2派克雞排

營業中

休息中

【荃灣區】【2派克雞排】喺路德圍想買啲嘢上朋友屋企食，見到呢間炸雞店 keep 住有人排，就試吓佢。不過由於要同朋友分享，所以都唔係即時進食。然而，沿路拎住袋炸物去佢屋企嗰陣，已經聞到勁香，我相信附近啲人都一定聞到。一去到，就急不及待將佢哋「就地正法」喇。首先試 $40 嘅「脆皮無骨雞排」，係佢哋嘅招牌菜，我揀咗海苔同梅子兩隻味，前者香濃，後者解膩，同炸雞扒都幾夾，同埋啲雞本身都好香好滑，幾推薦嘅。再試 $12 嘅「金菇酥」，揀咗芥末同椒鹽味，鹹香味加上少少辣味，配以炸金針菇，幾特別嘅。之後試 $24 嘅「脆脆雞皮」，要咗芝士同香辣味，爆脆得嚟味道又好，送酒一流。而 $16 嘅「脆皮雞全翼」炸得幾透，肉質肥美。到 $24 嘅「脆皮百頁豆腐」，反而感覺清啲，口感似魚腐。最後試 $10 嘅「QQ Oreo」，炸 Oreo 幾得意，一啲都唔怪，幾好味。食咗咁多嘢，埋單 $126，可以嘅。尤其係當我哋平時食開嘅炸雞，來來去去都係嗰幾款，今次呢一間可以話係一個唔錯嘅選擇。佢哋堅持即叫即做，所以每一件都係「啱啱炸起」，同炸定先嘅係有分別。如果唔想等咁耐仲可以 WhatsApp 落單，節省時間喎。。