香港腸粉皇 (已結業)

今天到土瓜環，因為要等太太係工X會落堂，就係附近覓食。太太話，黎到「舊區」，當然要食小店，周維行下行下，見度唔少既小店，食客人數=0，好擔心中伏，加上太太話落堂想食野（輕食類），見到呢間腸粉皇，入面人唔多，不過都每桌一客人，疫情嚴重，已經係「好多人」啦！上黎Open Rice 睇下comments，9X%都係OK~Good，就入去坐低。叫左蒸羅白糕、薑汁豬膶腸、例湯（老王瓜）。先黎羅白糕，咬口好好，足料，層次分明的糕及粗條羅白絲，明顯係手打，正。腸粉好順滑，皮薄餡靚，豬膶剛剛熟，與薑汁完美結合，正正。老王瓜湯，好正宗，足類，連湯骨都唔使落鼓油都有味，渣都俾我食晒。雖一美中不足，係個腸粉同羅白糕既份量都比其他店細左啲，我食唔包！不過唔緊要，等陣帶埋老婆黎，再食過！（註：我埋單果時，成間鋪坐滿客，仲要坐埋出外面果張「熱狗」枱！）

香港腸粉皇土瓜灣係比平有舊居情懷既地方！所以都會係到發現到唔少既小店！突然想食腸粉就入左黎坐低！環境係小店家既情懷feel!都好多街坊黎買下粥！😽梅菜腩肉腸（$21)😺蜜汁叉燒腸（$21）腸粉滑脫脫！蒸起身熱辣辣！叉燒半肥瘦岩岩好！😻而梅菜腩肉就比較新既嘗試黎！😼咸咸地原來都唔會好突兀😸😺煎蘿蔔糕（$16）絲絲既蘿蔔兩邊都煎到好香脆😋😋都有細個去酒樓飲茶既感覺呀！支持下小店家先😻

想食個豐富嘅早餐，黎呢間應該會好滿足。佢啲腸粉真係好好味😋！我試過粟米帶子腸，翠玉瓜雜菌腸仲有蒸蘿蔔糕、粥呢我本身嘛嘛哋所以先無食。我之前都試過用膠盒去買外賣，佢都好nice。照放得好好。如果鐘意食腸粉的朋友們，真係要來試試！十分推介！其實我覺得好味除左佢腸粉嘅皮又唔太厚、又滑又有少少彈牙，仲有個精粹就係佢嘅甜豉油，我估係佢哋自己整嘅，唔會太喊搶曬啲腸粉嘅原味，又帶點甜嘅味道！腸粉與甜豉油是最好嘅拍檔呢！🥰

一個唔愛食粥嘅小編都表示依間真係無得輸🤤👍🏻一般出面粥舖食落都係好稀，水水咁，料又少，但依間完全唔會！「皮蛋瘦肉粥」皮蛋起碼有成6-7舊，舊舊都大大舊，而且碗粥入面有滿滿瘦肉，肉質唔鞋，最重要粥底係十分綿滑，見到係一粒粒米煲出嚟，好濃稠，好足料。食完唔夠喉，想再encore🤣🤤🤤「蒸蘿蔔糕」食落好綿，面頭佈滿蝦乾、蔥花，蘿蔔味濃。「叉燒腸粉」啲叉燒多到凸晒出嚟🤣腸粉皮唔算話好薄，但食落煙韌。

菜乾咸鴨腎豬骨粥豬骨幾新鮮，粥味不錯但比較咸是有味粥品，咸味應該是來自腌製技巧，食後必須多渴水。今時今日，淡味老火粥底而家好難搵到，要煮到又棉又有粥味，柴火就不能缺少，功夫又多，成本又貴，冇乜人做了。即拉叉燒腸粉腸粉是呢度嘅皇牌！所有腸粉都是即拉的，條條腸粉都滑啫啫，皮薄餡靚，餡料均勻。只要加小小醬油，美味非常。本人最愛叉燒，大大塊，豉油又多，腸粉皮又正！排骨飯排骨太多味精，使蒸飯冇咁好食，食完又要勁飲水！真係唔係咁健康。

夜晚黎到土瓜灣學野，因為唔係太肚餓，所以諗住小小地食個腸粉做晚餐。依度係傳統小食店咁，坐得唔算舒服，但都夠涼，乾乾淨淨。 基本上可以叫腸粉，蘿蔔糕，蒸飯同粥依幾樣。首先叫蒽花蝦米腸。份量好多，一個人食哂都飽了，我食淨左好多。味道一般般，腸粉唔係特別薄，也唔係特別香。落埋豉油都有啲淡口。仲叫左煎蘿蔔糕，依個幾有誠意。入面有一舊舊蘿蔔絲的，唔係全部都係粉。佢都有心煎，煎到好香脆嘅。我覺得依個反而仲好食過個腸粉。一個人食腸粉加蘿蔔糕太飽了，女仔黎講一個人建議叫是但一樣再加湯就差唔多。

難得一見好味又經濟的手拉腸粉，對於腸粉迷的我來說這裡可以說是每次來土瓜灣都必來的地方。腸粉皮好煙韌，口感好好，加上即叫即整，每碟上來都係熱啦啦，今次叫了牛肉同叉燒腸，兩種都好好味，餡料好入味！

腸粉皇夜晚6pm喺土瓜灣，收工早d食晚飯。喺土瓜灣其實都幾多好野食ar！上網睇依間幾多好評，於是就入去試下。叫左2樣野，腸粉皇就梗係要幫襯佢d腸粉，於是揀左豬潤腸，睇下做得好唔好食。另外又叫左排骨飯，因為怕唔飽。埋單好似$45左右，而腸粉應該係$20。腸粉，滿有期望，點知唔合格，只有失望，腸粉一夾就散，時間掌握得唔好。豬潤的確唔錯，算大件，又有適中的薑味，不過腸粉質地太差，成件事唔同晒。排骨飯，咪叫。排骨冇肉味，鳳爪可以，$25堂食，冇得要求咁多。豉油係可以自己落，可以落腸粉、落蒸飯。唔會再幫襯，唔係好差但係唔係特別好，況且附近有其他好多嘢食。

呢日約咗人喺土瓜灣譚公道， 見肚餓就走咗入呢間香港腸粉皇，諗住簡簡單單食一餐。叫咗個薑汁豬潤腸 ($20)、發財蠔豉豬骨粥 ($19) 、臘味蘿蔔蒸糕 ($15)及營養豆漿 ($7)。薑汁豬膶腸，豬潤嫩滑，腸粉腍滑，中間仲加左少少薑絲，味道唔錯。發菜蠔豉豬骨粥，蠔豉及髮菜都係碎上，食得出蠔豉係一般般貨色，不過呢個價錢，亦算抵食。臘味蘿蔔蒸糕，有蝦米、臘腸粒，及一絲絲嘅蘿蔔條。味道清清地，唔錯。營養豆漿，枝裝貨式，都幾有豆味，算係好抵飲。總括嚟講，都係一間用心經營嘅小店，值得多多支持！

看到YouTuber介紹土瓜灣掃街美食 香港腸粉皇是其中之一 甚少踏足土瓜灣的我 今天就來試試這個很多人Like的腸粉店這店除了賣腸粉 還有各種粥和蒸飯 看到每枱都有點粥和蒸飯 相信是不錯的 但我的主打還是腸粉鮮味牛肉腸 $20腸粉很滑 粉皮厚度適中 腸粉有米香 🐂餡料是淨牛肉 牛肉量滿滿的 差不多要逼爆粉皮 牛肉醃得很入味 肉質又滑又嫩🐂枱上有甜豉油和甜醬 想落幾多就幾多總結: 這是腸粉遠勝連鎖酒樓和點心專門店的腸粉 性價比超高 十分推薦 下次再來我會試它的薑汁豬潤腸粉

這間懷舊小店真的臥虎藏龍，有好多出名又好食足料既腸粉、豬骨粥、各式蒸飯見到都流晒口水。樣樣都想食呀！新鮮豆漿味濃粟米帶子腸粉軟滑香甜熱辣辣。帶子粟米有咬口好味又超值。

這裡開了已經大約有十幾年，除了腸粉之外，還有蘿蔔糕、例湯、原盅蒸飯。我推介我經常吃的叉燒腸和滑雞飯。叉燒腸皮薄又滑，叉燒切了一粒粒，加上自家製醬油就更加好味。滑雞飯，雞肉嫩滑，別看小小一盅，夠吃飽一個女生的，我就喜歡加些醬油，增加些醎味。

黃氏力場今日到歷史悠久的香港想安心，因為個胃有啲唔舒服所以食啲清腸胃的食物，食粥是中國人的傳統智慧吧！再加件腸粉簡直係天下無敵啦！講番佢主打腸粉皮薄餡靚， 用料十足 。如果鍾意食腸粉嘅人，可以黎呢到食下再同其他香港腸粉皇比拼。

自從渡船角兩間即拉腸粉執咗之後，一直都搵唔到一間似樣嘅腸粉店！今晚誤打誤撞終於俾我搵到喇...因為大雨，收工後去附近嘅土瓜灣覓食，見到街邊有個「布拉腸粉」嘅二拉架，但店面較細較市井。太肚餓又想輕食，所以決定一試。見到餐牌真係好有期待，除咗入面有晒以前好鍾意食嘅豬潤腸、梅茶豬肉腸，仲有翠瓜雜菌呢樣比較少食，而且價錢唔貴，一碟都係$20左右！淨係食腸粉當然唔夠啦，自從北角旺記執笠之後，好耐都冇食過有水準嘅菜乾粥，難得呢度都有，梗係要嗌碗試下啦；仲叫埋好多人都讚嘅蒸蘿蔔糕，唔理啦，由原本打算輕食變咗都叫咗唔少...粥同蘿蔔糕都好快到，一入口，搵返久別重逢嘅味道！菜乾粥好入味，好夠火喉，粥地好綿，好香好食！至於蒸蘿蔔糕亦好有水準，我比較鍾意食實淨少少，所以好啱口味！主角腸粉等咗10分鐘登場，似乎真係即刻拉。個粉皮望落冇以前渡船角咁薄，但食落口都好滑，豬潤夠味又熱辣辣，我都俾好高分！梅菜腩肉腸亦唔遜色，豬肉唔算好肥，料亦足，我覺得整體水準有85分！

小店食物好味，好懷舊，但入面既亞姐既服務態度只能用恐佈嚟形容，喂！大佬我而家係嚟消費，唔係嚟乞你，加下野食又黑面，問下今日例湯係乜又指下個牌，講真呀！見到又駛鬼問你咩，如果咁樣趕客法，唔知可以頂到幾耐呀🤔