老虎岩(第6座)潮式粉麵咖啡

營業中

休息中

琴日行過見肚餓，咁岩見到呢間野，所以入去試下。叫左碗牛肚河同招牌奶茶。等左一陣，黎到，賣相都唔錯，個湯都幾清甜。牛肚夠林同入味。河粉平均，唔算油。值得再食。另外杯奶茶入口都夠滑，期望可以再熱d。整體味道balance 。唔會苦澀，傳統的味道十足。鐘意傳統中式粉麵既值得入去試下。

現時用傳統手法沖絲襪奶已經買少見少，沖得好嘅就更加難揾。今日小妹無意中在大埔一條橫街隨便揾間茶餐廳填肚，估唔到有驚喜，坐正個位睇到師傅沖茶，手勢同長輩講嘅差不多，於是叫杯試吓，冇令我失望，茶香撲鼻，入口滑滑，重有回甘味攪到我要記低個餐廳名，下次再來。其它食物都水準以上，價錢就合理，唔算平。喜歡奶茶的人保證唔會失望。一句題外話，老板十分靚仔，大有臨風玉樹感覺

本來我都唔想寫食評嘅，但係今次唔寫都唔得，希望大家唔好再中伏之前睇完本雜誌見到大埔有間新開粉麵舖，個名叫做老虎岩第6座(徙置區)，—心走去試吓懷舊嘅味道，點知完全中伏，估唔到Ｄ嘢食咁差勁，湯底完全唔得，牛腩又小又唔入味份量仲小得驚人，杯奶茶又差又澀口，但價錢就－Ｄ都唔平，簡單Ｄ講呢間鋪Ｄ嘢食無味、份量小、又難食、價錢貴，真令人失望，徙置區味道，收私樓嘅價錢｡

呢間鋪D食物好味，我最鍾意佢地整嘅牛柏葉配潮式撈麺味道配搭一流，啱曬口味,份量都Ok,質素唔錯,可以一試，同埋D炸魚皮又脆有好味值得叫呢試,仲有個老闆健談友善👍🏻，上次幫襯仲推介黑松露雲呑比我外賣，真係幾好食，值得介紹👍🏻🤗

上次試過大埔老虎岩，D粉麵好正今曰又在大埔，幾大都試埋佢地嘅牛三寶同松露雲吞，12點幾到，竟然要等位，無計好食自然人多，好在都轉得幾快，10分鐘左右有位。牛三寶果然正，好味唔在講，冧度啱啱好。松露雲吞睇落冇乜特別，原來禾稈襟珍珠，松露包在雲吞裹面，要一啖咬落去D松露味才出來刺激你的味蕾ㄧ絕。下次專程坐車入大埔食都值得

一向唔多相信D飲食雜誌，寫到天花龍鳳，但在朋友的誠意推介下，同幾個老友一齊試吓。門面好對板，地方清潔舒適，下午茶時間人唔多，唔使等位。伙記介紹牛三寶，本來就抱着嘗試的心情，就叫咗個淨牛三寳，一向喜歡炸魚皮，又要一客，其它每人一碗粉麵。三寶果然名不虛傳，冧，滑，入味，冇味精，炸魚皮更是驚喜，不是一般得片薄皮，而是兒時吃過的傳統口感，童年回憶返晒來其它粉麵都好OK，最重要係冇味精估唔到今次令我對飲食雜誌要從新評估，不能一竹竿打••••••

今日午餐叫咗潮州3寳米缐。 有牛筋牛肚及牛蒡。 牛筋 好腍滑，但係牛肚及牛蒡一則般。 分量非常之小食咗都唔夠飽， 港式奶茶一般但係唔夠熱。 總括嚟講 食物質素一般，奶茶唔夠熱。

大埔好食粉麵店大把，呢間嘢請都唔會再去，價錢貴食物份量小，先講佢地牛腩，太肥又唔入味，牛丸食落得過死硬無牛肉味，湯底無味，啲辣椒油得啲死辣完全無辣椒香味，各位朋友如果入開大埔一定唔好去試呢間野，－定後悔，點解我話佢份量小呢？我今日去叫左一碗正常另外－碗加底，正常個碗份量小得可憐覺得自己好像乞丐，加底個碗就同各位出面食開嘅粉麵－樣正常份量，大家唔好信啲乜嘢飲食XX，我就係今次中伏左｡

真係從來都唔會打食評，今次真係唔打唔得。話說諗住支持下新開茶餐廳，見餐牌都整得幾有誠意，就算佢話要等30分鐘先做得起野食，都照等啦。點知係足足等咗1個鐘都未黎，重要佢哋話都唔知幾時先會預備好。隔籬幾枱都係同樣情況，甩單，唔見單。 講真，見到佢哋根本人手唔夠，都照入客，點做生意呀!? 食碗牛丸米等1個鐘都無，重要話唔要可以取消，坐到成肚氣，幾好食都唔會再食。

先讚一下老闆選店址的勇氣！揀在區內知名粉麵店對面開舖應該對自己既食品質素有相當既信心。舖內清潔明亮，讓客人坐得舒服。店員將麵放在台上，見牛腩及牛柏頁整齊排在麵上，便知廚師有heart。牛腩相當軟諗，有驚喜。牛柏頁有咬口，不難咬仲頗新鮮添。各樣都好，唯獨是湯底有色但無味，一試便知無味精。可惜湯底係粉麵的靈魂，希望店主可以改善一下，讓大埔墟多一間可以同群記齊名的粉麵店！

剛巧蔡潤記同群記休息，就同呢間老虎岩試試，奶茶真的不錯，一定要試下。牛腩同牛筋丸正！價錢係貴少少，一分錢 一分貨。辣醬最正，又香又辣，配牛腩一流。值得流意係出餐比較慢，要耐心等候。

試下新野，新開張餐廳食個粉，叫左碗牛腩河加魚皮，我一睇，即刻影底，湯底好濃郁，牛腩好林，魚皮係唔同平時食開，口感豐富，大埔好多好野食，呢間可以列入十大之一，比傳統口味較有誠意，心機之作

本人上星期光顧，幾乎食一碗麵+熱飲最低消費要$40😓一心諗住一分錢一分貨，叫了一碗牛三寶麵，分量太細，味道太差，谷鬼氣埋單走人！！！***同區比較，食一碗麵+凍飲只係$28-$32以為去左旺角***

去大埔馬會買完六合彩，見到斜對面橫街有間食肆開張，招牌“老虎岩”，點解大埔會有食肆叫老虎岩？？好奇心驅使下，又有DD肚餓，就入去試一試。 老板介紹他們是幾十年前老虎岩有名的傳統潮州牛三寶，牛丸粉麵店，因發展拆遷而暫別香江，現時由第二代把當日光輝在大埔重現江湖。 牛腩用新鮮腩，好味淋滑. 牛丸從潮州直接採購，果然彈牙牛味濃。今次食左粗麵，爽口彈牙，冇梘水味，湯底清甜冇味精可惜一個人食晤到咁多，牛三寶（筋，肚，膀）同其他限量供應的牛柏葉，松露云吞未試到，下次一定再來會一會它們。

星期六同朋友踩單車經過見到呢間新食店！ 入到去竟然俾我見到舊時一啲老街坊 （因為 我以前都係住喺老虎岩)好開心！ 嘢食仍然保存 以前咁好味！ 而家已經 少之又少！ 希望店主努力!唔好俾懷舊好味道嘅嘢失傳！ I will be back！