第一個post, 因為呢間食店而登記openrice, 可想而知有幾不愉快.
住咗牛池灣接近20年, 一直以嚟, 牛池灣食嚟食去都係茶記茶樓車仔麵牛腩麵或者大快樂,
從來無諗過/奢望過會有一間比較有"主題"嘅餐廳, 六月尾開張嘅呢間泰國餐廳為這區帶來了新氣象.
有室內外, 大熱天時當然人人都坐冷氣房啦
環境因為新開張所以唔錯, 係張凳唔太好坐, 因為背部太斜.
老闆唔係泰國人, 但廚房個師傅就真係泰國人
不過, 食咗兩次就知道唔可以再食啦.
71回歸日, 諗住落樓下食個晏, 然後就去銅記 (你懂的)
經過見到鋪面幾靚就入咗去, 三個人叫咗:
1) 泰式炒金邊粉 @$50 送 梅子茶
喺牛池灣嚟講呢個價錢真係幾貴, 同區$40-45 已經有一碟好味嘅炒粉麵飯+熱飲,
點知一坐底見到餐牌最底嗰行"送茶/啡"已經被黑線塗掉, 睇嚟係因為生意好就開始調整價格,
唔緊要, 都送一杯熱梅子茶, 凍梅子冰就加$2,
其他飲品好似凍茶/啡/檸茶嗰D就要加$5, 都尚算合理嘅
點知碟粉一嚟到就知道弊啦, 得隻碟大, D粉大概得一個飯碗咁多,
食落去個味道就係無乜味, 帶少少酸甜, 但就好似兩頭唔到岸
我心諗, 嘩你呢個價錢, 俾咁嘅味道, 我不如去九龍城食泰式嘢好過啦
結果唔夠食, 被迫要叫多一個餐
2) 黃咖哩海鮮飯 @$3X-$4X (唔記得exactly幾錢 $38(?)) 送 梅子茶
個咖哩味少少淡, 但可接受, 話係海鮮飯但就只有蝦兩隻,
佢個咖哩加咗蛋白, 食落去都幾滑, 好在無加茨汁, 份量都夠食嘅
3) 自選兩餸湯粉(可配清湯底/冬蔭功湯底) X2 @$26 送 梅子茶
望價錢揀食物, 點知出乎意料係三樣之中最似樣嘅
兩餸選擇有魚旦, 牛丸, 雞翼, 豬頸肉等 (大概有6-7款左右)
識食一定食雞翼+豬頸肉+金邊粉+冬蔭功湯底
個碗係翠華食魚蛋粉嗰款, 好似仲大少少, 份量好夠
冬蔭功湯底幾好食, 雞翼雖然仲有少少血, 但味道OK,
豬頸肉就無乜味 (可能係因為被冬蔭功味蓋過咗
送嘅嗰杯梅子茶味道見仁見智, 個人就覺得麻麻, 太濃
------------------------------
上次食過OK 之後就隔日(3/7)就去食第二次,
今次就兩個人食, 都係食晏, 識食一定再食自選兩餸湯粉
點知..........點知只係隔咗日已經無得送任何餐飲!!!!!!!!!!!
連梅子茶都唔送, 梅子冰加$5, 其他飲品竟然加$12 好似茶記另外叫咁,
係就係多咗紅豆冰/椰汁冰/青檸冰等選擇, 但想飲呢D特色飲品都要加$10........
坐地起價...都唔緊要, 之後先弊
我就繼續食雞翼+豬頸肉+金邊粉+冬蔭功湯底, 加罐$5 7up (好彩八卦問汽水幾錢 ),
點知嚟到變咗清湯+河粉 =.=
咁個waitress 都好好有幫我換湯底, 但就被迫食河粉...
其實食河粉我都OK, 所以無出聲, 廢事浪費食物...
但竟然俾我見到佢喺廚房倒一「包」冬蔭功湯料落去, 而唔係不一勺冬蔭功湯 OMG
雖然我唔可以好肯定話佢D 冬蔭功湯一定唔係自己煮嘅, 但見到呢一幕已經扣咗唔少分...
同行嘅朋友就食雞翼+牛丸+河粉+冬蔭功湯底, 加$10 青檸冰,
點知嗰兩粒牛丸嘅size 同便利店D 魚蛋有得fight, (具體D 嚟講, 大概係粒直徑2cm 的球體)
粒牛丸太硬, 而河粉嘅分量只有第一次的60-70%,
好, $26 呢個quality我忍.
最最最最令人驚訝嘅係杯青檸冰, 第一次飲青檸冰係連青檸都見唔到,
望落去就完完全全係杯加咗梳打粉嘅冰水,
飲落去就係鹽水, 得個鹹字, 半滴青檸味都無!!!!!!!!!!!!!!!!!!!!!!!
問個waitress 呢杯咩嚟, EE erer 咗一陣先知係青檸冰...
佢話佢地係人手渣D 青檸汁, 然後再加水 mix 埋喎...
$10 飲杯咁嘅嘢真係.....
坐隔離個師奶帶住個初中仔嚟, 一望餐牌就話: 嘩乜咁貴嘅
之後望咗我嗰碗粉就叫魚蛋+豬頸肉+河粉+清湯底,
點知嚟到就變金邊粉, 話無晒河粉喎...
佢一咬粒魚蛋, 就吐咗出嚟, 話: 嘩縮咗嘅?!
佢好心同個waitress講聲, 叫佢地唔好賣魚蛋住,
老細就行埋去講唔好意思, 想換過碗俾佢, 個師奶就話唔使
之後有無繼續賣魚蛋我就唔知啦
師奶個仔就食海南雞飯, 好似係$45 (?)
嗯, 就係白切雞(無去骨)飯囉, 無特別嘅醬油/調味
尖沙咀間文華好食十倍, 價錢都係差唔多
生意之道, 唔係見到有生意就不停加價, 你客源未穩就亂咁加價, 等同趕客.
再講, 其實咁嘅價錢無論喺牛池灣定其他地段都係比較貴, 最衰係佢無咩質素可言.
"抵食"嗰一項俾一分, 係因為價錢同質素唔成正比.
有得揀, 寧願去附近茶記正正經經炒翻碟星洲炒米或者食車仔麵.
相信呢間餐廳頂多都係呃到D去西貢嘅遊客, 區內人應該唔會點食.
要食泰國嘢, 都係去九龍城最正.
題外話/補充資料：
特別一提, 呢間個老細就係隔兩間"必發"茶記嗰個老細.
個人覺得, 必發茶餐廳... 可免則免.
(以上食評乃用戶個人意見 , 並不代表OpenRice之觀點。)
影片
