新富盈四川麻辣米線 (已結業)

不要怪我又寫新富盈的食評，無辦法，因為舊老細退休，新老細頂咗間舖時寫了一次，誰知做唔夠3個月，新老細又退場，舊老細回歸。玩咩？舊老細回歸，把之前新老細增添的新菜式新搞作全部下架，換番從前的模式：即是湯飯和湯米線，再加煎魚套餐。講完八掛新聞講番湯飯和米線，原班人馬，原來味道，食材新鮮是強項，這點無容置疑，加上無味精豬骨湯，無花巧，配搭起來就是屋企味道。不需要驚喜，保持水準就夠了。我每次都點4個餸，有魚有肉有菜。拒絕所有丸類和醃製品，永遠吃不厭。不同的是全部加價了。

叫了下午茶「魚腩出前一丁」同凍檸茶走甜，侍應話係細碗ok 冇問題，但嚟到似公仔麵，湯底完全淡而冇味，叫左魚腩但薄到似魚片，得三片，出前一丁但冇比味精麻油，我問過待應話佢話係出前一丁🤔。凍檸茶來到冇走甜，我叫佢換左。態度一般但我明明是叫走甜的，茶底冇乜味。我3點幾去到，4點突然熄左一半燈同冷氣，原來得返我一個，可能想環保啲，唯有食完即走。上網睇返係落場時間，但明明下午茶係三點至五點😰。以前食開是ok 的，不過應該唔會再食了..

常客。驚見換咗老細，即刻入去叫兩碗「照舊」，即是一碗4餸小辣米線和一碗4餸唔辣湯飯。好彩！湯底味道依舊，食材新鮮，依然是舊日的味道。新人事新作風，餐牌多了許多不同的選擇。一坐下即送上茶盅熱茶，即時好像高級咗許多。既然來到，就點多一個新套餐試吓。$30精選套餐，本來叫豬肉濕炒粿粉，但老闆說沒有粿粉，於是改叫「豬肉濕撈米線」。因為套餐寫着「送熱飲（凍飲加$3）」，所以叫了杯熱奶茶。誰知老闆說：枱面那茶盅就已是送的熱飲，另叫熱飲要加3蚊。不是價錢的問題，而是好奇怪囉！之前完全不知豬肉濕撈米線是怎樣的，上枱見賣相不錯，吃一口，原來是溫拌麵。豬肉雖只有幾片薄薄的，但醃得夠味；撈麵汁是甜的，如果加點辣和鹹會更好。最大敗筆是那米線，烚得過腍，口感不好。對我這個常客來說，還是食原本的湯米線和湯飯就夠了。

多年常客，知道上月起老闆退休，新老闆不但頂鋪，而且頂埋配方。專程來試一試可有什麼不同。基本上價錢和味道一樣，而且多了很多新款菜式。我們兩個人照舊叫了四餸湯米線和四餸湯飯（全部小辣），加碟油菜。*魚頭骨、牛肉、雞肉、豬肉米線（配芽菜腐皮）*魚頭骨、牛肉、冬菇、黑木耳湯飯(送菜）基本上保持舊有味道，湯底香而不麻，食材也新鮮。這裏不是吃乜丸物丸的地方，湯底也不強調幾多級數的麻辣。新鮮才是皇道，他能保持水準我便會繼續幫襯。新老闆增加不少新菜式，例如多種碟頭飯、炒粿條、奶油豬、石碢粥等。我們也點了新奇的雞腳。它新奇因是炸的，無醬汁，炸得香脆，應是用了木薯粉，脆皮夠薄帶少許煙韌，雞腳醃得夠味，簡單的鹽味但不咸又夠香。$30有五隻，喜歡啃骨的會鍾意。食開的舊客可以再來；想試新嘢的可以試吓。我都會再來試新東西，到時再報告。

我係土瓜灣街坊，日頭成日撞到新富盈個老闆拎住架買餸車去買餸比佢舖頭。於是出於好奇就試下間米線。這店嘅餸同其他店有所不同，d餸喺出面米線舖食唔到，例如魷魚穌，鯇魚頭骨咁。首先要點評一下佢嘅魷魚穌，絕對係優於一般打冷舖一d發大咗已經沒曬魷魚味嘅魷魚穌，鮮味十足。而個鯇魚頭骨簡直就係不得了，老闆醃到毫無淡水魚有嘅通病，沒有了泥味，我平時咀好雕，基本上唔食淡水魚，除了此間。此外，餸方面我仲嗌咗豬肉片，豬肉片用咗薑同胡椒醃，就咁聽用Lee d醃好似未聽過，但係食落好過濟。温提一下，唔食薑嘅朋友未必啱，因為d薑放咗去醃肉係走唔到。

昨天來天光道開會，到了午飯時間，過一條馬路，我都忘了街名 只知道一條街都是食肆，五花八門 !隨意走進這家，湯飯，米線，午市關係吧，客人很多! 我坐近收銀處，那位男士應該是老闆，多問一句就黑臉，難道所有都是熟客嗎？哈哈！自己填紙落單，不是太餓，所以點了三餸的湯飯，原來可以 “走飯”, 扣 $1 ($46)，湯底可以選辣、中辣、不辣，不算貴！只是不想浪費食物。我旁邊 6 人枱，已經分別有 2 位客人就坐，其中一個客人已經開始食米線，一位吃了一半，但走進 5 位客人，這老闆就馬上叫那位開始進食的客人換枱，她顯得非常狼狽，馬上拿著背包，樓面馬上把那一碗米線搬走！他可能要求所有座位都填滿客人，但何必這樣對客人呢？又不是不用付錢 ！等了 10分鐘，我的食物就到！很一般的湯底，正常白色味精湯！不來不損失！

今天沒什麼胃口，所以就選了湯飯，雖然現在吃，有點熱！ 我點了豬潤、魚腩，湯底選了菜心湯！ 這樣湯底一定又清爽、又帶有淡淡的魚香，而且有菜心配，感覺很健康！ 配上米飯，很快就吃得乾乾淨淨😂😂😂重點是一定要有醬油加辣椒🌶️，一定把豬潤和魚腩的味道加分不小！

呢間係我係土瓜灣最愛湯飯，今次好想推薦呢一間新富盈湯飯。住係土瓜灣或者係土瓜灣返工既朋友相信對呢間新富盈都唔陌生。呢一間湯飯有米線同湯飯，湯飯可以2個餸再加一個菜。我最鐘意食佢既少辣，湯底幾鮮味，而且勝在夠新鮮，所以有時出去食飯，諗唔到食咩就會去呢間。今次食左豆腐竹笙芥菜，打算食得健康少少。不過，坦白講環境就一般般啦，入面有少少暗，同埋要同人搭枱。但佢地主力做街坊生意，所以性價比都好高，值得去食。

我讀緊中學嘅時候已經又係呢一間餐廳度食米線。呢度喺學校區，呢間餐廳由細舖搬大舖。呢間餐廳嘅米線係偏幼身同埋比較硬，湯底唔算話會好搶嘅味。湯底夠鮮味，整體來講都OK唔算話會太辣太油。配料都算比街外嘅米線餐廳特別，我個人比較鍾意食佢嘅豬扒，魷魚鬚同埋炸魚餅。佢嘅腐皮比較大塊同埋有咬口啲。另外如果鍾意食湯飯嘅話，呢度嘅湯飯配魚同埋唔同種類時菜我見好多人食。清清地又夠健康。土瓜灣大件夾抵食啦都算，分量真係唔話得㗎啦。

中學喺何文田果頭返學成日幫襯呢間因為有個同學好中意食，今日day off就嚟懷緬下👍今日想食清啲所以叫咗個兩餸湯飯， 揀咗黑木耳同雞肉湯飯個樣同味道都幾住家feel， 完全唔覺得有味精👍不過叫黑木耳其實佢畀雲耳，雲耳唔夠黑木耳咁爽口，有啲啲失望既呢樣就。。 雞肉就幾滑，應該係雞扒，唔肥，醃料食得出有胡椒粉同少少麻油， 好有媽媽的感覺😅菜心就略嫌淋左啲。。見到個老闆係咁同啲食客吹水應該都係做街坊生意，幾有人情味咁，食物就係家的味道～

學完車就會得閒行下呢一帶陌生既區域食下飯今次來到呢間地道風味幾重既小店嗌左個湯飯個湯飯一來到第一個感覺係好多菜好正D菜望落靚靚仔仔夠晒綠我叫左豬潤同雞肉送飯真係一大碗都係菜+肉食落唔差 超滿足基本上一湯飯配一時菜 搭兩樣餸已經可以食到飽飽

天氣凍，食湯飯真係太適合啦！！！ 新富盈的湯飯係我最愛，因為湯係菜湯，還可以揀小辣，加上兩樣自選餸！飯又粒粒分明👍🏻因爲我喜歡食有口感既飯，埋單$40！ 今次我點了菜心、豬潤同埋肉醬！ 肉醬有點甜甜的味道，一點都唔辣！ 香👍🏻 所以我每次都會另外調一碟 醬油加辣醬！ 不過要留意，佢自家辣醬真係幾辣架，食唔到太辣就要量力而為啦！

今日同老婆黎食新富盈，叫左两款魚套餐，分別係馬友和黄花，我就比較喜歡馬友魚多些， 肉質鮮美，細膩而爽口， 脂肪肥美，所以我每次多數点馬友魚餐。另外再点了個麻辣魷魚鬚$55,份量唔算多，麻辣味不夠。

近喱幾年晚餐好少幫襯茶餐廳，多數貪方便去新富盈隨便食個湯飯或麵，因為總好過茶餐廳油膩多味精，係新富盈食多數餸菜都係清湯烚，而湯底飲完從不渴的，近喱幾個月佢地仲推出煎魚套餐，魚夠新鲜煎得香口，有湯有菜送，對於我喱D街坊黎講好味又有營

再胃食的人，都不會日日有好胃口。前陣子就是長期處於胃口欠佳的狀態，只想吃些清淡易消化的食物。慶幸有兩位好同事不介意陪我。-這間餐廳只有酸辣米線及生滾湯飯可以吃。重口味自然不適合腸胃不適的我，直接向湯飯進發。選了魚腩，豬潤，勝瓜，咸蛋。看吧！是不是好清爽呢 哈哈豬潤偏薄，切厚些更好，不容易滾到老。魚腩感覺不是新鮮貨色，梅梅地，較為失色。湯自然是咸蛋勝瓜味，清新順喉，好味易入口。很大一碗，沒胃口的人食完飲完已飽，還好聰明叫了走飯，還減一蚊。有空要再來，偶爾調理一下腸胃，做一個注重健康的OL