利寶閣 (已結業)

農曆年初二，無野做，幸好公司傳統可以俾同事選擇返工，然後補假。新年返工，其實都預左無野做，所以開完年拜完神，同事就一齊食晏。去左the One 的17樓的利寶閣，下午時間，人聲鼎沸。大家都黎飲個開年茶，所以只能安排到一張近𨋢門的7人枱。樓底高，格局都開揚。可以望到K11同少少海景。新年食物都係食差不多的點心，不過就改返個好意頭的名。好似發財豬手，步步糕升。可能飲茶人多，所以上菜都頗慢，要催左幾次先上枱。幸好食物質素幾好。豬手雞腳燜得好腍好入味，雞腳膠質都重。腸粉真材實料，件件都切得好均勻。滑嫩的腸粉入面有脆炸豬油網同大蝦，食落脆脆地，蝦又夠𡘙滑，好食。年糕煎得獨立分明，唔會痴住筷子，甜度剛好，我十分鍾意。新年黎講，呢度食物有質素，服務係大時大節都保持得好好，跟單速度都有效率。最重要係價錢唔係太貴，抵讚。