開心小敘

營業中

休息中

由中學時期已經聽過嘅開心小敘，喺安興街呢邊已經開咗另外一間分店啦。每次經過嘅時候總有好多人喺度排隊，所以今次選擇咗外賣返公司食。餐單選擇有好多，可以自由配搭。最後都係想試返開心豬扒飯。有一個小插曲，仲記得中學時叫喱一間餐廳都會將佢改名做開心豬扒飯，而忘記咗原來佢係叫開心小敘。好，入返正題先，重點係佢個豉油汁，配上半生熟蛋，同埋豬扒，簡直係完美嘅搭配。咁耐冇食，果然佢嘅水準仲保持到。豬扒係一大塊連骨嘅，會幫你剪開做一屆届，方便食用。汁嘅份量都好充足，唔會得啲白飯。最重要嘅主角豬扒口感啱啱好，唔會太淋唔會太硬。因為我本人好怕食一啲好哽或者好淋嘅豬扒。因此如果你係豬扒愛好者，推介你一定要嚟試一試呢一間餐廳。

第一間食既元朗三大豬扒係「成記茶寮」，第二間就黎試「開心小叙」，呢間仲有分店，唔知質素會點。餐廳外面內部唔同「成記」，呢到係茶餐廳，不過真係人氣好旺，中午時間1、2點黎要拎飛等位，不過都唔算等左好耐。食物選擇呢到雖然係豬扒出名，但佢都係一間茶記，所以唔會只得豬扒食，不過我當然都係為左佢既豬扒過黎試，記得豬扒飯係11點後先供應。開心豬扒飯  $40飯類揀左一款之後都可以再係11款入面揀一款做雙拼，揀左拼雙蛋。醬汁有豉油汁、咖哩汁、沙嗲汁同黑椒汁揀，都係揀左豉油汁，咁先做到比較。雙蛋煎得都幾靚仔，不過就冇燶邊，豉油汁比我想像中少好多，基本上完全唔夠撈飯，豬扒偏薄身，但幾重香茅味，質感就正常茶餐廳質素，唔係鬆化軟熟既口感，但比平時食既冇咁韌，對比起「成記」，呢一間就冇咁驚艷到我，只可以話佢比一般茶餐廳色，但又未去到為之驚人。餐飲方面並唔包括，熱飲加$4，凍飲加$5，同「成記」收費一樣，兩者之下我當然會揀「成記」。食完3間元朗必食豬扒，黎緊會食第3間！暫時排名係：1.「成記茶寮」、2.「開心小叙」，第一間真係好有驚喜，而呢間其實都唔錯。

成日經過見到佢都係冇開門，今日終於有緣見到佢開門🤗跟住就食咗個豬扒回鍋肉飯，個豬扒飯真係好正真係冇嚟錯，雖然回鍋肉係罐頭回鍋肉，但係同件豬扒擺埋一齊真係好夾🤗🤗🤗

成日經過都見佢休息，今日返晏終於同波士試到哩間開心小敍！！！秘制豬扒好似出哂名，我鍾意煎蛋，就叫豬扒煎蛋飯跟杯茶走豬扒配煎蛋係一絕架波士食豬扒回鍋肉飯飲凍奶茶，我覺得回鍋肉好似五香肉丁，但波士話唔似喎但因為多人食，好似會趕人走咁就要扣分

豬扒漢堡飯餐 $45 招牌開心豬排飯就只係$40! 晏就黎都等左10分鐘到 因為小店行快餐路線 個個好快食完就有位 豬排於11點後供應 即叫即煎👅 上枱稍欠色水 排身偏薄 但肉質鬆軟👍🏼👍🏼 唔會食到好多油份🤤 最重要！記得落豉油！ 我覺得豉油暗藏黑豉油嘅味道😂 成件事又好食左！

元朗有幾間餐廳都好出名食豬扒飯，開心小敍係其中一間，亦係我最鍾意嘅一間～之前只有一間舖，星期六、日成日都好多人等要等好耐，宜家喺隔離開多間舖就好好多了！..我每次嚟都必定會叫豬扒雙蛋飯 $40佢嘅豬扒好大塊，煎得好香，肉質好淋好嫩，試過咁多隻汁都係配豉油最好食，我覺得夠晒味，但見好多食客都叫店員俾支豉油佢地自己落，好重口味，煎太陽蛋好正架，啲蛋汁撈埋豉油再撈飯食，好啱味！唯一美中不足係唔知點解啲飯成日都偏硬，可能係因為咁所以其他人要落豉油整濕啲掛，哈哈！

呢度嘅豬排飯我諗好多熟悉元朗區嘅朋友都知道。同老公每隔一排都會嚟呢度食豬排飯，呢日再重臨舊地依然令人回味！簡簡單單一碟太陽蛋豬排飯都絕對食得出呢間餐廳嘅誠意。首先個豬排煎得非常香，豬質juicy鬆嫩，容易咬開得嚟又有豬肉味而唔係似某些食店用梳打粉“乸”鬆嘅無味豬排。個甜豉油咸味同甜味嘅比例啱啱好，好味得嚟食左唔口乾，撈埋個太陽蛋的蛋黃汁一齊食，要成碟食晒真係一D都無難度！加埋杯熱奶茶都只係$44, 真係又好味又抵食！