666泰船麵 (仁愛街) (已結業)

Lunchtime 頭痕緊食咩好既時間，就亂行，見到間泰國野有我想食既海南雞於是就決定入去。睇價錢覺得都好似幾抵食咁我點左B1 泰式海南雞飯（細）30蚊仲有D1 花膠椰子燉雞湯$25H10. 泰國蝶豆花特調 （連飯餐叫飲品就半價）D1. 花膠椰子湯燉雞 個湯椰子味好出，搭配左木耳味，好暖胃又好飲叫左細份既海南雞飯 份量比較少，但勝在雞肉軟滑H10. 泰國蝶豆花特調口感都清新

一個人點了一碗泰式扎肉雞絲金邊粉，配料份量十足，有扎肉、雞絲、通菜、芽菜、瓜粒和炸豬皮。湯很濃，應該是認真熬製的，喝了湯沒飲其他飲料也不會口渴。吃到中段才吃炸豬皮，半淋半脆又帶香，令碗粉帶來另一層次。不過個金邊粉略為糊一點，一餅餅咁，有點難夾，但整體都好滿足。店內不停播放90年代K歌，很易暴露年齢🤣🤣聽住歌食麵確實爽！

因為有個折扣卷咪去試一試泰國船河，記得有次係沙田食，個碗好一般又小嘅船河賣成128。咁呢間本身都唔貴仲有拆扣咪試下囉，入到去有個螢幕，好似以前飲酒有得solo唱歌咁嘅地方，仲播陳奕迅歌仔，啱我聽。我仲有叫埋花膠椰子雞湯，一唻到碗麵嘅湯色都幾濃下，而且材料都唔算小。牛肉船金邊粉個碗係有肥牛，牛腩，牛丸。豬肉船金邊粉就有豬肉，豬肚，豬肉丸。而且佢有d芽菜都係用番泰國肥嘟嘟嗰款。其實以咁嘅價錢都食得過，而個雞湯當然唔會比花膠你，但佢都有幾粒似魚唇有膠質嘅嘢。又係幾濃味，個湯都好夠熱。湯嘅味道就ookk咁。

曾路經此店門口好多人等位，故趁今天元旦我同老公去試下一次，入到店內環境似卡拉ok格局，大電視不停播放MV，不太配合船麵個主題🤭點了一個泰式炸蝦餅，一個泰雞翼金邊粉(細)，一個牛肉金邊粉(細)，一杯熱柚子蜜，一杯咸檸七，先講個味道先，個雞翼湯底真的好好味，雞翼又脆，個牛肉粉係牛腩咁，好淋好入味，湯底吾駛講"掂"👍個蝦餅又夠脆good，雖然我地叫的粉是細碗，望見好似好少又細碗，但食完再吃埋個小食同飲品剛剛好，飽晒😁下次再試下海南雞飯同魚餅

👣666泰船麵新蒲崗仁愛街48號地舖🙈有冇人都有呢個癖好，每次去旅行前都會係香港食當地美食，黎緊聖誕我就會去泰國啦，就係要臨出發比較下當地美食，同香港食到既味道有無分別😂🔸泰雞翼金邊粉 （細$26 /正常$40）呢個湯底超濃郁，飲得出係煲左好耐既精華湯底，餐廳都有講解湯底係秘製醬汁加豬骨藥材煮8小時而成，健康滋補，我好鍾意泰國脆卜卜配料，唔使剩係食麵咁dry，口感豐富，飲一啖甜湯加一啖麵，好好味😋雞翼煎得好香脆，醃得好入味！ 佢細size 2隻雞翼，正常size 3隻，淺嚐細麵可以叫多幾款小食😆🔸自家製泰式奶茶 $20（叫麵配半價$10）我超鍾意飲泰式奶茶，茶香奶甜，最岩重口味既我，呢個自家製奶茶略嫌遜色，缺左茶香而且無鍊奶甜味，差dd🤟環境都幾有特色，雖然泰式餐廳但播台灣歌，仲要係karaoke 版😂，不過都好叫做有歌聽，整體性價比高，會令我想返黎試下其他菜式😎食物好味度：6.5/10回頭率：7/10🤭今次食唔多，船麵令我好奇想試下其他泰美食

之前叫外賣試過一次呢間泰國野，幾低食同埋都好好味，今次就直頭落鋪食，味道都係吾錯，而且幾有特色。平日夜晚去，都幾多人，但好好彩吾洗等位，但預左要搭枱，因為2人座位吾多。點解我會再食呢間野呢，因為真係好低食，個價錢無得輸，一份烤魚都係幾十蚊，小食，蝦餅，生蝦個d都係幾十蚊，咁當然，份量就吾會咁多，但都吾差既。今次就叫左黑松露海南雞飯，蝦餅，牛肉船面，海南雞飯有黑松露，幾特別，d雞就吾夠滑，個飯雖然黑松露炒但就吾夠香，而蝦餅都ok既，即炸，夠熱，足料，吾會好厚粉，船面多料，夠濃，味道吾錯。最後，最大既問題係個環境。一入去既時候已經好大聲咁播緊歌，仲好大個mon播緊mv，十足十入左k房咁，都算啦。有一枱客生日，全部都幾十歲姐姐，大大聲講野，好似全場都要幫你慶祝咁，想靜靜地食餐飯都吾得，講野都聽吾到，愈食愈燥，而且杯飲品係有果肉個d，比支普通飲管，仲要紙造既，啜到爛晒，叫換支飲管，話啜吾到，佢換支一模一樣既，吹到啤一聲，飲淨一半，拿拿聲走。一出門口，靜到~夜晚都有雀仔叫……

唔係第一次食，但之前兩次都係食船麵，菜材味足，湯底夠濃，配埋雞腎，去骨爪同雞絲，加埋個三分煙韌嘅麵，唔同口感，一流。不過今次嚟同同事就食咗新嘢，佢哋個個都食雞飯，我叫咗雞麵。同事啲飯個個都係髀位，我心諗正啦，點知送到嚟我嗰碗係勁大塊雞胸，即刻sad咗，我真係好唔鍾意見到咁大塊乾肉，算啦唔好浪費食物，我食咗一兩啖麵之後就開始食雞胸。先講個湯，非常淡，話係椰汁雞湯，應該係椰子水，透明嗰隻🙃⋯⋯舊雞胸出乎意料地Juicy，唔鞋，加上個湯夠淡，仲食到雞味。不過我最後都有攞去點海南雞個醬，味道正常。另外提一提，調味架有個辣椒醋，值得一試，同埋，666船麵都係食返船麵好啲，除非你想清淡，咁你就要試上面嗰隻麵😂。

經eatigo 訂座有優惠前後來過三次，個人感覺可以。可以是包括價錢和質素，在新蒲崗這個茶記雲集的地方殺出血路難，希望老闆可以撐住。食物方面，咖喱比船麵優勝，是次點了小份青咖喱牛腩飯， 小份很重要，對女生來說肉和飯永遠太多。牛有牛味，但稍微過硬，個人更喜歡上次點的咖喱豬扒，香煎豬扒配咖喱汁好惹味。另一推介是椰子雞湯，食店標榜無味精，喝完無口乾，應該真的。埋單約$75，已包湯+飯+菜，比茶記價位高一點但環境好一點，老闆又不趕客，值得捧場。

叫咗豬肉船金邊粉、牛肉船金邊粉、蝦餅同泰式餃子。先講金邊粉糊在一起（簡單講就係Lam pat pat）、豬肉就厚實、炸豬皮就似橡筋（可能香港潮濕佢儲存不當）、牛肉硬其他就不過不失甘囉！本人黎講就唔會有第二次甘囉；）

經過新蒲崗，見有新開泰菜餐廳，支持本土小店，試試先。我們點了豬扒金邊粉，咖哩牛腩飯，煎餃子。金邊粉和咖喱飯，都分細和正常size, 很適合細食的女士們。金邊粉用料豐富，好吃😋咖喱飯不辣，牛腩淋餃子如果再煎燶d更好

食物(推薦：海南雞飯&咖哩牛腩飯)性價比超級高！海南雞飯：飯油香濃, 有嚼勁！雞滑和有雞味服務態度一流以及非常有禮貌環境很有特色(設置了四個不同主題及背景)地方坐得很舒服以及很乾淨！最欣賞的是有一個很大的電視屏幕看電視！另外一定要說的就是價錢方面：主菜都是在45-60之間(晚餐)，所以兩個主菜加一個小食都是120可以埋單，非常適合情侶以及街坊去吃！如果是男女朋友去那兒拍拖吃飯真的是無敵！背景系打卡勝地。