鑑記粥品

營業中

休息中

牛頭角街市頂樓有幾檔熟食店～有粥麵檔、茶餐廳、小炒店、點心舖～款式多～可以各自叫喜歡嘅嘢食～落完單坐低等食一睇個廚房就知有歲月痕跡生滾粥底一大煲～即叫即加料滾熱～腸粉即叫即蒸～厚粉夠滑份量足艇仔粥足料有魷魚鬚、肉碎、豬皮～粥底好棉食完唔口渴～加胡椒粉～味道剛剛好油炸鬼脆～腸粉即整～炸兩厚身～加芝麻醬、甜醬～少許豉油味道啱啱好唔介意衛生情況嘅話～可以一試～畢竟老字號小店真係買少見少～兒時味道應該支持下

是日牙痛，所以lunch 過咗街市買粥。牛頭角街市2樓嘅熟食中心，呢間粥舖由細食到大，平時會食艇仔粥（勁多料㗎），今日要下吓火所以食皮蛋瘦肉粥。等外賣時見住阿姐落咗足一隻皮蛋，絕對無慳住俾，瘦肉唔係肉鬆呢啲柴口瘦肉絲，係切粗條嘅瘦肉，粥底綿綿好味道，再加脆脆花生同蔥花，食完順曬好舒服。另外加咗一份炒米粉，份米粉基本上無乜餸，有少少豆菜同芝麻，但勝在大大份都只係10蚊好飽肚，食曬碗粥再食咗1／3份米粉已經夠曬，剩返嘅米粉可以留下一餐，幾慳家🤣

中午要去牛頭角附近買嘢，順便去牛頭角街市熟食市場食個午餐。街市熟食區有粥店，茶餐，兩餸飯等，早餐有得飲茶，晚市仲有小炒大排檔，街坊一定熟路。雖然天氣好熱（中午可以去到32, 33度），不過有幾把大牛角扇都ok頂得到（你吹到好似癲婆咁失儀咗啲🤣）點咗豬紅皮蛋瘦肉粥同炸一，即細份嘅炸兩，唔知多唔多人識咁叫，因為自己食唔曬一份炸兩，但同好多朋友講，都唔知有得叫炸一。粥好食，夠綿，材料都足唔孤寒；豬紅亦都唔腥，幾好食。因為自己有油鑊炸油器，所以炸一嘅油炸鬼夠新鮮。另外佢嘅炒麵同炒米都係好食嘅，份量又足，所以都見好多街坊午市嚟買外賣。

由於之前食得太多炸雞, 喉嚨有O的唔舒服, 所以諗住食下皮蛋瘦肉粥下吓火.呢間衛生環境真係有O的驚恐, 但粥就真心好食, 而且瘦肉份量真係堅多.另外加左個齍腸, 不過呢個就麻麻O地, 只係份量唔少.價錢方面真係非常平, $16 粥 + $10 腸粉. 如果頂得順個環境, 呢度係非常之抵食.

【鑑記粥品】街市覓食!今次去左牛頭角街市搵食吖，呢間粥店長時間都好似好多人咁，今次揀左都好多人點既炸兩($8)、牛肉粥($12)同艇仔粥($12)，先加入配料，再倒入熱粥將配料滾熟🤣。粥底夠綿係基本，牛肉好細嫩，而且每羮都畢到牛肉碎，好足料！同樣艇仔粥都係，一畢起就係滿滿既配料，魷魚、牛肉、魚片等，仲可以叫多花生添😝不過講定先～環境呢就係一般街市熟食檔既環境，要視乎大家接唔接受到啦😝

近來的持續低溫，香港實在少見。不必強勢進補，其實一碗正粥已可使人窩心暖胃。一碗豬紅艇仔粥，既補血又熱心，絕絕對對是對抗寒冬的一大佳品。粥底夠綿，不會撈兩撈便起水；況且料多過粥，魷魚絲、豬皮、花生、蔥等等越吃越有，每一口都是料！魷魚及豬皮極之腍滑，店方落得豪邁，客人食得開心。豬紅更是大大磚的，不似坊間某些粥舖碎濕濕的上，爽滑而有咬口，過足豬紅癮！本來還想叫炸兩，結果都是免了，皆因吃過了粥，已甚滿粥之至。

糧尾的時候被迫要出外揾食，係食碗米線一餸都要$32既環境，錯有錯著黎到牛頭角街市揾食時遇到這糧尾恩店！雖未至平靚正，平靚係有的，味道一般，但價錢真係平到以為自己睇錯艇仔粥$12 蝦米腸$10食到飽一飽先$22, 同埋用料一d都唔求奇，艇仔粥料多過粥，粥底好綿。食完有少少口喝。蝦米腸就比粥品差一點，好淋，醬油可能有調整過，顏色深但食落唔咸，仲可以加甜醬麻醬黎食。跟住發現大家都叫炒米粉，唔知係咪會好食d呢~如果為味道就唔太吸引既，加上環境係街市，唔講都知唔會太整潔同舒服，但快食餐肚又平，出品亦有心，好食過個d十幾廿蚊碗既雲吞麵，呢度絕對係糧尾精選！

走到牛頭角市政街市，這家粥麵小店已經營多年，好多牛頭角和九龍灣嘅街坊都時常光顧，公公婆婆尤其最愛。天氣逐漸轉涼，這星期氣溫界乎12-18度之間，早午餐想吃些暖笠笠野食，最啱就係去食粥。 今時今日吃一碗足料嘅粥一般都要三十蚊，炒麵呢⋯⋯十蚊起吧？！叫了一碗豬紅瘦肉粥和一個炒麵，本想加孖油炸鬼，但晏尐先會炸有緣遇到熱辣辣即炸油條一定不要錯過！每次炸嘅數量有限㗎豬紅瘦肉粥（雙拼粥$13）我係多青多花生，內裡當然有一舊舊豬紅同咸瘦肉，一大碗好多料，這個價錢咁嘅質素，真係抵到飛起！！！ 炒麵（$7）收七蚊一碗嘅炒麵絕對唔會將貨就價，滿滿的！我自己好鍾意添加甜醬、蔴醬同芝麻一齊食添天氣涼，麵雖然凍了，但每一口仍感到那份暖暖的人情味，如果撞正咁啱熱辣辣炒起當然更正啦！熱騰騰多料豬紅瘦肉粥加碗炒麵，一餐夾埋都只係廿蚊，真係越來越少有。 一定要多多支持小店

鑑記已經有幾十年歷史，亦是在牛頭角街市熟食中心開業最久的食店之一。以前我父母在放假時，最喜歡帶我們來食粥。那時由老闆娘坐陣，她的幾個子女協助，經常吵吵鬧鬧地，就過了幾十年，現在食店由兒子與媳婦接手經營。食客都是幫趁多年的街坊，大家的評語是：平、好食、衛生環境一般和服務態度差！一直以來，老闆娘的子女都會鬧客。原因很簡單，因為收費平，客人多，為了節省成本，便少請工人幫手。惡性循環之下，他們做得辛苦，便經常發脾氣。因此，來這裏的熟客均知道，千萬不要催單，食物總會送來的！近兩年來，情況已稍改善。也許有人問：為何冒著要受氣，也甘心「送上門」呢？究竟有多平和好食呢？以我今日這個午餐為例，艇仔粥+炸腸合共$18（粥$11+炸腸$9）！艇仔粥的材料有碎牛肉、魚片絲、豬皮、花生和蔥粒，落單時我說明不要魷魚。粥底有米香，曾聽到有食客在九龍灣工作，午膳時要步行十幾分鐘，也來這裏吃「有米粥」。因為九龍灣那邊不單粥店少，價錢貴之餘，粥底又像是由「粉糊」開成，半點米也找不到！炸兩腸的油炸鬼雖然不是脆的，但反合我的口味。腸粉是即拉的，有米香，不過粉槳有時會較「削」，一夾便斷，今日卻調得不錯。加上芝蔴和醬料等，十分美

今日老公想食清d d , 就去牛頭角街市2樓幫襯，環境真係有d dirty, 今日仲要勁多人，好大堆人外賣，好大堆人堂食想柯打，好多人想埋單，咁啱又得一個姐姐，超忙😂。我地反正閒著先搵地方坐坐，柯打了皮蛋艇仔粥、瘦肉粥，好味道。另想叫隻糭，姐姐話今朝太忙未整得切，那不打緊。過左一陣，姐姐大叫邊個要炒麵，個個紛紛走去攞一碗，那我也不妨試試。唔～太淋身，的確麻麻。總括：如果怕污joe 既你，不要來了！如果怕慢既你，不要來了！如果怕服務既你，都不要來了！而我...會再來的！$13一碗粥又平又好味道！哈哈哈哈！

午餐時間，又唔算好餓，來到食肆，見有粥檔，試下先，叫了一碗艇仔粥+炒米粉/炸腸，只需16 元，好味夾抵食，艇仔粥多料，牛肉粥都不錯, 午市都好多公公婆婆吃，而家轉咗工，又要抽時間去吃了！

一間在牛頭角街市多年嘅粥店，老闆由朝做到黑，有心有力，價錢相當抵食。因為價錢抵，吸引很多公公婆婆及低下階層，亦可以令佢地有些較平嘅選擇而又可以食飽飽，呢樣好重要，但現今起各大商場食市而機乎絕跡了，可悲 ，所以我覺得老闆有心係因為付出自己努力、辛勞，並不是單純為金錢、利潤，呢D就係真正社會責任了。講返野食 ，小店唔係好多款式，基本幾款傳統粥、油器、腸粉、炒粉麵。雖然今年年頭已經加了價, 但價錢依然超級抵食. 艇仔粥, 超級多料, 有魷魚、魚片、炸米粉、碎牛肉、花生，應該差不多了，多料之餘味道亦不錯，粥亦好棉，當然熱辣辣喇，好味。通常我都會加多個炒麵，飽肚D，炒麵唔會好油，色澤亦好，麵唔'林'唔硬剛剛好，通常炒麵一炒完就好快清哂(我估一鑊大約二十碗)，你話點解...梗係好味 。其他仲有油炸鬼值得一提，因為呢度D油炸鬼外觀依然係油炸鬼但質感似油脷酥，會較為實心又甜甜地。不過，今次冇，因為由於師傅不停手做其他野，跟本冇時間炸，所以真係睇你彩數。

適逢星期日，探望老人家之際，就同屋企人食個早餐先。鑑記係係中式早餐既首選，仲有好多老人家起到食叫左個豬紅粥、炒面，炸兩，豬紅粥:由於香港真係無乜邊到有豬紅粥，所以呢到都幾特別，豬紅好在唔會太易碎，而且瘦肉尚算新鮮。加上豬紅細粒之餘份量好多。炒面:有時呢到d炒面質素真係不一，所以我見小人果陣，通常叫佢翻炒一下，之後會更香更脆。炸兩:食開都知佢有分炸一邊同炸兩邊，不過炸兩全脆香口先岩我。價錢5個人都只係圍番每10幾蚊左右，飽肚之餘，又省荷包。

昨晚吃了自家炸地瓜球作宵夜，食咁油膩咁邪惡嘅野好對唔住腸胃，所以今日brunch要食下粥，第一時間諗到去牛頭角街市食粥。來到已下午兩點多，舖頭嘅人依舊忙碌唔夠人手，油鑊未有炸作油炸鬼幾時先出世 ？？？來一碗來料豬紅瘦肉粥 （$12）佈滿豬紅瘦肉同香蔥脆花生 ，好足料艇仔粥（$10）- 成碗粥滿料粥檔人氣最高嘅粥品，坐一陣都聽到四周大部份男士都叫艇仔粥 炒麵（$6）加麻醬、甜醬和白芝麻同吃，正叉燒腸（$12）攦上芝麻落埋甜醬麻醬，食得叉腸唔夠滑，有點“鞋”12蚊貨仔，夠份量，唔好要求咁多真係超抵食，40蚊兩個人就攪掂一餐

百物驣貴嘅香港，試問有幾多食肆會賣10蚊一碗有料粥 ？有！有！有！ 就係牛頭角市政熟食中心二樓，位於扶手電梯旁，連接往九龍灣港鉄站方向果條天橋果間小粥檔仔 。依個粥檔好多年㗎啦， 唔好睇佢檔仔細細，雖然好"up doub" , 但好多好多人幫襯㗎！依碗豬紅粥係10蚊，好足料，貨真價實，真係無睇錯，係10蚊碗！10蚊一碗！！！！！碗粥有好多舊豬紅，豬紅仲有佢地自己炸嘅香脆花生，粥底無加味精。以前食過 ：炸両 ～ 唔記得幾錢，都唔會貴，好多人食，可能多人食所以有時都要等，上檯多是熱呼呼的；炒麵～好似6蚊定7蚊碟，但唔叫好食，但論咁超值價唔應該咁高要求；腸粉～好似6定7蚊碟，有米香但唔算滑；一定會多多幫襯，比腸胃輕鬆d之餘又可以幫個荷包減輕下負擔嘛