我勁食，真係好入味，又有黑椒辣既感覺~叉燒包︰呢個唔得！個包超硬！好似隔夜咁既！咬左啖冇食到~鳳爪︰入味，都係勁食呢個~蝦餃︰個皮好似厚左d bor，d蝦都可以~雞扎︰我愛果舊雞呀！好滑~um...應該都會第日再試其他~

粟米粥都幾綿. 不過有時遲左去d粥會稀d...炒米麵等一般, 比較油.膠粉偏煙un.變左foodcourt之後, d位好難坐, keep住向後sir.

有點事一大清早便往聯和墟跑,肚子叫過不停,又不想飲奶茶咖啡,反正順道,一盅兩件,又快又平,不作他選.一陣子不見,店家也要加價,不過可不像老麥般加得那麼鬼祟,人家可是大字標題8月1日,各種點心加一蚊,既老實又不怕人家說取考,而且都是老街坊生意,加得密真的會給老人家指著駡...........老樣子,先來一盅排骨飯,飯雖然並不是什麼絲苗靚米,但時間拿捏得準,飯粒飽滿柔韌,排骨當然是雪貨,不過依然可以弄得肉質嫩滑,加上舖滿瓦盅面的椰菜,十數圓一盅真的不錯.再來的是蝦餃,蝦肉有點霉,而且餃皮粉質太多,明顯地是搓得不平均,下次可以放棄.埋單不過二十多圓,呷一口茶,睇一陣報紙,偷得浮生半日閒,超值.

22/3/2008 星期六11點幾起身，食乜好呢~~行到去聯和墟街市，肥豬提議飲茶，都好喎~~都係食下蝦餃燒賣馬拉糕~叫左碗豬紅粥同叉燒腸，叉燒腸唔係太好食，豬紅好咸...8蚊一籠，仲想點~茶錢講緊都係1蚊位o者~!都幾好氣氛丫~都過得去啦~

久不久要落聯和墟買野,一盅兩件多是我的選擇,一反常態地,新春過後此處並沒有加價,盅頭飯依然是$11,點心$8,茶錢$1,合來只不過$20,便宜得很既然沒加價,就要在其他野做功夫,鳳爪排骨飯骨多肉少,以往滿滿的排骨不復見,但飯底水準依舊,粒粿分明,雞扎用上腐皮,所謂花膠亦不過是豬皮一塊,真有點懷念少年時跟老父飲早茶時的准山雞扎及舊式灌湯鮫,聊聊天,說說笑的日子,老實說,家庭與事業我肯定是選前者,每天營營役役,你能得到全世又如何?最終能陪伴你的,只有家人.

老實說，炸兩．還是第一次食。不過大概也知道何為上品！行前到櫃台，叫呀姐拎碟炸兩。本滿心歡喜，因慕名而來廣記，呀姐一轉身，從蒸籠拿出一碟炸兩。心中大驚，嘩！Crossover?!?!?!大大打折扣。不是厚件！？！？再打折扣放滿甜、麻二醬後，竹籤一吉。散散收收，樣子並不討好。更甚是，油炸鬼竟是過夜貨色（希望小弟沒有錯）粉皮入口糊糊，已不求有米香，但求做粉皮時加倍認真。希望下次再來時，帶給我驚喜吧！小插曲：一拿起碗時，底下的碗竟然有大半碗水，搞得小弟多狼狽！

25-5-2006 0640係屋企或公司附近食早餐就多，趁今日要公幹，早少少上北區覓食。本來去海記，但太早仲「開糠」(快餐店行業術語，意即準備一齊開檔事誼) 中，隔幾個鋪已有粥品及點心，咁就清清地叫了白粥及炸兩。白粥稍為稀了些少，但米已開花，米香幾濃下，有時太棉的粥，個人來說不是太喜歡，尤其趕時間，好難吹得凍。至於炸兩，新鮮熱辣整，夾起上來的皮唔爛，差極有限掛，加埋一輪混醬，就開始迫火車之旅。

又一間迄立聯和墟幾十年粥店,但已遷往綜合大樓,以往風味全無,卻換來舒適環境及有冷氣,而人面依舊是老人家嘆早茶的聚腳地,一盅兩件不過二十雞左右,又有粥炒麵供應,可謂多完化,點心比一般無誠意的酒樓更有過之而無不及.自小已跟父親飲早茶,對早茶情有獨鍾,此店茶質是一般貨色是預期之內,排骨飯並非太大盅,配上菜心,蓋滿盅面,需要另用碗仔盛起,排骨醃得並不過火,尚有肉味,比想像中好得多,飯粒最怕過濕,幸好幫趁多年水準保持得相當好.蝦餃皮有點厚,而蝦仁醃得過火,雖然爽口,但肉味失真,可惜!身邊儘是老人家,暢談家中或是別人事,空氣中隱約滲出鄉土情,是一般酒樓所沒有的!

好正的艇仔(細$9)，粥的味道好好，加上魷魚和碎牛，好好食，尤其是碎牛好有牛肉味。

元旦日，九點多起了身，想到聯和壚食早餐，想起廣記，搬到新街市之後都冇去過，所以就和男朋友一齊去。上到新街市o既熟食中心，很多人，廣記的枱就係最多，最難找到位。坐下來要了一個菜乾豬骨粥、皮蛋瘦肉粥和一個豬潤腸粉，我最欣賞豬潤腸粉，即叫即整，有很多薑絲，豬潤好爽，腸粉好軟滑，加上一點點甜豉油，好味﹗

食完拉麵想飲凍檸茶,男友提議去街市買,路過此店見佢d出品都吾錯,仲有埋英文menu!男友話呢間d蘿蔔糕出名,於是買左碗白粥$4同蘿蔔糕$5.白粥相當綿,吾錯!蘿蔔糕煎得夠乾身,頗香蘿蔔味,但糕身吾夠實.不過咁既價錢,物有所價,下次會試左佢d點心.