御和亭日本料理

營業中

休息中

已經食過3-4次午餐。次次都要排隊，因為真係有質素同價錢平。比起格離德美更加有實力。大埔越來越多有質素小店，希望間間都做得住，等大埔人更多撰擇。吞拿魚蓉飯無得輸，而壽司拼盤先一百蚊左右，有飛機貨食真係好抵食。牛舌串燒係用牛舌芯位置，仲要厚切，口感一流。直得推介

呢間日本料理係我女朋友極力推薦cp值極高嘅一間，所以間唔中都會同女朋友黎食。平日都唔少人等架，果日大約1點鐘到都要等半粒鐘先入得，門口無位坐，又落緊大雨真係比較尷尬😅不過都值得嘅，因為野食真係又平又好味！好似我呢碗御和亭魚生飯咁大碗又勁多勁大粒嘅魚生先$70，仲要係壽司飯，粒粒魚生都好肥美。女朋友就叫左個拍板嘅赤海老什錦刺身飯 $108，價錢係比我呢碗貴嘅，但同時刺身嘅質素就更靚好多倍！入面有d叫唔出名嘅刺身都好好味🤣

難得一聚，竟選一個比較偏遠的日式料理，這是我朋友的飯堂，多次推介，但難以撥冗，終有緣幸會一試。逐一向我介紹這裡的師傅朋友們，吃那個前菜海膽雞肉親身燒好再製冷盤。看來師傅花了不少心機去完成。海膽新鮮，可再滑溜一點，中規中矩，她說這是師傅特意製作，惜自己覺得再醒胃方面未夠，反之在淡純吃食材原味又未完全發揮出來，有點不上不下的感覺。要講得意之作，我反而十分推許這鰻魚壽司。用厚切方式呈現，會否搶走飯的比例，倒覺得不是，反之拿捏得十分出色。燒鰻魚正反燒得剛好，吃一口是干脆，但油份沒有滲出來，輕輕滲出醬汁及那厚切的質感，配合得相當得意，暖暖的襯著壽司飯，紫菜亦要烘過才包飯團部分，好細緻，簡單得來亦有美感，好吃。這裡的燒雞翼亦不讓鰻魚壽司專美，燒的功力考究，表皮部分干脆，一咬下去肉汁四溢，趁著青檸，褪去油的味道，加上酸，口內油分四溢，加上肉的嫩滑，不錯。刺身拼盆來了，基本水平，用上池魚等，新鮮的魚生，引出的味道基本調，沒有太多更深層次的味道引了出來。炸蝦天婦羅，多少反映一間日式料理店的烹煮實力，粉槳均勻，落的油溫剛好，油沒有油膱味，炸起上來，沒有多餘油份滲進紙表面，一吃，脆卜卜的，內蝦不冷，暖暖的，

放假一家四口去搵野食，就去呢間近近地係大埔既御和亭。其實呢條街都好多野食，淨係日本餐廳都已經有好幾間，而呢間隨離都係一間日本料理。為食既我們這一家都叫咗好多野食。首先黎既有什錦天婦羅，兩隻蝦非常好食，爽脆唔會梅，其實蔬菜天婦羅都一樣好食，粉漿唔會厚，上枱時熱辣辣脆卜卜。跟住到串燒出場，有燒牛舌，好意外因為牛舌係厚切值得一讚，收得呢個價錢比返好既質素，加啲檸檬汁就更滋味。到主食，就叫咗特別啲既師傅發牌既壽司拼盤，等當日師傅睇下咩食材最好就整盤壽司出黎啦，一啲都唔失望，件件都新鮮又好食。胃口好大既我地都叫咗鰻魚炒飯，不過不失，唔會搵唔到啲鰻魚碎，炒飯一粒粒都沾滿醬汁。口乾乾都叫咗壽喜燒，有烏冬又布啲湯飲下。仲有叫咗小丸子做小食，估唔到用鐵板上仲要有啲蛋係底，有心機既。最後都有我最鍾意食既牛油果軟殼蟹卷，軟殼蟹保持夠脆，牛油果顏色都好靚無生銹，蟹子都唔會得幾粒，好足料！呢間日本料理係幾高質素，係平民地區開但高質，雖然佢價錢唔算平，但質素真係係返到。不過餐廳舒適度有待改善，有啲啲迫同埋梳化位唔太舒服，佢貴過隔離餐廳又好食過隔離少少，不過就欠缺少少舒適度啦。整體黎講都非常滿意，滿足既一餐！

朋友介紹話大埔呢間日本野幾好食 魚生新鮮 所以專登嚟食不過一定要book位 星期五晚上都full哂 無book唔知等幾耐 我同朋友2個人叫左4樣野食 都食到好飽 食評好多人介紹嘅牛油果軟殻蟹卷 我覺得無想像中咁好食 d牛油果有d生 食落去味道普通啦 呢個蛋捲好有驚喜 整得幾好食 上面個汁甜甜地咁好夾 不過好飽肚 所以我地留到最後先食仲有叫左個三文魚刺身 都好新鮮好肥美 本身想試個刺身拼盤 但驚有d我地唔鍾意嘅刺身 最後無叫到 另外有個北海道鍋 入面烏冬份量好多 每你食左2碗都仲有淨 不過隻天婦羅浸得太耐淋哂朋友話呢度野食拍得住出銅鑼灣食嘅質素 但價錢就低好多 2個人食咁多每人都係$130左右

平時都有同屋企人食開御和亭既lunch set，大約$70-80就有個質素唔差且大份既魚生飯，不過因為午市營業時間比較短：12:00-15:00，所以平時都唔係幾岩時間可以黎食。果日我地一人叫左一個御膳，御和亭魚生丼御膳（$70）同赤海老什錦刺身御膳（$108）。赤海老什錦刺身係由師傅拍板，所以每一次食都應該唔同，刺身係相當新鮮，不過配既係白飯而唔係珍珠米亦無落壽司醋，呢點比較奇怪，經詢問後，下次可要求換做落左壽司醋既珍珠米😂但唔知洗唔洗加錢呢😂但白飯真係唔太match覺得抵食唔止因爲魚生飯份量足，而係一個set入面有齊前菜、漬物、蒸水蛋同麵鼓湯！

7點幾鐘嚟到排15分鐘就入得，不過冇book位就淨係坐得吧臺。嗌咗個鰻魚飯同同朋友share咗牛油果軟殼蟹卷，都唔洗100蚊一個人，晚飯食日本嘢嚟講算好抵食。鰻魚好軟熟，加埋溫泉蛋好好味，坐吧臺見坐師傅燒原條鰻魚好吸引，下次要試吓！

經常行過都好多人等位，呢個位有d隔涉，今日見無咩野做有時間就等下，睇下係咪真係咁好食！好彩我地得兩人，人少少等左15分鐘就有位，有d多人等得耐過我地，因為有落場時間，到指定時間就截，無得入座，如果等到截都未到就白等，我勸大家早d去入到去好日本居酒屋feel，位位滿座好熱鬧！入座前已經睇定食咩，一坐低就落單！先黎一客什錦天婦羅御食炸漿薄，新鮮炸，熱辣辣好好食，最緊要唔油膩，沾上醬汁食一啖，再配啖飯，一流！我地點既lunch set 都配沙律同蒸蛋，沙律無咩特別，反而個蒸蛋好出色！材料多，又滑嘟嘟，食到唔停口！另一個餐就點左安格斯金菇肥牛卷份量好足，用安格斯牛包好味在唔會有筋同鞋口，好軟身易咬，每舊金菇都好多！啖啖肉咁，配菜有沙律成件事多菜少肉好健康！人多會有點局促感，但勝在野食都好好味，份量又足，環境又做到好日式，想搵間有氣氛有水準，唔想下下食茶記，我推薦黎食！😎價錢又不算好貴，CP值高！放假俾自己一個享受的機會！

首推牛油果軟殼蟹卷，鐘意牛油果既話一定要食，好多牛油果，口感厚實，軟殻蟹又炸得脆，下次一定再叫雞泡魚乾成$70，一上枱好失望，得幾條好少。但食落又開心番，魚乾一d都唔硬，同醬汁一齊燒仲有d濕潤，咬落軟林林，好食日式魚餅底部燒得有d燶，但都好食呢個飯下次黎未必再叫，鰻魚份量相對上少...本身以為有飯焦，點知係無既。openrice見到其他人推薦蒸蛋，但個人覺得唔太特別，同連鎖壽司店既蒸蛋無異...總括黎講，係性價比好高既餐廳，兩個人人均百五蚊食到咁多野，已經好滿足！

太和附近好多食肆，越開越多，越開越有特色，淨喺日本餐廳都有好幾間。之前秋月居行平價路線，可惜都頂唔住執左，淨番呢間同德美，價錢相若，兩間每次都大排長龍，但個人認為御和亭食材較新鮮。一大班朋友去食飯，所以一早訂定枱同餐，避開繁忙時間，不過注意三點落場，所以感受到侍應都忙於收工，上菜快，收碟仲快，唯一美中不足。每個午餐都跟一個沙律、蒸蛋、麵豉湯，當中蒸蛋真係好好味，好滑，個醬汁好特別，甜甜地，好有地道日式風味。我今次食左魚生丼御膳，啲魚生好厚切，蝦好大隻啊！！鮮味十足，飯仲有啲調味料，另有少少青瓜同蛋，配搭得好好，好好味。其餘朋友都推介佢地嘅餐，牛扒牛肉都好淋好juicy ，鰻魚飯也不錯，好適合唔食生野嘅朋友。誠意推介想食日本嘢嘅朋友，食材味道不錯，但環境就一般吧，比較迫，又多人等位，未必好適合想傾計嘅朋友聚會了！✨✨✨✨✨✨✨✨✨✨如果大家喜愛我寫既食評📝，麻煩幫幫手比個愛的鼓勵❤️，我會寫更多豐富既食評比大家！🤤✨✨✨✨✨✨✨✨✨✨

餐廳細細間，座位不多，但有一排bar枱，岩哂自己一個人食飯既人（當然望住師傅整野食都係一重享受）晚餐點了一個極上魚生丼，有五款刺身。刺身非常新鮮同厚切，每款分量都算多，個人特愛碎甘海老同碎金鎗魚腩，加埋葱碎，變成完美既配搭💕好快食食下不知不覺就食哂成碗飯唯一美中不足晚上不設套餐如果想再抵食d, 午市御膳都有一模一樣分量同等的丼，有埋前菜，沙律，湯，蒸蛋，絕對物超所值！㊙️晚市人流好多，建議預先book位留枱

挑戰: 目標是把lunch set 全部食一次 1 - 西京銀雪魚前菜: 醃蘿蔔 - 不是太酸沙律: 生果新鮮, 菜比較鹹蒸蛋: 重點是有蟹柳麵豉湯: 正常主食: 西京銀雪魚 - 淡魚味, 帶有甜味, 近魚皮的位置會有魚油, 魚味同時會濃烈一些飲料: 波子汽水 - 是另外加錢的, 但勝在懷念一下波子汽水的味道

星期六同屋企人去左太和，之前聽朋友講話呢間日本野好食，一於帶埋屋企人一齊黎試下原來都有唔少棒場客！我地１點零到左，等左２０分鐘左右就入得入面既裝潢非常日式～仲有ｂａｒ枱坐ｂａｒ枱就會見到ｄ刺身係你面前引誘你叫野食先～我地一行４個人，叫左４個ｓｅｔ前菜非～～常豐富！有茶碗蒸，沙律，味增湯等。。＃沙律好有誠意既沙律，好大份！＃茶碗蒸好滑既蒸蛋，正呀＃御和亭魚生丼御膳我就叫左呢個，隻蝦好大隻！除左有切粒既刺身外，仲有青瓜同玉子，夠ｒｅｆｒｅｓｈ！＃鰻蒲燒御膳一黎到就聞到佢既香味～鰻魚燒到好靚，味道一流如果多ｄ蛋絲就更好！＃特上什錦壽司御膳ｄ魚生都好新鮮，分量好足！＃三文魚、帶子飯御膳唔好睇好似好少咁，佢既三文魚好厚～帶子好大舊！叫成枱都係野食～個人覺得食物高質又抵食，一定會再黎試！

今日去完大埔同我朋友拜年佢幫我book咗一間日本餐廳，佢話佢經常去食嘅，覺得唔錯所以介紹俾我食！我哋lunch時間去三個人叫咗三個lunch set前菜有沙律，麵豉湯，同埋蒸蛋等等好豐富我叫咗一個極上魚生丼飯御膳～有海膽啦，碎金鎗魚腩，碎甘海老，啦，三文魚籽，帆立貝都ok既，$108朋友叫呢一個$70御和亭魚生丼御膳，我仲覺得比較豐富啲吸引我多啲，隻蝦勁大～仲有好多三文魚粒～蟹子有青瓜有玉子～食落去清新好多～朋友就叫咗一個赤海老什錦刺身拼盤跟壽司飯～$108都勁抵食嘅～每件都切到勁大塊，好肥美～同埋都好新鮮呢個都幾抵食如果佢冇咁冰凍會比較好～如果講個價錢來講呢個質素已經算係好好呢間野都開咗幾年lunch時間都係要等位～都好多人幫襯～真係咁既價錢呢個質素都真係超級抵食～

呢間日本料理就係屋企樓下非常方便，所以假日嘅中午周不時都會嚟呢間度食。每次來都要等位，皆因呢一間餐廳性價比非常高，食物質素好好，比隔離嘅德美更勝一籌。我最鍾意食呢度嘅壽司set，佢包左一個茶碗蒸，沙律，同埋味增湯。sushi每一件都好有質素，絕對唔會Hea你，當中最好味嘅莫過於燒左口魚裙邊，佢嘅魚油好香，入口即溶，佢嘅帶子壽司都好大粒好正好鮮！————————————（5⭐️滿分，💫為半分）整體環境：⭐️⭐️💫食物外觀：⭐️⭐️⭐️💫味道：⭐️⭐️⭐️⭐️性價比：⭐️⭐️⭐️⭐️💫回頭指數：⭐️⭐️⭐️⭐️————————————