意粉屋 (已搬遷) 新店位置

牛油果煙三文魚pizza (都幾多三文魚，pizza皮都好味)酥皮波菜湯(酥皮一般，酥皮加$11)特色龍蝦湯(味噌味重少少，轉龍蝦湯加$11)海鮮焗墨魚汁麵(墨魚汁麵比較硬，如果軟點口感會好)埋單過二百五十蚊(加一前計算)，送海洋公園成人門券88折優惠券+加勒比海面具乙個

lunch四重奏，五十幾蚊，味道幾好~煙三文魚沙律幾好食，口感豐富~什菜湯夠濃，算好飲，但蒜蓉包就幾差，唔脆仲有d淋~龍蝦仔炒飯，汁多味濃，龍蝦仔勁細隻，不過都幾多，有咬口~

貪意粉屋外賣有78折(以前75折), 所以周不時都會叫個煙三文魚沙律外賣加餸(78折後$60.1), 尋日又係咁叫, 但係返屋企打開後, 三文魚o既份量只係有以前精裝沙律(~$25)o既份量, 非常呃錢! 真係要問下余文樂煙三文魚去左邊度!

呢間我都係第１次食因為意大利個類型既ｒｅｓｔａｕｒａｎｔ太多佢唔算好出不過因為有人請於是就係度試下啦４個人叫個海鮮拼盤都ｏｋ份量唔錯而且ｄ炸物都幾好又香不過個千層肉面就好漏唔啱我不過ｄ　ｆｒｄ好ｂｕｙ哈個肋骨都好食係食得煩ｄ而已再加個芝士焗西蘭花好食呀呢個想ｅｎｃｏｒｅ不過已經飽飽了下次啦

肚饑，依度寧靜舒適，搵左朋友陪我食tea~ 　二人食：1)新出o既lobstercino set-有杯類似cappuccino o既泡沫龍蝦湯(所以名叫lobstercino)、兩件龍蝦tart、杯裝蘋果蜜桃螺絲粉沙律同drinks。先講lobstercino，龍蝦湯加上細膩的泡沫，係個good try，美中不足係龍蝦肉有久新鮮~ 而另一新嘗試-龍蝦tart-好睇唔好食，主要因為d龍蝦肉烘得太苦，唔得~ 最後，沙律係一貫lunch set食到o既水準，即係ok~2)酥皮湯set-有三文魚周打酥皮湯，加芝士火腿煙斗粉。酥皮湯料多味道好，但今次比lobstercino比下去~ 而意粉屋o既pasta一向出色，煙斗粉亦不例外~　食到飽飽，飲埋杯熱奶茶，成個人暖哂。又可以抵抗寒流~

爸媽去飲, 同姐姐晚飯無著落, 唔想多諗, 就落左spaghetti house食. 叫左酥皮龍蝦湯x2 同一個煙三文魚鮮果沙律.佢o既龍蝦湯真係掂, 食到五六塊龍蝦, 酥皮又香! 大裝o既煙三文魚沙律有五大塊三文魚, 沙律有密瓜同蘋果, 都好好味!

今朝做野要過旺角..中午自然搵下朋友仔食飯, 去左呢間意粉屋, 環境唔錯, 服務亦快, 不過卡位窄左少少叫左個lunch set有個白湯, 味道一般啦蒜蓉飽, 唔脆唔淋, 都ok 既煙三文魚沙律, 有一塊煙三文魚, 螺絲粉墊底, 新鮮既生果, 幾好幾好主菜係咖喱雞扒飯, 的的式式, 0的飯係一舊舊, 不過味道都可以一杯凍奶茶意粉屋-都係食返意粉好....

工作上犯下大錯, 俾老闆訓示, 心情跌到落谷底. 但係心情點唔好都要食飯, 友人o係報紙上剪低左意粉屋酥皮湯買一送一優惠, 就請我黎意粉屋食飯氹下我. 要左兩客酥皮海鮮周打湯, 我心情唔好無及胃口, 就只係加多左個精裝煙三文魚沙律. 友人就叫左個三文魚意粉. 等食時繼續為自己o既錯誤補鑊(可惜作用不大), 食物上桌後10分鐘先開動, 難為好友等埋我先開餐!個湯有酥皮保護, 所以耐左都係暖o既. 海鮮周打湯比o係Boston飲到o既當然淡口好多, 亦無加到薯仔, 係罐頭湯水準, 不過配埋酥皮食, 都幾唔錯. 沙律用o既係鮮果沙律底, 有蜜瓜,哈蜜瓜,蘋果等新鮮水果, 唔係用cheap罐頭糖浸水果, 有誠意, 配埋微酸沙律醬, 幾好味, 都帶起我有返d食慾.好友o既意粉好唔好食無idea, 因為無心機試.

上星期六去到奧海成唔知MUD..就入左去意粉屋, 初時諗著好耐無去可能仲貴D, 點知左地做緊PROMOT 食滿$150仲有野送, 好幾好O咼..入返正題先, 我地一行5人,當中有兩個小朋友叫左:1.) 焗雜菌天使麵: D麵口感同味道很好, 有汁但不會太多.正..2.) 炸雞翼併盤: 各樣炸都OK, 不過雞翼就炸乾左D.3.) 辣肉腸螺絲粉: 茄汁味很濃,辣肉腸都好味.4.) 雜燴PIZZA: 尚可, 唔知係咪食慣PIZZA HUT, 故名思意, 意粉屋都係意粉好味D.5.) 唔洗$$送的"香蕉船": 小朋友見到已然開心到飛起, 仲要唔洗$.好...除了食物本身味道不錯不外, 服務都很好, 我小朋友不小心倒瀉了汽水, WAITER第一時間來清潔, 還問小朋友唔要唔返一杯...

星期六, 依舊係坐"書"監o既日子, 下午落左樓下spaghetti house食下午茶. 叫左龍蝦撻+田螺撻, 原來一客有三件, 兩件係田螺餡,一件係龍蝦餡. size同豉油碟相若, 餡料除左田螺同龍蝦仔外, 就係半凝固狀態o既忌廉汁, 味道就同平時飲開o既忌廉湯同龍蝦湯一樣, 不過係濃縮版, 幾冶味. 而且牛油撻底做得幾好, 好鬆香, 熱辣辣食, 好好味! 食完好味下午茶, 叉足電, 又再讀過!

今晚屋企無飯開, 就同家姐落左樓下食意粉屋.意粉屋換左新menu, 而家promote緊春日推介, 但係打開個menu, 發現大部份o既推介都係舊款式重新推出, 無乜新意, 但係唔緊要, 因為有我地好鍾意o既龍蝦湯! 二話不說, 要左兩客龍蝦湯+酥皮, 再叫多個烟三文魚鮮果沙律.意粉屋o既龍蝦湯一向較稀, 好處係配埋酥皮都唔會膩口, 不過收我六十幾蚊一客, 就似乎有d偷工減料!. 沙律無甚烹調技巧, 可幸烟三文魚同鮮果都幾新鮮.埋單過二百蚊, 味道唔錯不過唔抵食.

我一向都好鍾意食意粉屋既pizza. 但就一直都無食過煙三文魚pizza, 因為睇落好似好寡咁.早前食dinner, 同桌朋友點左呢個pizza. 我食落先發覺原來好正, 雖然主要得三文魚同芝士, 但味道真係好好~~ 值得推介!!!

家姐工作上有大突破, 好開心咁請食飯. 由於聽日大家都要返工, 所以就近近地落樓下意粉屋食. 由於一家人都細食, 只係叫左一個創意套餐加一個烟三文魚什菜沙律. 1> 鴨胸配五色菜絲-- 鴨胸幾鹹香, 菜絲係生菜, 甘筍絲, 青瓜絲, 溫色菜苗同甜椒絲, 配黑醋汁, 味道較寡, 係賣相多於食味. 2> 烟三文魚什菜沙律-- 烟三文魚都係鹹香, 有三大塊. 沙律包括蛋, 豆, 生菜, 香茄, 配o既千島汁夠酸, 幾開胃3>三文魚龍蝦湯扁意粉-- 呢個略為失色. 扁意粉煮得太腍, 而且龍蝦湯太淡, 唔夠味.4>鐵板海鮮奇脆批-- 係驚喜之作! 個人推介! 個餅底有d似酒樓食到o既薄罉. 上個有各種急凍海鮮, 再配上腸粉用o既中式甜醬. 用上薄罉同中式甜醬, 果然係創意之作! 而且效果仲幾好! 甜醬好冶味, 而個"薄罉"個邊位焗得好香脆, 海鮮雖然係急凍貨, 但係夠爽口, 再加上中式甜醬添味, 成個pizza味道即刻豐富晒!5>咖啡x 2 -- 爸爸媽媽飲, 佢地話幾香唔錯.埋單先至$290. 幾抵食!

5號, 星期二1840一陣會係百老匯睇The Terminal 7點半, 仲有成9個字就係附近既意粉屋食啦.一入到去帶位姐姐好好笑容, 抵讚!埋到位即刻有Menu同問我有凍水定熱水, Good!點知...我坐個位置就係廚房對出, 可能唔係太忙, 有一個廚師走左出黎同個Waitress傾計, 連見到我想order都唔理我, 要我叫出聲先埋黎.Order左焗田螺, 拿破倫意粉& 凍檸茶. 個Waitress欏杯凍檸茶過黎時大大力放係檯面, 可能唔高興我頭先左住佢傾計啦. 食物水準普通, 但出菜速度就真係我個田螺要差唔多40分鐘先得, 搞到最後為趕開場而個意粉要原封不動打包. 全程追餐到要求打包, 一句對唔住都冇.小插曲: 呢度有Outdoor Patio, 話說當我等緊野食時有一個大叔大嬸自己坐在外面, 而在我耳邊就不停聽到"個兩條友乜水啊, 識架""你去搞掂呢兩條友""叫佢入黎坐又唔制, 麻煩" 呢D服務態度真係要改改!最後走人時都係個帶位姐姐最有禮貌+笑容同我講拜拜.總結: 食物普通, 出餐速度要改, 價錢與服務不成正比, 員工態度亦要糾正!

多謝你既意見, 等我下次去試下先!!!