影片
更多
2014-08-04
974 瀏覽
小弟雖然自詡為「山區麵包王」，實際就只不過喺嘩眾取寵虛銜一個。晌小弟嘅飲食朋友中，有個「同學仔」雖然無寫食評，亦唔寫網誌，相識源於麵包習實班中，但比小弟更懂飲食，喜歡做包，更喜歡食包。今晚，虛銜「麵包王」遇上真正「麵包狂」，走到半山Eric Kayser，食餐名正言順、無花無假嘅全「包」宴。雖然Eric Kayser以麵包為主，但店內嘅產品都幾多元化，範圍廣泛，法式麵包當然喺手本嘢，仲有其他歐陸包、甜酥麵包、鹹甜小食、沙律、餐湯、招牌麵包三文治、法式甜點，飲品有咖啡、茶、果汁等等，而最吸引當然喺一列3層嘅麵包架，擺滿各式各樣嘅麵包，走一轉望一望，聞一聞，一室麵包香氣。每朝除有早餐供應外（7:30am-11:00am），下午茶時段更提供果撻套餐及高茶套餐，至於週六、日，更有Brunch供應（10:30am-3:00pm）。順帶都講一講環境，依間分店仍繼續走Bakery Cafe路線，地方唔算大，十零個座位，全部都喺高腳枱櫈。雖然唔多好坐，不過，食吓輕食、蛋糕、甜點，唔打算坐得耐嘅話，都無乜所謂。今趟目標一早已設定好嚟食麵包，法式甜點及其他嘢有機會先再嚟試。由於有太多包款都好想試，當然無可
雖然Eric Kayser以麵包為主，但店內嘅產品都幾多元化，範圍廣泛，法式麵包當然喺手本嘢，仲有其他歐陸包、甜酥麵包、鹹甜小食、沙律、餐湯、招牌麵包三文治、法式甜點，飲品有咖啡、茶、果汁等等，而最吸引當然喺一列3層嘅麵包架，擺滿各式各樣嘅麵包，走一轉望一望，聞一聞，一室麵包香氣。
每朝除有早餐供應外（7:30am-11:00am），下午茶時段更提供果撻套餐及高茶套餐，至於週六、日，更有Brunch供應（10:30am-3:00pm）。
順帶都講一講環境，依間分店仍繼續走Bakery Cafe路線，地方唔算大，十零個座位，全部都喺高腳枱櫈。雖然唔多好坐，不過，食吓輕食、蛋糕、甜點，唔打算坐得耐嘅話，都無乜所謂。
今趟目標一早已設定好嚟食麵包，法式甜點及其他嘢有機會先再嚟試。由於有太多包款都好想試，當然無可能試晒嘅，就先揀嚟其中3款：牛角酥、無花果包、薑黄果仁包。
牛角酥 $16法式麵包嘅經典，點都唔少得牛角酥，外表烘焗得金黃酥香，不過，有少少失望，唔喺話佢差，其實個牛角酥已有一定水準，但喺，我哋同樣覺得入口未算好酥脆，牛油香亦唔夠強。
無花果包 $25個無花果包雖然睇落巖巖巉巉，但實在好有內涵，一咬外皮好脆，而包身煙韌有咬口，好濃嘅麥香，又多無花果乾喎，所以，食嘅時間都聞到無花果嘅香味。
薑黄果仁包 $25薑黄，就即喺黃薑，較為人熟悉就喺用嚟整咖喱嘅香料之一。切開個包，就見到裡面黃黃哋色，薑黄嘅味道慢慢走出嚟，由於唔會好濃烈，所以唔喺太古怪。聽同學仔講，薑黄都幾有益，有抗炎、抗氧化、護肝保腎等藥理作用。包內果仁十足，加埋外皮同樣煙韌，喺一個幾特別嘅包款。
鮮奶咖啡 $32我哋兩個都鍾意飲咖啡，所以，不約而同都喺點咗Café Latte鮮奶咖啡，咖啡嘅種類都喺好多，都喺幾款基本，不過，份量上無大細杯之分，卻冷熱同價。
鮮奶咖啡做得不俗，簡單嘅心形拉花，完全無搞過，但飲落去入口柔滑，咖啡味醇香平均，可感受到奶泡撞入濃縮咖啡時手勢好，否則，咖啡味會時重時輕。
Le “Beef & Cheese” $118除咗散裝麵包，店方亦有即叫即做嘅熱烘包款，最後揀咗「廚師推介」嘅Le “Beef & Cheese”，因為新鮮即做，所以製作需時，待我哋差唔多食完上面幾款麵包，個Le “Beef & Cheese”亦隨即送上。
收得成百蚊一個，賣相都唔會求求其其，以木板盛載，放有少少沙律菜、車厘茄、青瓜做裝飾，甚有田園氣色。可能個廚師見我哋兩個人共享，所以，預早切開兩半，方便影相又方便食。加入咗黑椒碎嘅意大利拖鞋包（Ciabatta）厚身而屬軟，多份黑椒香，多份惹味，而且個包又外脆內軟，淨食個包都覺得正；而中間嘅手打牛肉有兩大件，超過半吋厚，足秤之餘，煎得香嘖，咬落鬆化，又富牛肉味，絕對足料無欺場；而芝士3揀1（布利芝士Brie、山羊芝士 Goat Cheese、 愛達文芝士Emmental），我哋選上最後者愛達文，貪其芝味濃香；配合埋法式芥辣、蛋黃醬、生菜及蕃茄，味道層之豐富，真喺非一般牛肉漢堡可比。雖然賣到個百，但以用料及質素而言，我哋都覺得物有所值。
檸檬蛋糕 $22本來食完啲包都飽晒，不過，同學仔竟然意猶未盡，再買多個檸檬蛋糕試試，佢都鎅咗半件俾小弟試吓。個檸檬蛋糕嘅檸檬味幾清香，質感鬆軟，有啲佚似哋嘉頓啲雪芳蛋糕，不過，佢話實淨啲先似樣對辦喎。但喺，廿幾蚊一件，比起隻手掌大少少，小弟就有啲唔捨得買嚟食喇。
整體，除咗個牛角酥較為失色少少之外，其他都甚具水準，當然，就要多付點代價。雖然依度啲包唔平，但我哋坐咗個幾鐘，都見不斷有唔少客人幫襯，並以外國人居多，始終識欣賞歐陸包又肯比多少少嘅人，相信以中產人士佔多數。
張貼
