新高麗苑韓國餐廳 (已結業)

同朋友又想食韓燒，黎新高麗試下，好多唔同品種既肉類，菜，熟食，海鮮，前菜等等既選擇，肚餓既我哋食左好多肉同海鮮，熟食類既白雲鳳爪整得好入味，我食咗好多，另外當然唔少得有埋任飲既飲品，滿足

父親節同埋屋企人一齊嚟到咗哩一間韓燒餐廳慶祝，因為佢真係好抵食，人均208蚊加1已經係自助餐。佢嘅肉類都好多，而且非常之乾淨衛生，我最推薦嘅係牛仔骨同羊排。因為真係好好食，而甜品方面，佢都有好多選擇除咗有涼粉之外，仲有提子同青檸啫哩，同埋南瓜西米露，湯圓等等。餐廳仲會有三文魚供應，不過係限量，所以想食請趁早。服務態度好好，煎得耐都可以幫你換過個板，一路煎一路食都好開心，食肉食得好盡興！

差唔多有成年無嚟 #太子 搵食，見有人話想食 #韓國燒烤，第一時間諗起「新高麗韓國餐廳」嘅 #Amy姐😃 因為我個朋友已經幫襯咗佢好多年，大家都好熟，每次嚟到都好好招呼，今時今日實在難得🍻呢晚我哋七點左右嚟到，客人唔太多，地方都keep整整齊齊，唔會成陣油煙味。Amy姐安排咗我哋坐喺 #卡位，#小秘書 餓咗大半日，放低個袋我就馬上去搵嘢食。以 #放題餐廳 嚟講，#新高麗 嘅食物都算質素唔錯，#豬、#牛、#羊、#海鮮 樣樣有齊，#小食 選擇都唔少，除咗主食嘅烤肉類，仲有 #豬腳薑、#人參雞湯、#壽司、#啫喱、#糖水... 嘩 就當個平價buffet去食餐飽都抵😉 不過呢... 我哋個肚就真係唔爭氣，燒肉燒咗兩三個round，再食啲 #豬腳薑 落肚已經頂唔住👉🏻👈🏻 好在我朋友都飲得，總算可以回本啦🤣🤣整體我覺得 #新高麗 嘅 #調味 做得唔錯，#燒肉 燒起嚟又唔會乾爭爭，小食選擇又多，最緊要 #平民價 又有 #殷勤 嘅 #招呼。唔錯呀👍🏻

因肺炎疫情太勁，好耐無約閨蜜食飯，呢日就襯返工前，約好姊妹食飯先得勒🤗為左就大家返工時間，所以近近地約中間位置。同事曾經推介呢間比我，但平日食飯時間係佢地落場時間，今日我終於可以去食勒🤣原來閨蜜有來過食，佢話有lunch set, 我地就各自揀一個餐share食😋閨蜜揀左牛肉套餐，而我就揀左蛋包魚套餐套餐有兩個配菜，非常之開胃，我地兩個套餐總共有四款不同配菜，感覺很豐富😋而且套餐仲有個湯及飯，亦都有個甜品，其實$45真係好抵食👍🏻兩個主菜份量都好多，牛肉似肥牛，薄薄一塊，好鮮甜😋另外蛋包魚好有驚喜，魚柳配上雞蛋汁炸，因為即叫即炸，所以好燙咀，表面蛋汁炸至好脆口，魚柳又好滑，我一食難忘及愛上了🤤🤤

太子一帶周圍都好多選擇，但依度嘅午餐真係抵食，set lunch 包前菜、牛骨湯、主食、白飯、最後仲有甜品啫喱。首先會上牛骨湯同四款前菜牛骨湯味濃，胡椒味也重，好味。前菜:豆腐、白菜、薯仔、魚仔主菜: 韓式牛肉和蛋包魚韓式牛肉: 牛肉好入味、送飯一流蛋包魚: 魚包住蛋煎好香

近來肺炎肆虐都很少出門，趁農曆新年前到花墟購物，順道去太子食韓國燒烤。去到餐廳約1:45pm，因為今日是星期天，所以沒有Lunch set。韓式燒烤$148任食90分鐘，去到餐廳不是太多人，安頓好便立即出去拎食物，誰不知回到座位我們座位的燒烤爐有點問題，未能開爐。職員整了很久，到2:00pm終於成功開爐。燒了才20分鐘，職員走到我們的座位告訴我們他們要下班，叫我們拎定所需的食物放在座位慢慢燒。再過多5分鐘職員又走過來叫我們埋單，這時我們七手八腳食物還未取好，又急着要埋單。忍唔住向職員投訴，如果你們是2:30pm下班你們為何不告訴我們？如果一早告知我們就不會在你們的餐廳食午餐，職員說你們可以慢慢食3:00pm離開亦可。火上心頭明明是我可以食90分鐘，現在要我們3:00pm離開？ 2:00pm個燒烤爐才運作正常3:00pm便要我們離開實在太不合情理。90分鐘是有1.5小時，理應3:30pm離開才合理。最後職員說你們可以慢慢吃，食完才離開。但到3:00pm的時候一位職員又走過來問我們食完未，隔了10分鐘又走過來問我們燒完未。我們不好意思最後提早離開。午餐的燒烤食物種類選擇甚少，味道很差餐廳過

韓燒就最啱一家大細去食而且老少咸宜不過看燒放題通常價錢都有啲貴直頭拍得住日式嘅放題所以要搵一間有經濟實惠同事又好味其實都有啲難度咁岩今次行過太子就見到一間價錢非常公道嘅餐廳而且選擇都唔少重點就係雖然佢一個正宗韓式放題但係都有三文魚刺身供應個感覺都幾特別先講三文魚刺身每一塊都非常厚而且絕對鮮甜雖然會有少少冰嘅感覺但係完全唔影響夠三文魚嘅質感配合Wasabi係非常之夾至於韓燒嘅主角一定係牛雖然用嘅都唔會係韓牛但係普通嘅安格斯牛都發揮得相當出色雞肉方面就比較淡但係保留住少少肉汁嘅味道如果加埋豉油嘅話會好味D另外一樣幾好味嘅嘢一定會係燒雞翼同埋燒大蝦尤其是蝦係比出面嗰啲韓燒更加大完全係好抵食其實只要食到一斤至兩斤都已經係半個放題嘅價錢所以呢一間都可以值得推薦比大家

星期日想食韓燒 首選"漢X" 暑假都人多㗎腍腍吓又轉咗去旺角"新高麗苑" 因午市自助餐都有羊鞍 & 牛仔骨客唔多5~6枱 坐得寬鬆 播放懷舊金曲2個侍應有招呼嘅…… 店家唔趕枱 都可以坐到2:45pm打去問 加咗價$148 加10% = $163店員話會多啲食物嘅 滿心期待…… but去到現場依舊咁少…少…少款式提供 生菜 竟然要加$30+10% 1碟主攻 "牛仔骨&羊鞍" 回本項目有扣分係醃味太甜 太油膩 肉淡色冇醃味嘅 牛西冷 牛五花 必選 枱面10幾款凍菜 重覆選擇少 ……冇蔥餅 冇熱葷 冇生果只有啫喱1款甜品冇魚生(預咗) 連壽司都冇……雞湯~ 好味 好多雞件 但湯有啲濁 白飯1煲~ 靚飯較硬汽水啤酒任飲 汽水唔夠凍 可能早上至fill抽氣 食咗半個鐘至開 成身都油膩膩今次幫襯至留意倒 凍肉係冇雪櫃雪住嘅全部凍肉就咁放枱面幾個鐘 食食吓都有啲心驚 天氣咁熱嘅風險還好泊倒街錶位(半小時) 輪流入吓錶食得飽飽當散步 ……(都可以考慮 泊始創 $20 半小時)評價合格嘅 但 未必再去啦 ……

去過韓國旅行嘅朋友都應該知道，喺 #香港 同去 #韓國 食烤肉完全係兩回事👀 喺 #韓國 啲 #阿豬媽 只會粗粗魯魯咁擺抵啲 #泡菜、#韓牛豬、#生菜 + #一大支冰水 比你就會走人😅 對被寵壞嘅香港人嚟講... 食嘅味道未必習慣、可能又會覺得款式有啲寡😪 所以餐廳要喺香港地立足，自然要諗多裡啲嘢出嚟氹下啲客歡喜❤️ 嚟到 新高麗苑韓國餐廳 太子分店，#小秘書 真係大開眼界👀 #豬腳薑、#什果涼粉、#三文魚刺身... 唔講仲以為自己去咗食 #buffet🤣 咁啱每一次聚會，總係會有人大遲到👀 所以我哋都習慣咗 #食住等 😅 食啲 #泡菜 / #冷盤 用嚟打發吓時間🧐 雖然啲豬腳薑係甜咗啲，不過遠遠都聞到醋汁嘅香濃😋 講到 #烤肉 更係應有盡有，不過我唔食 #羊肉 ，又怕食錯啲唔生唔熟嘅肥肉落肚😅 所以我通常都只會燒吓 #牛仔骨、#牛柳卷 + 超重口味嘅 #蒜粒 🤣 #嘻嘻哈哈 好快又係時候講再見👋🏻👋🏻 老闆都幾想得周到，餐後仲有任食 #甜品 🤩 #西米露、 #薑湯湯圓、#番薯糖水... 仲有我至愛嘅 #啫喱杯🤩 加埋勁多嘅 #花奶 喺面... 正呀喂❤️

今天中午和友人進入太子新高麗苑吃午餐，放题形式，食物種類有人参鸡湯'豬、牛.羊、鸡、多春魚、鯖魚、椒類、冬姑、尤鱼等等'冷盤有韓國泡菜、牙菜、白鳳爪、菜類、豆卜、新鮮程度還算ok,服務員的服務態度也很好，餐廳播放一些比較好聽的懷舊歌曲，座位非常舒適，午餐放题每位 連加一大约150元，午市時段並不多人'不用擠迫，而晚市之前亦有來幫襯过，連加一约210 元一位，價錢算公道，但晚市一般比較多人，所以有擠迫感。

食完真係唔會去第2次，價格又唔係平，食物選擇少之餘質素亦唔得，服務亦一般，寫到明12點收工但見服務員10點就開始係咁清潔，食物亦無再補充之餘亦開始停止供應食物，枱面亦無人清理整體感覺差，過唔緊要冇下次

自助午餐要星期日&假期 至有 $128+10% 閒日客飯都低食$48起午市自助餐 12點~3點 (2:30埋單)客人唔多 夠清靜……牆上通告限時90分鐘 當日食咗2.5小時經理話: 唔爆場係可以慢慢燒食物款式選擇少~ 冇熱葷 冇炒飯 冇豬腳薑 冇糖水 冇甜點炸物冇三文魚正常 冇壽司 冇生菓有啫哩甜品1款 白飯任裝香軟罐裝汽水任飲 湯水得1款人參雞湯 ~ 仲煲緊 足料參片參條 有幾邊雞翼位上壯 清甜雞湯香 燒物例牌嗰20幾款…… 豬牛雞羊 腎腸尤魚 青椒翠玉瓜 有多春魚秋刀魚 冇魚塊冇生菜提供 冇得包就太熱氣茄子唔適合燒 索油太多唔敢食牛仔骨羊扒但醃到太甜味西冷牛肉片鮮 冇醃 原味💯冷盤~ 大豆芽 芽菜 泡菜 菠菜炒粉絲(凍) 茨仔 醃蒜頭 咸魚仔…10幾款 都係比較肥膩 後話：如果係鐘意食 西冷 牛仔骨 羊扒咁都可以選擇呢間 比較係"漢X韓燒" 多好多嘢食

第一次試新高麗苑，一間係太子近金魚街既樓上餐廳。餐廳既裝修係好舊式類型既韓式燒烤餐廳見到佢有d 四十幾蚊既Set 我地就一口氣叫左幾款share食有牛肉，豬肉，豬扒，雞肉，紅炆腩肉，香辣墨魚，蛋包魚同牛排骨每人重有一碗唔知係米牛骨湯，個湯有d胡椒辣味，幾啱我口味！叫左唔夠五分鐘就上齊菜。。好快餐店feel不過食落好有屋企食飯既feel lol每款菜既味道都算合格既，唯一唔好係唔夠熱。。。不過一分錢一分貨，咁既價錢我收貨了。最後重有一杯啫喱做甜品，非常抵食

今日下午係旺角，想食午餐但無奈周圍都係啲粉麵茶餐廳食到有啲悶，係我重好迷茫諗梗食咩既時候，枱頭一望見到有一幢紅色外牆既大廈有韓國野食，所以就心郁郁走咗去望下，見到個門口好似伏伏地咁，不過猶豫左一陣最終都係上咗去。餐廳係二樓全層，搭電梯上去一開門就已經係餐廳，侍應好快手安排左座位俾我，當時食客不是太多只有三四枱，可能未到打工仔放飯時間。侍應遞上餐牌後，隨即通知我現在得午市熟食套餐及麵食套餐可點 ; 睇一睇個價錢都幾親民，包前菜、主菜、牛骨湯及甜品都只係 $45 蚊，平時係啲茶餐廳食個飯跟飲品都收成 $45 蚊，最後叫了紅炆腩肉。牛骨湯 : 湯底有白蘿蔔、蔥花、腐竹及牛肉絲，味道清甜得黎帶點辣，而且胡椒味頗重，超級正。薯仔炆得好淋好入味，而且個汁甜甜地好醒胃。紅炆腩肉 : 有冬菇、牛筋、牛腩，份量幾多下。牛腩腍身夠牛味，而且一啲都唔韌。甜品係提子味啫喱，食落口就諗起細細個阿媽整比我食既回憶，好有家嘅感覺。呢間餐廳如果大家經開嗰頭，可以入去試一試佢嘅午餐。

上星期去太子做野, 做完野行下花園街洗衣街ㄧ帶, 行行下見到這間新高麗苑, 就去試下。主菜選擇了豬扒, 落單 5 分鐘左右就成個餐送上, 睇下幾大堆頭。先介紹ㄧ下個牛骨湯, 牛骨味及胡椒叶味好重, 再加上白蘿蔔, 腐竹及香葱, 非常惹味。配菜其實有好幾款, 因為我見到其他食客嘅配菜與我的不同, 我估係職員任意分配。而我這兩款係薯仔及韓式炒粉絲。輪到主角豬扒, 以ㄧ人份量絕對係多嘅。豬扒好淋, 但唔係 "梅" 嘅感覺, 味道調較得不錯。最後送上甜品, 係青檸味嘅啫喱, 煙煙靭靭, 加埋 d 花奶, 認真好味道。成個餐都係 $41, 值得ㄧ試。