新仙清湯腩 (已結業)

啱啱學完車，一條冷又要自己食晏，因為一陣想去灣仔買少少野，路過集成行入去睇下有咩啱食先。 呢間新仙清湯腩係近灣仔道個邊的入口，門面四四正正一眼睇晒。入去睇餐牌，價錢唔算貴，而且仲連續四年當選米芝蓮指南的推介食府，唔野少喎，淨係牛腩都有幾個部位可以揀，店員細心為我介紹佢地的招牌菜，我揀左肥瘦適中的坑腩。 $46坑腩肥瘦適中，有牛肉的肉香，軟淋淋無渣，果然係推介食品。入面的蘿白清甜，吸收了腩汁的味道。 $28酥炸雲吞一客5件，入面有豬肉碎同蝦仁，餡料調味剛剛好，食得出係即叫即炸，外面好脆，熱辣辣唔油膩。 $28鯪魚肉釀青椒，食中其中兩隻辣到飛起，可能啲辣椒籽未去清，但辣野又啱晒我口味喎；鯪魚肉新鮮，上枱時仲係熱辣辣，點少少豉油已經好好味。 $16 蜂蜜姜汁薏米，入面有大量薏米，姜汁啱晒呢種又濕又凍的天氣下飲，再加埋少少蜂蜜中和了姜汁的微辣，夠晒清甜潤喉。食完晒已經係下午一點鐘，餐廳都已經坐滿晒人客了，而我都要快啲閃去買野了。