豚本家 (已結業)

【荃灣區】【豚本家】呢晚同道歉哥去荃灣食嘢，因為我留意到地鐵站對面個商場仔開咗間主打親民價嘅日式定食餐廳「豚本家」，梗係要去試吓。入去見到店內環境都幾寬敞舒適，充滿和風嘅裝修令我哋好似置身於日本咁呀，即刻叫嘢食先。呢度係用 QR Code 落單嘅，方便我呢啲不擅辭令嘅小毒毒。我叫咗個 $143 嘅「吉列豬柳定食」嚟試，當中有 $18 係將個飯轉做「蕎麥麵(冷)」嘅費用嚟。不過事實証明我冇做錯到，個蕎麥麵係幾好食，我叫嘅係凍食嘅嗰款。而主食嘅吉列豬柳好好食，個炸粉係日本食到嗰隻嚟，唔會話食到成口都係油，而豬柳本身都好正。個餐仲有茶碗蒸同麵豉湯，成件事好完整呀。而道歉哥就試 $126 嘅「鹽燒牛舌定食」，當中亦都有 $18 係轉「烏冬(熱)」嘅錢錢。佢個牛舌係自己燒，味道幾好，我都偷咗啲嚟食，哈哈。佢仲加 $18 飲「波子汽水」，我就冇飲嘢，反而加 $28 叫咗份「一口炸豆腐」，有七粒，都幾辣，中意辣嘅朋友會好中意。呢餐唔係我畀錢，好似加一之前係 $315 嘅。。。（地址：荃灣青山公路荃灣段210號富華中心商場2樓B號舖）