越南牛肉粉專門店 (已結業)

落雨濕濕，有啲凍，想食啲熱辣辣嘅湯麵；咁就食越南湯檬粉啦，外賣自取，今日Order咗魚露雞翼湯檬。拎到返公司仲系熱辣辣嘅，有兩只細細嘅雞全翼；雞翼比較乾身同硬硬哋，味道都幾夠，辣辣哋好重魚露味；湯底都幾清，味道也可以，份量唔系幾多，熊貓外賣自取折完都要 $48 性價比一般，耐唔耐食一次都可以。

假日期間其實在九龍灣常悅道附近好多餐廳都沒有開🤷🏻‍♀️， 見到越南牛肉粉專門店， 有非常肚餓，所以就入去一試。下午茶🥢 ～ 香茅豬頸肉飯$43、 生牛肉湯河$45、轉金邊粉$2、 水晶香茅牛肉米紙卷$10、咸檸檬七喜$8、港式咖啡。 ▫️香茅豬頸肉飯 ～ 輕食， 細細份， 豬頸肉味道普通，口感好硬。 ▫️生牛肉湯金邊粉 ～ 反而金邊粉份量正常， 生牛肉有幾塊， 口感一般。 ▫️水晶香茅牛肉米紙卷 ～ 味道一般。 ▫️咸檸檬七喜 ～ 正常味道。 ▫️港式咖啡 ～ 太多茶渣。 是我預期般的質素😅， 未必會再嚟。🏷️溫馨提示～ 整個用餐體驗均屬個人分享意見， 只作參考😊。    

落order時係14:39，枱面只係放左午餐餐牌，落單之前已經問咗侍應有冇小食餐，佢同我講冇，想食小食加飲品唔食麵食只可以散嗌， 因為食飽咗帶住小朋友只係想飲下野所以就嗌咗個細嘅小食拼盤（$58）同青檸梳打($36)，點知啲嘢食嚟齊食咗兩舊嘅時候，個侍應突然間擺低咗個下午茶牌 (當時係14:56)，上面寫住兩點半開始有下午茶供應， 唔係貴但既然佢咁唔老實，做咩要畀錢幫襯佢，又唔係特別好食，可一不可再。

一過咗12:30，周圍都要等位，好彩今日有嘢做，趕住一個人快食，呢類餐廳好處，一有位就叫你入去同人搭枱，所以好快有位！為咗快，叫左雙拼撈檬（有豬扒、香茅雞翼、煎蛋🍳），蛋係太陽蛋，所以好易拮穿，有蛋汁撈埋一齊，雞翼有3隻，不過豬扒就一大舊骨，冇咩肉食，但見佢有3隻雞翼就打和啦～味道方面，撈檬汁佢係比一碗你自己倒，個量自算多，倒完浸到去7-8成左右，正常酸酸地，冇特別；豬扒雖然量少，不過勝在唔韌，出面有好多食到用牙扯開；雞翼係煎，出面有啲係炸，就比較熱氣，我鍾意佢煎呢款多啲，就算湯檬都唔怕浸稔。飲品加$6叫咗薏米水，薏米多就多，但太甜，甜到返公司要飲好多水先冇咗陣味，下次試咖啡。

越南牛肉粉專門店 (九龍灣)好食度： 😋😋😋/5性價比： 😌😌😌😌/5回頭率： 🚶🏻🚶🏽🚶🏿🚶🏼/5價錢：HKD57，生牛肉河連可樂午餐食乜好？今次港男就揀咗食越南嘢啦。去到就揀最大路嘅生牛肉河，而嘢飲方面汽水同熱飲係唔洗加錢嘅，其他就睇吓飲乜，按不同嘅選擇而加錢啦，所以港男係揀咗可樂嘅，餐廳方面已經用緊紙紙管，睇嚟都開始緊準備日後嘅走塑政策喎。生牛河嚟到當然首先要浸返熟啲牛肉先啦，湯算夠熱嘅，味道都還可，不過可能因為辛香料落得夠多都唔定啊吓。份量感覺唔太多，好似唔洗幾耐港男已經清晒啲河粉咁，但味道係okay嘅。由於附近唔多越南嘢食，所以想食嘅話，呢間都係一個不錯選擇。———-//////————地址：九龍灣常悅道19號福康工業中心地下3B號舖電話：23850060～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #九龍灣美食 #九龍灣 #kowloonbay #kowloonbayfood #午餐 #lunch #lunchtime #越南菜 #越南牛肉粉專門店 #生牛肉湯河 #生牛

呢個星期 #小秘書 實在太無定力，為食嘅我似乎將low carb嘅計劃忘記得一乾二淨😅 呢日我又跟咗 #首領 去試新嘢👉🏻👈🏻烈日當空仲要沿路無遮無擋，最啱欠缺維他命D嘅我🤣 由公司出發，大概步行十分鐘左右，終於嚟到我哋嘅目的地 Phở Tái 越南牛肉粉專門店 🤩 餐廳地方唔算太大，不過都坐得唔會太逼夾。為爭取時間，我哋首先揀好食物，再慢慢清潔雙手同餐具😉 本來嘅一心嚟試吓佢哋個 #越南濛粉 嘅我，好快就被餐牌上嘅 #茄汁牛腩飯 吸引住👀 之後我哋再加多個 #雞翼湯濛、#越式炸春卷 做我哋嘅午餐🤤濃濃嘅 #茄汁 🍅 混入 #越式香料 再配以半肥瘦嘅 #牛腩，用嚟撈白飯份外惹味😋 可惜啲飯煮得未夠時候，硬咗啲咁啦😅 不過佢嘅 #春卷 同 #雞翼 都做得好香口，最後再配埋兩杯特飲 #紅棗龍眼冰、#椰汁涼粉冰 做我哋嘅 #飯後甜品🤤 Wow it’s nice😊

中午時段，天氣熱到爆，拎住公司文件又重又熱，行到附近見到呢間Pho Tai 既越式餐廳，見仲有卡位又唔洗等，就那那臨入去坐低，坐低唔夠1分鐘，阿姐1號巳經叫我地轉另一張枱，因為出面有7個人等緊，好啦，轉位就轉位啦。轉去另一張枱，坐低又唔夠1分鐘，另外一個阿姐2號叫我地坐埋一邊，而當其時，成間餐廳只係坐左7成左右，做咩係要迫人坐埋一邊呢？成間餐廳樓面加收銀加埋得3個人，樓面所有人都好忙到九彩，想搵個阿姐落單都搵左好耐。最後終於落左個香茅豬扒撈檬，豬扒肉質都ok，但魚露就唔夠，食檬粉最重要係個魚露，魚露唔夠成碗檬粉無左靈魂，無味。呢間真是一間很慳的餐廳。1. 慳人手 2. 慳坐位3. 慳魚露

平日中午屬於繁忙時間，樓面只有兩位侍應，嚴重人手不足，雖然未滿座，但係二人入座坐卡位要坐埋同一邊，都算啦，個侍應亞姐態度惡劣，座位中間亦都冇防疫間隔，落單上菜亦都非常之慢，如果唔係大熱天時又唔想再搵位我應該會走咗服務質素有待改善，繁忙時間唔該請多個人，落單三催四請冇人理，如果真係想做多台客，唔該加多塊板抗疫啦好心食物質素味道尚算正常，但係塊香茅豬扒勁細塊，女仔食完都唔覺飽，而且只係想加多少少蔥油冇人理會難怪唔使等位

有日lunch落雨嚟食呢間嘢一入餐廳門口個收銀女人**不停要求我將把遮放入門口個遮桶**我拒絕將我嘅財物(遮) 放喺門口個遮桶我避免把遮太濕 我入餐廳前已經特登fing一fing把遮 等把遮唔好咁濕 又扣返埋把遮粒鈕 令把遮唔會倒水咁我自問我好有公德心㗎啦 個收銀再三要求我放落門口遮桶我不斷拒絕 我問：「如果我把遮放咗係你*門口個遮桶* , 唔見咗把遮係咪你負責？」收銀：「你自己財物你自己負責！」依家係咪咁荒謬啊？！！你為咗避免嗰少少濕，要求客人將把遮放喺**門口個遮桶 而且道門係完全打開**, 如果把遮唔見咗就要客人後果自負！😡😡好心落雨天想避免餐廳地下濕滑就鋪紙皮啦有智慧啲得唔得呀！落雨係咁㗎啦 又唔見你話對鞋整濕你個地下？！不過還好最後個收銀女人將個遮桶放埋d,因為佢為咗強迫我將把遮放入遮桶, 而將個遮桶放喺我旁邊🤯總括而言呢個將遮放入 門口遮桶 嘅要求係*好荒謬*, 點解我要將我嘅財物放喺一個*唔安全*嘅地方？？！！

話說差唔多次次去叫外賣 都係淨札肉雞絲河。點知今次落單果個唔知係咪新黎，淨係寫個「札」字，價錢仲要自己查餐牌，收左我48，最後廚房佬唔知就變左淨札肉河，即收多左我三蚊。張單比一個紙角你 不以為意。等得耐，超過左最少十五分鐘，都算，落錯單收錯錢，摶人買外賣行得遠冇仇報，其實是整衰自己個朵。認真講呢間未去到特別好食，只是工商區普通水準，得幾舊札肉影都廢事。但員工質素下降，食物又一般，自然唔會再有回頭客。除非係正公司樓下貪方便先會幫襯。

抵食下午茶。九龍灣午飯時間人流十分多，所以留返畀個時間嚟食下午茶，人流較少加上價錢又抵。之前大多食評都批評環境衛生麻麻，但宜家可能重新裝修，環經感覺舒適企理。生牛肉湯河主打，有質素，但今次試下坑腩。不俗。但豬頸肉就略太薄，但都香口有咬感。其實配料香菜都不錯咖啡即似即沖的咖啡，都係滴流越式較好。加多個札肉沙律做配菜。剛剛好，食物均衡。最緊要人均都係$50，呢個價錢，以九龍灣工廠區又要環境企理舒服都已經好難得了

疫情期間，多數叫外賣，好多餐廳通常做9折，今日去越南牛肉粉麵專門店，居然外賣8折添。餐牌幾多選擇， 另配小食、野飲就加十幾蚊。 我叫咗豬肉片橯檬， 原價$48, 折左$38真係好抵呢度可以打電話落order之後取，吾使企響度等快好多。 佢個粉底連豬肉片係叫多, 加埋魚露，味道幾好。 價錢唔貴, 通常想食越南粉都會揀呢度。 📍 越南牛肉粉專門店 𝑷𝒉𝒐 𝑻𝒂𝒊九龍灣常悅道𝟷𝟿號福康工業中心地下𝟹𝙱號舖

午市趕時間，求其入咗去嗌咗碗生牛肉河，個湯都幾大浸黑椒味，連啲牛肉都沾滿黑椒搞到成碗都係黑椒辣味，第一次食咁重黑椒味嘅越式河粉味道都算喇，為求飽肚都無乜特別期望。但最唔掂係個呀叔上菜時，碟芽菜青檸上面塊葉（唔記得叫咩葉）跌咗落張檯度，我同呀叔對望咗一吓。。。佢竟然用手執起塊葉若無其事擺返落隻碟度！（雖然我一向唔會落塊葉）另外杯檸茶又係有少少怪味。食嘢期間仲有兩隻烏蠅仔不停飛來飛去。。中哂伏，一定無下次！

呢間舖頭係位於觀塘商業區，睇佢樓面嘅座位都坐得幾舒服，於是就揀咗佢嚟試吓。佢個餐牌都幾多選擇，連豬肉片都有，因為唔係好多越南餐廳都會有豬肉片揀，多數都係豬扒。我揀咗一個叫魚露雞扒嘅湯金邊粉，湯金邊加兩蚊，總數$54, 包一杯飲品。啲嘢食好快嚟到。但係個量少得有啲過分。佢個粉底係好多, 多到滿, 但個主食---雞扒好似得半塊咁。我朋友食豬肉片都係得幾塊細既....雞扒食一啖，覺得個味道都幾好, 有少少辣嘅感覺, 甜甜地。但係個雞扒係比較凍，同埋比較硬身，呢樣嘢真係麻麻哋。要將舊雞扒食之前，放咗落個熱湯度浸一陣，先至可以。個湯味道OK, 少少甜甜地, 而且好熱, 呢樣好重要!雖然價錢係唔貴, 但量唔合理地少, 而且食物都算凍。真係諗唔到食咩都可以考慮呢間。

𝒱𝒾𝑒𝓉𝓃𝒶𝓂𝑒𝓈𝑒 𝑅𝑒𝓈𝓉𝒶𝓊𝓇𝒶𝓃𝓉 𝒾𝓃 𝒦𝑜𝓌𝓁𝑜𝑜𝓃 𝐵𝒶𝓎呢間餐廳一到12:30就好多人排隊，今次兩個人去食安排咗卡位都仲要搭枱😅就知有幾旺🌟生牛肉河配野飲（$55）河粉都幾大碗，河粉非常滑身，牛肉份量都尚算多，芽菜同埋檸檬係分開上嘅，等你可以按自己份量加落去。呢度係做得唔錯嘅👍🏻湯嘅味道都幾清甜，整體味道唔錯。📍 越南牛肉粉專門店 𝑷𝒉𝒐 𝑻𝒂𝒊九龍灣常悅道𝟷𝟿號福康工業中心地下𝟹𝙱號舖