影片
港鐵長沙灣站 A2 出口, 步行約3分鐘
繼續閱讀
營業時間
星期一至日
07:00 - 23:00
以上資料只供參考, 請與餐廳確認詳情
【深水埗區】【天然居】我喺美國過年，返到嚟要飲吓茶先得，我同家慈今次就去咗長沙灣搵我識咗十四年嘅「亞媽」飲茶。佢哋係第一次見面，我都想畀家慈知道就算佢唔喺度，都有好多人好睇住我同埋照顧我，唔一定要結婚先 handle 到件事嘅。亞媽推介 $58 嘅「沙薑豬手」，食落係唔錯，沙薑得嚟豬手味夠香。之後到頂點嘅「必食蝦餃皇」，我又食唔出佢有幾必食，普普通通啦。反而小點嘅「潮州蒸粉果」有驚喜，首先夠熱，其次係食落皮薄餡靚，係幾足料架喎。然後到特點嘅「蟹籽燒賣皇」，都係比較正路嘅好食，冇乜話好特別嘅賣點。到大點嘅「蟲草花鮮竹卷」同特點嘅「鮮蝦腐皮卷」，兩者本身都係有啲似嘅，不過都係熱到辣口同埋都整得幾好食，前者仲有啲蟲草花點綴吓咁。跟住追加咗大點嘅「蜜汁叉燒腸」，比較一般，反而中點嘅「醬皇蒸鳳爪」夠濃味幾好食。最後整個甜品，係中點嘅「薑汁千層糕」，嘩，食落好夠薑味，好正，薑味濃得嚟又唔會話太辣，啱啱好，大家食到讚不絕口啊。我哋係星期五下晝去嘅，大中小點劃一 $20.8，特點 $33.8，頂點 $36.8，茶位就 $12 位。寫到嚟呢度我就盡架喇，因為去到爭畀錢嘅環節就冇我參戰嘅可能性，我都係斟多杯茶畀自己，潤潤喉、浪浪口，咁又完成一餐。。。（地址：長沙灣元州街296號西岸國際大廈3樓）#1amfoodie #foodie #hkfoodie #thatfoodiething #delicious #foodies #tasty #globaleats #tastyfood #foodpics #followforfollowback #love #eat #1am深水埗區 #長沙灣 #天然居 #天然居海鮮酒家 #samsplace #沙薑豬手 #必食蝦餃皇 #潮州蒸粉果 #蟹籽燒賣皇 #蟲草花鮮竹卷 #鮮蝦腐皮卷 #蜜汁叉燒腸 #醬皇蒸鳳爪 #薑汁千層糕 #1am0931 #1ambackup
繼續閱讀
呢區嘅酒樓都幾多，今次試下呢間天然居。佢位於相當荒蕪的西岸廣場的三樓。個人嚟講，雖然食物選擇唔算多，但我覺得比隔離嘅龍寶酒家好食。因為佢做出來嘅點心喺有啲獨特嘅味道，與眾不同而唔花巧。門口寫明大中小點一樣價錢（當日平日好似係$18.8），但係好多點心都屬於特點／頂點，另外小菜都有唔同價錢。環境亦都比較舊，缺乏裝修，呢一點淨係睇外牆個招牌甩皮甩骨已經知，而且佢仲用屏風間左一個D區（而係冇乜人坐），令其餘空間更顯侷促。值得欣賞之處係佢嘅點心食落去比較新鮮，例如個蟹籽燒賣皇肉質喺彈牙架，口感明顯喺有啲分別，居然係有層次感。喺哩個價錢，已經好少食多啲咁新鮮嘅點心。佢呢度嘅鮮竹卷有浸煮湯嘅，腐皮軟滑富豆香，冇雪藏味，內餡亦好balance。另外叫左個鬆化蛋散（當日特價＄13.8），點中糖漿之後亦都係非常香，食落帶點奶香味，酥脆可口。潮式鹹菜豬肚（＄38），都算份量十足，黑椒加鹹菜恰到好處，鹹淡適中，豬肚煙韌冇異味，最底有啲蘿蔔，索晒啲汁。成碗我哋喺飲到一滴不剩。蝦米腸係有煎香個表面，配有麻醬甜醬同豉油，個人黎講比較鍾意叉燒腸。酥炸綠茶餅外脆內軟，面頭有好香嘅芝麻，中間口感煙韌，趁熱食好好食。咸水角新鮮炸起，脆卜卜，空氣感十足而內餡足料多汁好味。反而XO醬炒陳村粉（＄42）唔係好夠味，比較一般。好在唔算好油。但係同點心質素比較，就乏善可陳啦。題外話，今次去嗌咗鐵觀音，初頭飲味道帶酸，飲飲下又正常返。用既茶葉唔算特別靚，但都襟飲、唔易變淡。服務方面，傳菜姐姐成日放低點心即掉頭走，完全唔講喺咩嚟，有一個係送錯左，搞到好似鬥快截人咁。總結三個人食左300蚊有找，計埋茶錢每人唔洗100蚊，而係食得非常之飽。雖然店鋪裝修比較殘舊，但點心質素有驚喜，雖然未去到精雕細琢，以同價位酒樓來講已經算超晒班。
繼續閱讀
二千蚊12個人捧著腹,又可大眾暢聚,環境又寬敞,食品質素又佳,夫復何求。最近一班很久沒有見面的明友因一次一齊活動的机会至晚上,決定來個聚餐,天然居這老字號一向都較有信心和有品質保証,而且仲有二仟蚊全包宴仲有啤酒汽水,選擇又多,包括白灼中蝦、燒味拼盤、北菰鵝掌、芝士蝦伊麵、碧綠炒龍躉片、火腩炆頭腩、清遠雞、瑤柱羹等等。樣樣都碟頭充足,味道中上,尤其灼蝦及龍躉球各人都大讚有海鮮檔的水準。這晚大家都盡興而歸。
繼續閱讀
男朋友爸爸鍾意食中菜，所以好多時都會試下唔同酒樓，喺op揾到元州街呢間樓上舖酒樓，抱住試下嘅心態去試下，食完覺得每道餸都份量足，味道亦都唔錯！餐牌有唔同人數嘅套餐，亦有晚飯優惠。前排睇中醫話我氣血虛，睇到『是日靚湯』有蟲草花烏雞湯😍一盅夠晒我哋七個人飲，營養豐富，夠晒滋補，好好飲！好多湯渣！湯濃料足。黑椒牛仔骨好惹味！！牛味濃郁，肉質勁腍好易咬👍🏻再用黑椒汁撈白飯 必叫～上湯海蝦伊麵 單睇擺盤就知廚師絕對唔係馬馬虎虎！最後叫 冬菇鮑螺片扒生菜，螺片腍身，芡汁無煮到稀身，簡單又大份嘅傳統菜式！糖水係紅豆沙，口感濃稠，甜度適中，而且勁多紅豆，好滿足！
繼續閱讀
疾情前我哋歡送同事調職，午餐就去咗飲茶。深水埗餐廳多，但酒樓就比較少🤔，反而近長沙灣天悦嗰邊有多幾間選擇。其中一位同事介紹我哋試喺大廈三樓嘅「天然居海鮮酒家」。估唔到酒樓係樓上舖，但都咁多人幫襯，目測全場滿座👏。可能上咗樓嘅關係，餐廳環境幾唔錯，光猛開揚，不過坐得少逼。整體感覺算乾淨衞生😊。呢餐我哋一行十人每人百一蚊左右就搞掂，而且係食到飽飽，仲有食物剩打包添，性價比OK👌。不過茶錢$12位，食水都幾深。 點心紙十分清晰，因為大中小點寫哂出嚟每款幾錢，唔駛再搵餐牌對數，但其實大中小點同價($18.8)...😅。午市仲有啲拼盤餐同孖寶餐，抵食啲。另外，亦有單點推介菜🥢。蜜餞雞中翼($48)，依個係同事嘅必食推介，又真係幾好食喎😋。雞翼煎得幾香口，蜜餞口味甜蜜蜜，但唔係蜜糖嗰種死甜。但一碟得六隻，我哋要叫兩碟先夠。另外點咗兩款小食：椒鹽脆豆腐($42)同椒鹽魷魚鬚($48)，兩樣都好酥脆，正啊。籠仔蒜香開邊蝦蒸飯($78)，呢個飯嘅造型不得了😍。首先，因為係以籠仔上，感覺即刻吸引啲。第二，雖然係蒸飯，但其實個飯有炒底的，所以飯粒乾身得嚟，又別有一番香氣。第三，開邊蝦唔大隻，但切開豎起幾好睇🦐。XO醬炒腸粉($32)，炒腸粉好入味，並用上芽菜一齊炒，但諗唔到辣味都幾勁🌶。孖寶：雪菜火鴨絲炆米 + 脆皮燒腩仔($128)，炆米都幾大碟，而且幾足料，有唔少鴨絲。🐷燒腩仔亦屬中上水平，皮夠脆，肉唔太肥。鮮蝦腐皮卷(特:$26.8)同脆皮素鵝($42)，兩款都係即煎即上，所以外皮脆卜卜。不過我都係略嫌偏貴，特別係素鵝，無肉喎🙊，建議叫前者！必食蝦餃皇(頂:$28.8)同蟹籽燒賣皇(特:$26.8)，兩款均係大路點心，價錢都幾貴下。每籠四粒，唔算大粒，味道普普通通😟。黑椒茄子牛仔骨煲($88)，呢個小菜幾惹味，🐮牛仔骨量頗多的，肉質唔韌。同事話茄子仲好食過牛肉添，不過我唔食茄子，所以唔知。金銀蛋浸莧菜($68)同菜膽扒鮑螺片($78)，我哋叫咗兩碟菜🥦，味道幾好，健康啲。莧菜幾嫩，無乜渣。另一碟就係用上唐生菜做菜底，有好多蠔油所以夠味，螺片以外仲有冬菇。總括嚟講，天然居酒家質素算唔錯，個人認為小食同小菜類較點心出色🤤。始終呢區無乜見得人嘅酒樓，所以我覺得想飲茶都可以嚟試下，特別係一班人(例如老闆請食飯)想食得好啲。
繼續閱讀