花朝軒 (已結業)

終於等到星期六，相約幾位好友去西貢呼呼一下新鮮空氣，順便湊湊週日市集的熱鬧。大家未食晏，所以諗住食得飽飽再行，想去飲茶，但大街入面的中式餐廳都迫滿人，所以揀左係大街轉角的花朝軒醫肚。與一般餐館無異，花朝軒不算大，但裝修都幾古色古香。擺左唔少中國風擺設，天花上啲燈都好有特色。 星期日都好熱鬧，我地被安排坐2樓，點左個$398，4位用的商務午餐，有3款冷盤3款小菜，自己再外加幾款點心。呢個餐其實好抵食！商務午餐仲每人奉送醉蟹腳！冷盤雲耳小青瓜、脆皮素鵝仲有蒜泥白肉粉皮都十分不錯，份量都幾多，個粉皮撈自家製甜酸醬好惹味。小菜我最鍾意個菠蘿咕嚕肉，因為炸得香口，夠甜又夠酸，送飯好正。松子魚都好食，不過我地影相耐左，令到個魚無新鮮出爐咁脆。葱爆羊肉一啲都唔羶，加左洋蔥炒，令醬汁多左一份甜味，好食。花雕醉蟹腳大大隻，都算肉厚，花雕酒香，加入左話梅調味。呢度啲點心即叫即蒸，真材實料，好食。我鍾意咸水角，外皮好香脆。黑松露燒賣亦有淡淡松露香。跟餐仲有中式靚湯同埋甜品送，每人百零蚊的價錢，食到咁多野，真係好抵食。去開西貢，不妨一試！