King's & Queen's 冰室 (已結業)

去開呢間食下午茶 開頭覺得佢好有驚喜 尤其係佢個吉列雞扒包 好惹味 總括來講下午茶都好抵食但最近去呢兩三次 發現佢嘅食物質素大大下降 唔單止所有食物都細分左一半 最差嘅係佢哋嘅服務態度都劣質咗好多 尤其係一個男嘅樓面 成日面黑黑態度又差 又無禮貌 佢自己落咗單 反而話我哋自己叫錯上次去我哋叫咗兩份食開嘅吉列雞扒包 我哋都知不嬲都唔跟薯條或者沙律 但係上次呢個男嘅樓面佢無端端問我哋想要薯條定沙律 我哋以為Menu改咗 我哋就話薯條啦 跟住嚟到原來佢落錯單 幫我哋落咗吉列雞扒跟薯條 但係唔係包 叫佢改返 就黑面話係我哋自己叫錯 佢冇聽錯。另外我哋都叫咗豬扒炒仔麵 越嚟越細份 上次叫上碟得半碟 之前凍檸茶大大杯 依家就變咗得一半 最近一次連比較食得下嘅吉列雞扒包都話唔再做 ⋯想點？佢哋開始有誠意 質素真係唔錯 但近年有少少生意就開始諗縮數 又請埋啲態度差嘅樓面 點解硬係持續唔到質素？

睇Review全部清一色話好好食，又話有鑊氣又點，點知勁失望…… 首先瑤柱蛋白炒飯已經好少見到有其他地方可以叫所以諗住試吓，點知得個咸字勁重味精味，重點係啲飯黐埋一舊舊好大舊，個質地又軟又黏，有少少似糯米飯嗰種質地，完全唔似平常炒到乾身嘅炒飯。見啲人話咕嚕肉好好食個外皮又脆又點，點知皮係淋嘅但呢個預咗，重點係唔知咩肉超un超乾，得一舊比較似平常嘅咕嚕肉，其他係柴到咬唔開吞唔落全部都係渣…… 其他餸都係得MSG味，唔係唔用得，係用嘅份量太多好鹹同埋完全食唔到有其他層次嘅味道所以勁失望。已經唔係繁忙時間叫都咁差，唔知係平時個師傅冇返工定係點，完全唔係大家講到嗰回事，平時好少寫食評但係今次真係唔係好掂，而且食評太一面倒。🫥

踩單車到泥涌，想食下午茶但又不想太heavy，搵到呢間相對低調，但內部裝修又幾有格調嘅餐廳。 點了流心西多及豬扒包，在鄉郊地方，四十蚊左右嘅價錢尚算合理，而且兩者皆有驚喜。落了糖漿，西多的甜味十分平衡，連流心奶黃食落幾有層次。豬扒包有兩層薄豬扒，口感不錯，如果多點千島醬對沖咸味則更佳。 檸茶茶底不鞋口，叫少甜飲落更為清新，出一身汗之後飲真係好爽。如怕熱，可到室內嘆住冷氣食T，牆紙是南歐風景。如想享受陽光，亦可在室外露天茶座，方便貼住架單車。

原來在西貢泥涌附近村屋隱藏左間小冰室，主要中式小菜，第一次來試試，估唔到真係咁有驚喜。咕嚕肉酸酸甜甜，重點係夠鑊氣得黎，汁上得非常均勻，而咕嚕肉仲脆脆的！驚艷煎蠔餅足料，啖啖蠔，不過略嫌個粉漿有少少厚不過喺堂食係超級超級脆口。炸子雞皮脆肉滑，驚喜！蔥爆牛肉 鑊氣火喉超夠爆，牛肉大大件，抵食！粟米魚肚羹亦都足料 大大碗，啖啖粟米&魚肚！第一次幫襯，食過返尋味，一定會再回頭！重點重點係性價比超高，價錢親民又好味！不過可能太多人幫襯，上菜小小慢，預留多啲時間來慢慢品嘗！

🇭🇰Hong KongAverage expense pp: HKD$200-300+📍Address: King’s & Queen restaurant呢間餐廳位於美食沙漠附近，但係素質相當好。如果你同屋企人遊車河/周末經過，最適合黎放鬆一下。令人喜出望外嘅係，佢每一道菜都好有鑊氣，好似食緊酒樓既小炒😍😍如果你地去，我會推介你地一定要點呢幾樣食～1. 紅燒乳鴿2. 椒鹽九肚魚3. 薑蔥霸王雞4. 燒汁雜菌牛仔骨5. 馬拉盞通菜鮮魷紅燒乳鴿好嫩滑，外皮香脆，非常香口。到椒鹽九肚魚，炸到金黃色上枱，入面嘅九肚魚仲係超級滑又多汁，超級難得可以做到咁好，呢道菜好出色。薑蔥霸王雞，我相信唔係用雪雞而係用新鮮雞，用薑蔥同醬油調味非常入味，一大隻份量非常多！ 燒汁雜菌牛仔骨同埋馬拉盞通菜鮮魷又係另一非常有鑊氣之作，尤其是鮮魷，采用新鮮嘅鮮魷，值得一試！另外，馬拉盞有少少微辣，如果怕辣嘅話，可以點腐乳/蝦醬/蒜蓉。另外，如果你好似我地咁大胃口，想點多幾碟菜，可以點佢地魚香茄子煲同埋瑤柱蛋白炒飯試吓！魚香茄子煲都幾送飯，瑤柱蛋白炒飯有一絲絲瑤柱，飯炒至非常乾身，大約一碟已經夠2-3人份量！

King’s & Queen’s冰室係位處泥涌，係烏溪沙站行過去大約10分鐘左右，或者可以係新港城轉搭99號巴士，餐廳裡面都有唔少打咭位，最吸引係對天使翼，另外仲有其他𤩹畫都好吸引。蜆芥爆豬潤 $79豬潤厚切，食落爽口彈牙，非常新鮮，再加上蜆芥醬一齊爆香，好入味，好好食。黃金鮮魷 $98黃金魷魚外皮炸得好鬆脆，咸蛋黃沾上外皮好均勻，味道唔會太咸，再加上咸蛋黃係舌頭上面溶化，非常好味。淮香炸子雞(半隻) $108炸子雞炸到外皮好脆，食落卜卜聲，另外會有一碗椒鹽，不過原本炸子雞都好夠味道。金牌紅燒乳鴿 $58乳鴿肉質嫩滑，外皮香脆，睇落細細隻但都好多肉，而且一啲都唔肥。味道之前已經醃好，唔洗加椒鹽都夠味。黃金蝦球 $98因為黃金魷魚太好味，忍唔住要再叫埋黃金蝦球，同樣做得出色，蝦球好大粒同好彈牙。蒜香通菜牛肉 $88通菜好嫩一啲都唔老，同蒜蓉一齊炒，連埋牛肉都入哂味，而牛肉一啲都唔靭。凍檸茶 $18茶底做得好好，好濃茶味

朋友推介西沙有間餐廳食小菜非常得，標榜材料新鮮冇味精，於是來試試。餐廳外有幾個泊車位，可以選擇露天茶座或餐廳室內用膳，見到餐廳內有幾個很特別牆壁，於是坐在餐廳內。我哋叫咗兩杯鹹檸七及幾道小菜。黃金鮮魷，炸得香脆，外層沾滿了鹹蛋黃，味道香濃，非常惹味，鮮魷魚也很新鮮彈牙；西沙小炒皇，侍應未放在枱面上已經聞到鑊氣味道，份量好大，韭菜沒有草青味，香嫩鮮甜無渣，鹹鹹香香，食唔停口；炸乳鴿即叫即炸，外皮香脆、肉質新鮮嫩滑，沒有雪藏味道。食到最後完全唔覺得口渴，果然冇味精，而且材料新鮮，這間餐廳可以encore！

今天再去這個餐廳，因為很懷念這裏的燒乳鴿及小炒。還有朋友介紹這裏有一個新的酸辣茄子， 份量十分大又可口，所以特意來一試。急不及待叫了燒乳鴿及這裡有名的霸王雞及砂薑雞。雞仍是十分好味，，砂薑味突出，看似用上新鮮的砂薑，味道特別鮮香，也不會過鹹。這兩款雞真的十分好吃，真的想一試再試，乳鴿的水準也保持一樣，外脆內軟，內有肉汁， 十分可口抵食，相比一般茶樓的價錢，這裏的乳鴿真的是大件夾抵食喎。另外叫了一些小炒： 班球炒西芹，咕嚕肉，兩款也是上乘之選，比一般茶餐廳有鑊氣，份量也大。另外叫了黑松露炒飯，這裏有一些黑松露系列，今次試試炒飯，黑松露味洋溢，炒飯粒粒分明，10分可口！不太油膩，是推薦之選！最後一定要說說朋友介紹的酸辣茄子，以鐵板上枱，上枱時有渣渣的聲音，令人垂涎欲滴。茄子全部也是包着脆漿炸過，上頭淋上酸辣汁，味道有點像咕嚕肉的汁，配上香炸的茄子！茄子外脆內軟，配上酸甜的汁，能把油膩的感覺減去，這個配搭真的10分配合，是驚喜之作，而且份量10分大，一班朋友來暢快大口吃，真的不錯喔！

西沙茶座聽得多，其實附近都有其他嘢食，呢間King’s & Queen‘s 冰室位於西沙公路泥涌石灘附近，駕車或搭巴士/小巴都可輕鬆到達。冰室室內環境不算很大，但看得出老闆很用心佈置，有很多不同的主題畫，還有希臘異國的風情。室外有很大片的露天茶座座位，可遠眺泥涌景色。如果天氣好又唔怕熱，坐出邊都感覺很爽，不過今晚我哋就選擇室內。冰室主打家常特色小菜，今次點了以下的餸菜：粟米魚肚羮($88)，味道鮮甜，份量很大窩，足夠4-6人份量。 黃金蝦球($98)，蝦球香脆可口，皮脆肉嫩。啫啫滑雞煲($68)，熱烘烘煲仔菜，雞肉嫩滑。黑松露醬炒西芹蝦球($108)，黑松露清香，西芹清新爽脆，蝦球爽口。蝦醬通菜牛肉($88)，蝦醬味香濃，通菜及牛肉爽滑。冰室提供各式汽水及奶茶、檸茶/水，可供選擇。如果有多啲特色飲品就更加好了。另外此店採用日本高質素食鹽，餸菜全部走味精，令大家食得健康放心。

今次去到馬鞍山玩 經過西沙路去左呢間冰室醫肚餐廳有室外有室內 食個日有啲涼 坐室外都相當舒服不過如果夏天我就可能唔會坐室外🙈餐廳標榜靚鹽走味精🤘🏻叫左幾樣野食，份量十足🐣南乳碎雞件唔使點南乳醬已經好夠味👍🏻🐽椒鹽肉排好惹味，個肉排都仲好juicy 不過就咁食鹹咗啲送飯就一流😋😋🦐黃金蝦球好香鹹蛋黃味 好有驚喜嘅一碟朋友麻麻地鹹蛋黃都表示呢碟好好味🦪潮式煎蠔餅蠔餅外脆內軟丶用料十足。啲蠔又新鮮丶冇沙冇殼碎，唯一係邊位有少少硬。整體蠔餅好好味又夠大份，$88來講抵到爛，🐂黑松露醬牛粒炒飯 略嫌唔夠黑松露味～不過都好夠鑊氣🥬馬拉盞通菜牛肉習慣咗點都要叫碟菜～正常發揮～唔會太咸下次踩單車經過西沙路又可以再黎食👍🏻

家住馬鞍山烏溪沙超過十年，一直已習慣了「美食沙漠」，最近誤打誤撞去左呢間冰室，發現原來係一間「美食秘竇」。先講交通，佢位於西沙路。但最近西沙路好多工程，要留意轉入路口。我就係咁誤打誤撞揾到的。佢有約八個車位，游車河至合適。至於食物，對我來講簡直係喜出望外。你唔好以為佢叫冰室就得小食，佢地個厨房超有鑊氣。今晚我地叫左6道菜，佢招牌炸子鷄當然要點。外皮脆卜卜，肉地好滑嫰。黃金蝦球，外皮有咸旦黃，好香!內面D蝦肉好爽口。佢地有個椒鹽系列，我就揀左至愛的椒鹽鮮魷。好大碟!外酥內爽。口感十足!推介!潮州蠔餅十分足料，D蠔好大隻又好滑口，但餅漿就好酥脆。點D魚露好惹味。以上三樣我叫為送酒3兄弟。配合啤酒真係冇得輸!本人乃豬潤控，見到佢有蜆芥豬潤當然吾會放過。不得不讚廚師手勢好，D豬潤爆得好入味但又吾會太老，入口爽爽聲。瞬間已清碟。食到呢度本來巳經好够喉，但見佢有個鐵板系列，好想試。就叫左個鐵板茄子，冇諗到甘大份咁澎湃，成座小山咁。肉碎味道酸甜酸甜，好適合小朋友食。茄子先用脆漿炸過，外脆內淋。食完真係要捧住個肚。每碟都係七十幾八十蚊，至够一百鬆D，但好大碟又好食，好抵!但有得免費泊車!以後呢度就是我

屯馬綫通左之後，第一次黎馬鞍山呢邊，真係近左好多，可以多啲過黎食野，King's & Queen's 冰室 ，可以坐室內，又可以係出面露天雅座，食住嘢坐出面，又有燒烤場既Feel👍，泊車又方便，又可以打卡✨呢間好早就開，早上7:30就有早餐食，附近地區都發展緊，啱晒黎食個嘢，夠晒近，嘢食又有水準！🏖 鮑汁鴨舌 $ 58 鮑汁味濃，鴨舌炆至軟綿，好入味。🏝粟米魚肚羹 $88呢個湯羹，鮮甜之餘加左魚肚，口感豐富，滑爽稠黏，不過份量都幾多，適合3-4人。✨黃金蝦球 $98蝦肉爽滑彈牙，鹹蛋黃味道香濃，越食越香。🥇紅燒乳鴿 $ 58表皮燒到卜卜脆，脆得黎唔會乾，滲透住油脂，配有椒鹽，不過唔加已經夠味，✨淮香炸子雞 $半隻108 全隻$208賣相幾好，雞肉炸到外脆內嫩滑，味道拿捏得好，唔會越食越鹹，✨腐乳通菜炒鮮魷炒得有鑊氣之餘，鮮魷唔會過火導致韌，仲係好爽滑，有口感，通菜爽脆可口，加埋腐乳既鹹香，椒絲既微辣，配飯一流🥰菜式全部都係用日本高質食鹽煮，唔用味精，食得健康😋

今日去左西貢玩左一日，晚餐揸車去西沙公路搵食，見呢間冰客都幾多客，就決定係度食。冰室好寬敞，可以坐室外/室內，室內裝修好有心思，有壁畫又可以打卡。而家天氣咁涼，坐室外都一樣舒服。呢度老闆娘好親切好有禮貌。原來呢度啲野食全部無加味精，仲用日本食鹽烹調。我仲偷聽到，如果想食海鮮，可以預早同店主講，店主會當日先準備食材保証新鮮。 我地都幾肚餓，所以叫多幾樣餸。先食小食鮑汁鴨舌，忟得入味，入口即溶。黃金蝦球，陣陣鹹蛋香配新鮮蝦，無得輸，必食。椒鹽鮮魷，皮薄，魷魚新鮮彈牙。涼瓜菜圃肉碎煎蛋角，我其實我唔食涼瓜, 怕苦，但見有推介話唔苦就試下。又真係唔苦，配埋菜圃肉碎，口感豐富。 西蘭花炒肉片，嘩，好多肉片，炒得好有獲氣。欖菜四季豆，好惹味，我至愛。乳鴿，皮脆肉嫩。炸子雞，好香口，送飯一流。呢餐一家人都好滿意，過左一個寫意既晚上，可以再來食飯。

今日入馬鞍山行街，行到晏少少先去搵地方晚餐，發現好多餐廳都要等位，朋友就介紹不如去泥涌西沙嗰頭食，聽落以為幾遠吓，原來搭小巴10分鐘左右就到，揸車都唔駛擔心，因為外面有位泊車。我哋揀咗間叫【King’s & Queen’s 冰室】，係食港式小炒嘅，餐廳標榜唔落味精，鹽係用日本高質素質業食鹽，夠健康。【西湖牛肉羹】勁大碗夠4人飲，我哋成餐喺度不停咁飲。牛肉、豆腐粒都好多好足料。【黑松露醬滑蛋蝦球】黑松露味道啱啱好唔會過濃，同蛋香完美配合，仲有香蔥芫茜提味。蝦球就勁大粒好新鮮爽口。【海味雜菜煲】啲餸多到差不多滿瀉。魷魚、蝦米、冬菇配爽口粉絲，雜菜有西蘭花、菜心、白菜仔、紅蘿蔔同茶樹菇。我哋兩個人叫咗兩餸一羹都食到好飽，咁抵食，難怪餐廳雖然唔喺巿區但都坐滿啦。

King's & Queen's 冰室 (馬鞍山).男朋友住馬鞍山，話泥涌有間好食又平價嘅餐廳，Happy Friday帶我黎食！食到我捧住個肚，好好食食完完全唔會口渴！.▪️鮑汁鴨舌▪️.先來個小食，個汁好好味鴨舌超入味，暴風速度食完😛.▪️蠔仔粥▪️.呢個真係推薦大家必食推介!!! $64咁大碗蠔仔粥，蠔仔🦪海量不在話下，粥又多個湯又好飲👍🏻😋.▪️黃金蝦球▪.炸得金黃色，酥炸外層連埋鹹蛋黃炸蝦球，蝦好爽，入口有鹹蛋香脆卜卜好香口😋.▪️紅燒乳鴿▪.即叫即炸乳鴿勁熱辣辣，皮薄夠脆一口肉汁爆出.▪️薑蔥霸王雞▪.呢到嘅雞好似係招牌之一，佢有炸子雞霸王雞同沙薑雞等，霸王雞充滿葱蒜係面，雞件唔肥雞皮滑，個豉油似蒸魚豉油味.▪️腐乳通菜牛肉▪️.叫左咁多野食緊係要叫番個菜食，通菜索曬腐乳汁，牛肉嫩口唔韌.📌 King's & Queen's 冰室 (馬鞍山)馬鞍山西沙公路533號泥涌村地下環境：⭐️⭐️⭐️⭐️⭐️味道：⭐️⭐️⭐️⭐️⭐️服務：⭐️⭐️⭐️⭐️⭐️價錢：⭐️⭐️⭐️⭐️⭐️