藍鳥葡國餐廳

營業中

休息中

今晚在禾輋邨試新餐廳，「藍鳥葡國餐廳」裝置簡約，燈光明亮。看過餐牌，發覺是街坊價收費，而且免加一。香脆蒜蓉法包$10~~好味道！ 慢煮燒乳鴿~有懷疑「慢煮」是否香脆？！向侍應查詢回應是「香脆」的！我才放心「落單」！熱騰騰的慢煮燒乳鴿來了！是香脆的！祇是味道較淡，而又沒椒鹽隨上。焦糖洋蔥煎焗走地雞扒蒜香意粉$48~雞扒與意粉份量對女士而言尚可的，但對男士的晚餐是不足。所以，添加經典豬扒包$38~豬扒包的豬扒都腍滑，配沙律醬、蕃茄與生菜。雪梨茶慢煮牛肉濃湯麵$45~慢煮牛肉像牛腩，味道可以的，夠腍，濃湯底比較有綽頭，味道也蠻不錯。蝦子鮮蝦海蜆沙嗲濃湯麵~兩款湯麵麵質都比較腍，不知道是否是「葡國麵」？！蝦仁雖然比較淡，但很爽滑，沙嗲濃湯相信是葡國式的沙嗲濃湯吧！因為跟一向吃開的沙嗲味道與色澤大不同，但可接受。

今日下晝兩個人第一次去幫襯禾輋藍鳥食午餐，叫左一個焗豬扒飯，一個燒汁海鰻拼墨魚餅意粉，兩杯凍檸茶，等咗一陣，嘢飲好快到，等咗10至15分鐘，焗豬扒飯到，味道一般。食完個豬扒飯，等嚟等去都未見個燒汁海鰻拼墨魚餅意粉，眼見張張枱都喺度吹單，我亦叫侍應幫我跟跟，前後追咗三次，隔離枱遲過我哋嚟都上齊喇，侍應一直冇回覆，最後等咗最少40分鐘都未有消息， 唯有唔食走人，最後埋單 $68，下次都係唔好貪新鮮，試新野喇

好少出食評，呢間野真係火都來。今日去買外賣，同個收銀講要多汁，因為老人家無牙，太乾食唔到，佢求其應一聲，全程拿口拿面!外賣攞咗返屋企,打開啲汁少到無倫，每盒只有一湯匙咁大把，你啲汁好貴架?個鷄扒一陣雪氣味!呢間黑名單，以後唔會再幫親

今日新發現禾輋終於有間嘢係好食😋唔怪得知佢成日排隊啦今日食咗個牛脷同咖喱都好正上次食豬扒飯都好好味拍得住以前大家樂👍夜晚食過炸物個汁好正牛扒同pizza都食得過現在呢間藍鳥做咗我飯堂添🤭

近期屋邨商場開左幾間餐廳，見到有葡國菜的餐廳，好少見，所以試下之前見至食評講到麻麻地咁，不過價格又唔算好貴，所以打算試一次啦今次食左豬扒包同焗葡國雞配白飯其實都唔係想像中咁差豬扒包的豬扒煎得好香，麵包好脆，仲有沙律伴碟，不過家人話正宗的豬扒包中間好似無加沙律醬……我又無乜研究過 而焗葡國雞上碟好熱，份量很足夠，雞肉是有預先煎過之後先放碟焗，之前食過啲餐廳雞肉係無煎過的，不過味道就偏淡整體來說是滿意的，有機會都會黎試其他食物

還以為只有一間星馬餐廳新開，怎料網上搵一搵，才發現還有另一間葡式餐廳都是新開的。價格比起星馬那間還要平，牛脷都只是$48 ，不過我還是點了個葡國雞。名字寫得漂亮，叫做橄欖焗葡國雞，配個白飯，豈料等了不夠5分鐘便端來，我便知道出事，雖然雞扒看似上邊乾乾的有點兒烤焦了，不過一試那個溫度，就知道不是即焗那種；汁醬又少，而且溫度不夠熱，一睇就知道不是即時焗出來的，不知道會不會預先將雞球煎好，然之後放些汁在旁邊。總之，雖然雞扒份量都不算太少，不過有點兒乾鞋，而且葡汁非常少，以偏多的白飯來說，這個葡汁不夠送完整碟飯，而且溫度也不夠熱，叫做焗飯實在是誇張其詞。熱咖啡都應該是用普通低級咖啡機弄出來的，味道相當普通。不過店舖新開，因為舖面夠大，因此都不難找到位置。始終它只是茶餐廳價格，四十多五十元，叫做有點特別東已是難得，不能期望它有新城市的<<亞蘇爾>>那種質素，畢竟那兒貴三倍。

今日工作關係黎到禾輋食晏無諗過街坊生意 但認真做 牛坑腩飯平時好怕食到啲牛腩大大舊 又鞋口一絲絲 攝牙罅 估唔到依間牛坑腩炆得好林 又唔會黐牙 咖哩油正常發揮 不過偏少 但叫店員都好樂意加汁比你雞髀扒意粉意粉軟硬適中 雞扒大大塊又嫩口 粟米粒亦不貓夫 有牛油味整體嚟講 商場快餐四五十蚊有咁嘅質素真係好難得 起碼一定唔會係難食

知道禾輋商場新開了間葡國餐廳，專程揸車去試試。環境：尚算闊落，座位舒適試了三個set lunch，落單不到五分鐘，餐就送上，心裹一沉有種不好的預感。紅酒特濃鮮茄燴牛利飯：牛利(太淋,冇煎香)及薯仔是預先霎好(正常的),但只將汁料淋在材料上便上枱，完全不入味，像將兩樣東西放在一起便算(失敗之作)！椰香橄欖焗葡國鷄飯：和牛利飯差不多，鷄是煎過的鷄扒切件，味道太淡及没椰香(個人覺得)馬介休炒飯：飯粒炒得好乾身，但味道又是淡淡的(個人覺得)飲品：凍奶茶(有茶香)、凍咖啡(味淡)、餐廳不提供華田，好立克。總括而論，這一次用餐頗為失望！

收工好肚餓，見到新開張，即刻試吓，點知中伏。咖喱牛腩無咖喱味，啲牛腩柴皮過我。椰香橄欖焗葡國雞飯，啲椰香應該行錯路，唔知去咗邊度？芝士鮮茄焗豬扒飯，焗完出嚟個飯仲係暖，好彩唔係凍嘅。甜辣醬烤豬仔骨，唯一可以講嘅就係平平無奇。知道佢哋仲係試營業嘅階段，希望佢哋會認真對味道，作出改善可以值得一題嘅就係應該係老闆親自出嚟問客人嘅意見，我都好如實反映比佢知，希望佢會認真對待啦。呢篇係我第一篇嘅食評，希望可以比到啲參考大家。