越南牛肉粉專門店 (已結業)

一過咗12:30，周圍都要等位，好彩今日有嘢做，趕住一個人快食，呢類餐廳好處，一有位就叫你入去同人搭枱，所以好快有位！為咗快，叫左雙拼撈檬（有豬扒、香茅雞翼、煎蛋🍳），蛋係太陽蛋，所以好易拮穿，有蛋汁撈埋一齊，雞翼有3隻，不過豬扒就一大舊骨，冇咩肉食，但見佢有3隻雞翼就打和啦～味道方面，撈檬汁佢係比一碗你自己倒，個量自算多，倒完浸到去7-8成左右，正常酸酸地，冇特別；豬扒雖然量少，不過勝在唔韌，出面有好多食到用牙扯開；雞翼係煎，出面有啲係炸，就比較熱氣，我鍾意佢煎呢款多啲，就算湯檬都唔怕浸稔。飲品加$6叫咗薏米水，薏米多就多，但太甜，甜到返公司要飲好多水先冇咗陣味，下次試咖啡。