紅米 (已結業)

我收到餐廳外賣紙。睇咗好耐。見食物好似好吸引，一心打電話去試，我一打去話外賣唔該，佢地就問我食咩？我講完之後再講地址，佢地就話唔送😑請問一下，咩叫外賣紙？你唔送外賣叫咩做外賣紙？😒唔送唔緊要！點解你地唔寫明。只能外賣自取？唔識字？其實我已經打過一次問石鍋嘅嘢食有無外賣，聽電話位小姐態度已經好差，點解嗰個時候講清楚？！搞笑！都市人已經生活緊迫，時間等於一切。我足足浪費30分鐘系你地身上。我 不 會 嘗 試 你 們 的 食 物 ！

菜單選擇比較新穎，都好吸引叫左一個豬扒蛋包飯同辣肥牛鐵板飯蛋包飯除左d飯太淋，接近爛。整體都可以辣肥牛鐵板飯加左芝士(+$5)要黑椒汁，肥牛同飯都好多但汁就唔夠，同無辣味。芝士就好小，根本食不出有芝士本來想叫多個兒童餐比小朋友，但原來星期六，日係無做兒童餐以我屋企為例，小朋友平時要返學夜晚根本好小會出街食。姐係無咩機會可以食到佢個兒童餐。到小朋友放假得閒出街食時，餐廳又無供應希望呢點可以改善因為我係星期六去附近已經聽到好幾枱有小朋友的想叫兒童餐另外餐廳佈置整體不錯，但向地下一望其實地下好污漕。由其枱底位置。

點餐送餐全無眼交流，一句魔術語都無，一個黑椒牛仔骨一吹再吹才上，你問個餐好未，服務生射呢眼望你一下，繼續同廚房吹水，汁還要再吹2次才上（當時加上我才3枱客）黑椒汁還要淡如水，垃圾店

難得回家吃飯，但媽媽不在家，只好和妹妹在屋企附近覓食，原來屋企附近開了一間門面頗漂亮的西餐廳，一於就選擇它！這間餐廳每天都有不同的晚餐套餐選擇，我選了套餐內的雞扒蛋包飯，妹妹選了單選的牛肉鐵板燒。蛋包飯的蛋很滑，配上蕃茄飯口感不錯，但雞扒略厭乾身，沙律菜則很新鮮，脆卜卜的！牛扒鐵板燒，牛扒煎得剛剛好，不會太老，粟米很甜，其他蔬菜都很新鮮！總括而言，雖然不是所有食物都滿意，但一餐晚餐只是每人不到五十元的價錢，絕對是物超所值！

以下我想講既係至尊黑松露炒蛋套餐，呢個餐36蚊真係好抵，以我食左咁多年黑松露去講，呢間用既黑松露算係好野，因為味道好香，食落唔會好咸，菇味濃郁，如果你呢世人都未食過黑松露不妨去試下，因為間野正正係我公司樓下，遲啲再同大家分享呢間餐飲廳既其他野食啦

早幾日食嫁啦，細節就係下午茶果陣鼠左落去食RedRice可能因為新開，啲野食又未食過，所以真係好似上左引咁，今日要介紹既就係呢一個黑松露炒蛋，細佬睇電視就講得多，食就真係未食過，碟野一上台有一陣電油味沖上鼻，可能我聞唔慣，聞聞下啲電油味變左做濃郁既菇味，果下我Feel到自己聞慣左，試下放入口，嘩果陣菇味即刻湧出來，配埋個炒蛋，岩岩好，其實36蚊有黑松露食都算係咁

今日去慈雲山工作，見到呢間裝修有趣既餐廳，原來佢係之前我出過食評既餐廳，上次我比左LAMLAM脷佢，今次再試佢個吉烈豬扒豬骨湯公仔面，個湯一個字甜(>﹏<)，夠豬骨！公仔面面身好爽唔會淋哂，吉烈豬扒外脆內軟，真係平凡既價錢，帝王既享受

食左呢間紅米好多次，終於的起心肝寫一寫食評比佢。先講一講呢間餐廳的特點，如果你星期日早上去的話，真係分分中等到你燥底。烈日當空加冇野遮陰，龍肉都食唔落。如果夜晚去的話都還可以，因為佢餐牌其實都係同一張，晏畫同夜晚分別唔大。今日因為返工， 老早7點去食個醒神早餐，就去左紅米食個早餐充充電先返比老板吱吱喳喳，都唔知邊個諗出黎6天工作，人都顛，想抖下都唔得。呢度早餐真係大件夾抵食，25 蚊加6蚊有包有旦有火腿，大佬，你去大x樂食個普通餐(仲要唔飽) 都30 幾蚊埋單。呢度的茄湯好足料，雞排好大塊，可能有手掌心咁大。食完之後好大滿足。餐廳環境都幾有格調， 而且儲齊貼紙卡有折扣，抵上加抵。話是話，慈云山如果唔食譚x, 大x樂，大x活果d, 而家選擇起馬多左一個。

晚上同朋友跑步後, 因為朋友未食晚餐,打算到毓華街隨便搵嘢食, 行到去毓華里,見到有間新野喎, 裝修仲幾靚仔!原來朋友之前都有留意過, 米飯主題餐廳.企係門口望下, 價錢OK喎, 好似幾靚仔咁, 決定一試!裡面的環境都乾淨企理,MON上有7個<是日套餐>可選擇,價錢都是$33-$38, 價比性高!MEUN都有不同種類的食物,米線/沙律/鐵板飯/焗飯/蛋包飯等等因為去到已經差不多10點,1030左右要埋數CUT單,有些食材都沒有了~友人點了<田園鴨胸鐵板飯> $38, 追加迷你沙律及蒜容包($16)迷你沙律 - 醬汁都幾好味, 有埋粟米係度, 菜不會苦蒜容包 - 厚身一點的方包, 不脆不夠香, 不推介.<意式香草雞肉丸> $26沒想到上面有濃濃的芝士, 都可以拉絲了.雞肉丸好食, 很好肉地, 加上醬汁很好味.我地兩個都點了荔枝蘆薈冰紅茶,超級甜!! 上面的冰全部溶晒都係好甜,特別如果飲管係底部開始飲, 甜到我頂唔順.其實食物與價錢比例是可以接受,不過盡量小心選食物, 甜的我會避免.

三人行黎食飯叫左三個蛋包飯 兩漢堡一無雙腸 再加兩禁珍珠奶茶 凍朱古力味道黎講有啲咸 難入口啲蛋都煎得幾靚唔會套熟漢堡就一般水準偏乾身飲品般講會比較失色 冰多水份重需要注意下下次會叫第啲特飲試下🤔整體評分中下有機會先會再試

話說慈雲山早幾個月開左間新餐廳，由過年到宜家朝朝早都大排長龍，實屬呢區百年難得一見既奇境住附近既我緊係要黎幫襯一下試一試味啦！間野坐落喺毓華街，係呢區既美食集中地。所以用餐時間同星期六日都超多人黎呢度搵食。附近有數十個錶位可供揸車人士泊車，由於食肆眾多，所以車位超級無敵緊張！繁忙時間泊錶位要睇彩數，不過都有不少人選擇double park，不過呢度日日都有人黎抄牌！如果驚抄牌既話可以泊隔離既慈雲山中心。泊好左架車，一如所料，星期六是要等位的，等左五到十分鐘就入得。入到去，覺得店內裝修都幾"四正"，不過位置有點擠迫。可能人太多地方不大，所以略嫌有點嘈。望一望餐牌，OMG...早餐都有成十幾廿款揀，仲要廿幾蚊就落到樓，唔怪得成日都大排長龍啦！我點左漢堡扒田園茄湯通粉($23)，加多$6配埋火腿炒蛋奶油脆豬。加埋唔洗三十蚊朋友就點左個蒜香雞扒茄湯通粉，都係貴多$3，價錢十分划算！我個人對個茄湯十分滿意，裡面有蕃茄，紅蘿蔔粒同薯仔粒，很足料同濃郁。成碗野你會覺得好豐富，因為菜又多，漢堡扒有兩塊，廿幾蚊，宜家香港地真係好難搵。不過朋友話佢塊雞扒麻麻，話太多肥膏同埋有啲雪味喎。至於個$6益街坊配搭

晚上十時半到Red Rice，侍應說尚有五分鐘截單，所以我們一坐下便快快點餐。套餐價錢是$36至$38，晚市加$3，價錢算很經濟呀！我們吃了～咖哩唐揚雞飯($39)：賣相不錯，可惜一入口就發現致命敗筆－－咖哩汁和白飯都是凍的！只有炸雞是剛炸好、熱騰騰的。唉，可能因為接近關門時間，食物已是「水尾」。整體味道不過不失，但是誰會喜歡吃冷飯呢？煎香腸漢堡鐵板飯($41)：以後在打烊前只能點鐵板飯，因為有鐵板的熱力令凍飯都變暖。香腸、漢堡都是不用擔心味道的食品，加上少許鹹的醬汁，合格。凍飲加兩元，本來想以套餐價加$12喝懷舊黑牛，一問之下才知道他們的黑牛是沒有雪糕，只有忌廉的，那根本就不是真正的黑牛嘛！結果我們喝了凍檸茶，大大杯也不賴。吃至中段，侍應送來別張桌子的蛋包飯，看來不錯，下次我會試試。

早上被朋友拉出來食早餐, 由於開車關係, 我向來只揀方便泊車又唔會整花的地方. 這間餐廳之前有看過午市, 晚市均多人光顧, 想不到早上9點食客還是眾多. 這是其中一個餐牌. 另外的餐牌有沙律菜系的早餐, 很吸引. (抱歉忘記拍照)朋友的套餐, 看起來很豐富, 有菜的感覺很健康. 套餐很豐富, 雞扒煎得頗香口, 只是茄湯較清淡, 但符合成本. 黑豆漿感覺有加水, 但還是味道不錯. 炒蛋滑, 鬆餅是現成買回來的. 整體評價是很抵食. 人均肖費$34左右, 但比普通的茶餐廳選擇多. 

最近慈雲山開左間米飯主題餐廳，佢裝修果陣我都已經好有興趣，係度想像佢究竟可以點樣以米飯為主題其實都開左一段時間，但新開始終要排下，平時lunch都廢事排就無食，加上佢外賣暫時係要自取。今日難得同朋友下午茶得閒又唔洗排，所以就一於入去試下！入到去仲有得坐卡位添！裝修風格係cafe咁睇睇menu，都幾多選擇，價錢亦都公道到不得了，加埋咁精美既圖片，雖然d野食同米飯主題係離哂題，但個menu都係十分抵讚既！最後我選擇左個巨人自家製漢堡包！一上台，Woo 個包都真係幾高，因為佢個包係用奶油脆豬果d鬆軟包底，加埋個厚身漢堡同半溶芝士，整體感覺唔錯。由於太高身，唔係太知點入手，我就先切一口漢堡黎食一入口，好軟！無根！唔好睇佢出面黑蚊蚊，但入面仲好juicy，如果33蚊剩係食塊漢堡我都覺得抵，入面咬落仲有d粒粒紅蘿蔔等佢更有咬口，依塊扒無得頂！至於塊包因為個人喜好我就唔太鐘意，因為食漢堡已經唔係好知點入手，仲要用d咁難咬開既包，我覺得會影響我食包，沙律正常，減油膩平衡下only，重點是漢堡。朋友食果d賣相都唔錯，佢地都話ok，但我無食過就唔寫了。野食我俾滿分的，但唯一係衛生方面，門口樓梯明明都有個大

我鼻b知我為食，同我講佢樓下下午茶餐有手打牛肉漢堡，仲要性價比好高，唔係唔去食呀嘛。星期日下午五點先黎到，好在佢既茶餐係下午兩點至六點，仲要幾多野揀。焗飯、鐵板、粉麵同all day breakfast 都有，當然少不了我特登黎食既漢堡包，下午茶黎講選擇係非常之多，難怪keep住有街坊入黎食。溫泉玉子忌廉湯 $15就甘食漢堡有啲dry, 所以另外叫左個溫泉蛋忌廉湯。忌廉湯味道偏淡，湯入面有粟米及肉絲，成個配搭好似粟米肉粒飯😂。味道尚可，有少少忌廉味，口感頗滑，唔會似勾芡甘杰。加埋個蛋落去先❤️， 係湯入面整爛佢有一種快感🙊。加埋一齊食先發覺原兩者甘夾，原本偏淡既忌廉湯多左蛋黃既香味，蛋白就滑到似啫喱。巨人自家漢堡包拼胡麻沙津 $33Woo! 終於見到佢喇！好難相信甘大個手打漢堡只係需要$33！ 麵包用上係脆脆豬仔包，中間夾上一片厚厚手打牛肉漢堡扒，再有芝士蕃茄生菜及千島醬汁！拎上手已經好墮手！手打漢堡扒入口吃得到肉粒感，帶有一點胡椒味，亦吃得到有極微量紅蘿蔔，頗為濕潤有牛味，雖然未算肉汁滿瀉，但絕對不乾！整體配搭很協調，醬汁酸酸甜甜，生菜蕃茄清新，麵包皮夠脆，包內則裡像muffin般有一