榮記茶餐室

營業中

休息中

成日想過嚟試，但次次唔係人太多就係收6:00，今次首次去試，平日傍晚都有7成入座，終於試到自己來個招牌蝦乾金蠔煲仔飯$143老豆就玫瑰肥牛煲仔飯$143用料十足，蝦乾超多，餸多過飯飯入味，金蠔夠捻，味道適中肥牛飯有酒味，老豆話$143有啲貴但都好食。我覺得如果間中去下呢個價錢可以接受材料：⭐️⭐️⭐️⭐️⭐️味道：⭐️⭐️⭐️⭐️⭐️價錢：⭐️⭐️⭐️環境：⭐️⭐️⭐️衞生：⭐️⭐️⭐️⭐️服務：⭐️⭐️⭐️⭐️

🔹沙嗲牛肉煲仔麵 $68熱辣辣嘅煲仔麵湯底好濃郁惹味，仲食到好多花生粒～牛肉係偏厚身啲，肉質幾嫩，咬落煙韌～公仔麵好掛汁，一啖一啖真係令人食唔停！（另外仲試咗粉絲，麻麻哋，建議大家食麵）不過整體嚟講呢間沙嗲牛會比較油膩同埋會偏鹹少少，要係咁飲水永順嘅湯底係可以飲晒，但呢間就唔得了都值得一試嘅！但試過一次就夠因為地點太偏僻，性價比都偏低⋯

社交平台掀起咗沙嗲牛肉麵熱潮趁天氣仲未算好熱，返去慈雲山試下煲仔沙嗲牛肉麵避過星期六日嘅人龍閒日到訪只等了十分鐘左右就可以入座叫咗兩個真。沙嗲煲仔麵一個牛肉一個豬扒豬扒係另上嘅，比麵嚟得快炸得香脆之餘唔算太油聽講沙嗲湯底係用綿香，加咗花生等等嘅配料炒香仲有加埋椰漿所以一打開煲蓋就勁香麵底專登煮唔透，食咗豆卜同芽菜再食牛肉麵餅就啱啱好，到食晒成碗都唔會太淋牛肉有咬口唔會過份鬆散無上鏡嘅奶茶無香滑嘅！

近來幾想食勻出名的沙嗲牛肉麵，慈雲山「榮記」一直在口袋名單中，雖然離家不遠，但延至而家先起行（因某種原因唔太想去慈雲山）。假期1點幾去到，預咗有人龍，大概等左15分鐘有位。招牌的真·沙嗲煲仔麵（$68）係老闆自創（而家好多茶記都跟風了），用煲仔熱住沙牛麵上枱。煲仔麵可以選牛肉、豬扒或雞扒。上枱的時候姐姐揭開煲蓋，一陣沙嗲味撲鼻而來。麵餅最初係比較生，因為keep住熱力，麵會越來越腍，唔想腍得太快，最好即刻將牛肉墊起個麵。彎曲的麵條掛湯力甚強，沙嗲味係我食過最濃郁的，質感濃稠，花生粒亦多，果然切合店家自己形容係「沙嗲中的espresso」。不過就係因為太濃味，第一啖會覺得好好食，食到中段就覺得好膩。牛肉係新鮮的，有一定厚度，但幾腍；雞扒可以不用試，分量少而且薄身，醃味一般。值得一提，呢度雖然係普通茶記，所有伙記都好忙，但都保持到友善態度，尤其係姐姐們，會好親切咁教點樣食啲麵會爽啲。不過咁，應該都只會嚟一次，唔係話唔好食，但始終比較膩，同埋，夏天更加唔會去。

最近聽朋友講，慈雲山有一間食沙嗲牛肉麵好出名，成日排晒隊，所以特登去試。當然第一樣就點佢嘅招牌沙嗲牛肉煲仔麵，沙嗲味道香濃，但我嫌佢湯底太杰，有啲似撈麵嘅感覺，如果稀返少少就perfect。花膠翅煲仔粉絲，味道都唔錯。椒鹽雞翼，反而有驚喜，味道有兒時食嗰種味道。西多士及菠蘿油味道都一般，可以唔駛叫。

今日黎開附近，男朋友特登話要黎食呢間茶餐廳本身好好奇，有咩咁特別🤔🤔午市時間，入到去人山入海，有街坊有學生座位同枱之間距離好近 係典型香港茶餐廳的格局當然有跟足政府要求，加設隔板我地叫左兩個餐1️⃣生炒牛肉飯 |$45係午市套餐 坐低都見唔少食客有叫一於試下佢！夠鑊氣 飯粒粒粒分明👍🏻蔥香配合牛肉碎 味道清香2️⃣ 真•沙嗲煲仔麵 |$68可算係招牌菜 😛可選擇 牛肉、豬扒或雞扒 其中一款我地揀左牛肉 （沙嗲牛肉先夠經典！）上菜時，侍應姐姐話我地知撈底已經食得！見到煲肉的沙嗲湯汁翻滾著睇得岀好熱！果然用瓦煲係超保溫一邊撈一邊留意到湯汁比平啲杰好多稍為吹涼一下放入口發現味道意外地濃厚😯 麵條上有掛汁雖然牛肉片份量唔多 但係已經風味十足 性價比不錯👍🏻

☟非專業最真實食評☟（以下食評純粹個人意見）𝙂𝙧𝙖𝙙𝙚 𝘽: 沙嗲牛肉煲仔麵（$75）好失望❗️煲仔麵一上係熱辣辣，沙嗲湯底濃，入面有一粒粒花生，都算足料👀而且每條麵都有沙嗲汁痴住。‼️重點尼喇‼️沙嗲湯底偏咸，而且唔夠香，加上佢每一條麵都痴住沙嗲汁，食到一半己經好膩😩食完覺得要去洗腎😊牛肉片都夠淋，就係無沙嗲味嘅正常牛肉片。👀鐘意食沙嗲同重口味嘅朋友可以試下，其他人我唔推介喇😂❀總評❀ 𝙤𝙫𝙚𝙧𝙖𝙡𝙡 𝙜𝙧𝙖𝙙𝙞𝙣𝙜: 𝘽-湯底好濃，但味道偏咸，食落會膩同咸到要不停飲水🤦🏻‍♀️沙嗲亦唔夠香🥺牛肉片就正常發揮👀但性價比唔高所以減左分👀我就唔會再食喇🥲但對鐘意濃味嘅人尼講佢應該會好高分🤣

💛🍜慈雲山良心小店呢排經常係廣告見到呢個沙嗲煲仔麵廣告終於有機會去試下!!-最鍾意係佢嘅湯底 好濃厚嘅沙嗲湯 仲要一打開蓋就聞到好香嘅花生味 好足料～ 由於係煲仔裝住 食到中段嘅時候再食個牛肉同豆卜都仲係辣咀lol -加分位：店員服務態度好好 座位安排好好 抵讚🤩🥰

我係一個茶記Fans早就聽講黃大仙慈雲山多野食 要食香港原味道黎呢度冇錯作為一個茶記Fans🙋🏼‍♀️ 沙嗲牛麵炒蛋多士熱奶茶係例牌 今次呢個係升級版沙嗲牛🔥砂煲特濃沙嗲公仔麵🥘｜HK$68———————————————————————之前睇相我以為面個層係蛋漿 見到實物之後 都係覺得佢好似蛋漿😆究竟點樣先可以將沙嗲汁煮到起泡呢 我就唔知但我知佢個花生醬好濃 一開始仲好似湯咁 之後越食越濃越傑 我相信呢個係砂煲餘溫嘅功勞由湯變成醬 個醬掛晒係柱麵度 再一啖食落口 兩個字：足料!😎港式熱奶茶 ———————————————————————隔離檯:「諗住舊式茶餐廳嘅奶茶會唔錯 不過麻麻 太水」我：同意———————————————————————💌 榮記茶餐室 | Wing Kee Restaurant 📮 地址: 毓華里12號地下A-B舖 (mtr黃大仙站轉小巴 / 巴士附近落)🌐 分店: 好似冇⚠️ 註: 排隊唔算耐 15分鐘左右 | 聽講住呢區嘅人都識榮記🥸

平時茶記沙嗲牛就食得多，用煲仔嚟煮沙爹牛麵就真係少之又少煲仔麵一上枱滿滿沙嗲香味，亦有花生香，牛肉嫩滑不柴，一路食煲內熱力令麵條索湯，湯底慢慢杰身，掛湯力十足，令每一條麵條都能沾上沙嗲香味，再加上煲底下的豆卜，非常濃郁惹味睇落去$68食一個沙嗲牛麵好似好貴，但係此店能將沙嗲牛麵做到一個好似小菜般鋪排及精緻，確實出色

有睇story就知小編同一個星期食咗兩次，仲要山長水遠都要去，原因就係小編友人中咗毒🥲其實好想試埋佢地嘅煲仔飯，可惜依家冇咗晚市，啲時間又就唔啱，唯有遲啲先食☹️值得一提嘅係餐廳啲姨姨服務態度極好，同你去茶餐廳一般見到嘅”澳牛式”服務爭好遠🥰.🫕沙嗲煲仔麵食咗兩次，兩次嘅感想分別好大😂個湯底有幾濃，到到都有講架喇，小編就講下其他方面啦😙啲配料全部小編都試過曬，排序如下: 1️⃣豬扒2️⃣雞扒3️⃣牛肉，你可能會覺得食沙嗲唔食牛肉點得啊，但餐廳啲牛肉真係唔好食，落得太多鬆肉粉，口感變得好奇怪🥲相反，豬扒同雞扒就唔錯，同沙嗲都幾夾，份量亦唔少🥳另外就係個麵底，個人覺得粉絲比公仔麵好，唔會越食越淋同越食越濟🤭公仔麵嘅話，小編食咗一半已經開始唔想食，但粉絲就相反，食曬都覺得唔太夠飽😂所以小編話兩次食嘅感想爭好遠係因為配料同麵底都唔同，好視乎個人需要同喜好，難怪啲食評咁參差🙃.🫕西多士聽講呢度啲西多士都唔錯，的確係幾好食，不過又唔會話有咩特色😂想食咪叫埋，過下口癮咁囉😜.🫕炸雞翼雞翼叫咗兩隻味，不過小編唔太記得係咩味(原因係雞翼嘅味道同餐牌上寫嘅味道有啲出入🥲)雞翼就真係幾貴下，成$10一隻，個人覺得唔太值得

見近日社交媒體太熱門了～難得有機會去慈雲山，一定要黎打個卡😝環境都算闊落，兩個人坐到卡位唔會好逼👍🏻見好多人都叫煲仔麵！！令人更加期待☺️$68沙嗲牛肉煲仔麵🍲一上枱熱辣辣，睇到佢仲滾緊就興奮🤤眼見牛肉真係好多👍🏻肉質夠稔🤤沙嗲夠濃，似沙嗲汁撈麵🍜可惜愈食愈咸😩食完仲非常口渴😢餐飲加凍奶茶要$7🥲奶茶淡而無味🤷🏻‍♀️已經叫少冰都好多冰😞😞😞呢個價錢食沙嗲牛肉麵始終偏貴🥲雷聲大雨點小🥲比想像中失望🥲$45乾炒牛河🐮牛肉份量多👍🏻河粉夠乾身唔算油🤔不過不失有機會的話都想試下餐廳的煲仔飯🍲感覺應該比煲仔麵出色，但見個價錢都過百蚊一個煲仔飯🤑🤑係好食先好🥶

沙嗲牛麵食得多，用砂鍋裝就真係第一次，網上見到介紹一直都想黎食，最主要既係黃店，一見做野要去慈雲山，專登朝下聖，一入鋪係超香既沙嗲味，因為枱枱客都係食更各款砂鍋麵。我當然最簡單揀沙嗲牛麵，即叫即煮大約10分鐘到，首先因為砂鍋長期都熱（食到尾仲暖），所以麵身係半熟，食到尾係岩岩好唔會冧曬。主角沙嗲汁相當濃，可以見到好似食沾麵咁掛係麵身上，但又唔會覺得好咸又唔辣，花生又好足，雖然一個麵都好足，但真心食完想再加多個粉絲黎食，雖然本身可以加底。然後講下牛肉，係用鮮牛肉，口感唔似係用粉拿鬆，而且大大塊份量又幾好，其實仲可以選擇其他餸，不過朝聖都係係沙牛最穩陣。

之前上網見到有人介紹呢度嘅沙嗲牛肉麵好正，嚟開呢頭梗係要去試下係咪真係咁好食先!的確呢度嘅沙嗲係比出面嘅好食，個湯都好濃厚，湯入面仲有豆卜，勁索味！可惜得兩粒，唔係好夠喉🙈味道好之餘仲有一樣野想讚下，就係飲晒個湯都唔會覺得好口渴👍🏻如果呢度會出沙嗲湯底俾人買嚟打邊爐就好啦😫

最近見雜誌狂推薦，果日同女友行過就排咗45分鐘隊入去見證一刻，本人非常中意食沙爹同公仔麵，其實已經期待已久，講漏左，排咁耐係有原因，提醒一下大家呢晚餐廳係派籌入座，你去排隊係冇意義，因為果度冇指示要拎籌，我點咗個真沙爹豬排公仔麵分上，加一個下午茶餐熱狗同凍檸檬茶，熱狗條腸係廚師腸，包大腸幼，食起上黎冇口感，而個主角除咗貴又真係幾好食嘅，不過好唔好食就要自己控制一吓時間，因為個公仔麵真係就咁放落去浸透，從吸收果刻就已經係沙爹汁，而塊豬排亦唔乾身啱啱好，甲埋一齊食真係唔錯，不過就價錢已然我會選擇去食斜對面嘉豐茶餐廳，同一樣野除咗少緊個煲之外，40蚊有找包埋野飲，而呢間68唔包野飲，真心覺得唔平，以上純粹就價錢同個人口味嘅意見