尚座 (已結業)

每個星期日，我都會同屋企人飲茶，見多次經過「尚座」都冇去食過，終於今日就去試吓啦。唔去猶自可，一去就……點心選擇唔多，以小菜為主。我哋結果叫咗一個四人片皮鴨餐。等食物嘅時候，見到有個女仕應，戴住一對藍色嘅膠手套喺大廳度刨皮切青瓜，呢啲切菜嘅工序唔係應該喺廚房入面做嘅咩？🤔唔緊要，當佢表演刀功。佢切切下，跌咗兩條青瓜絲落地下喎，佢即刻拾返起，抌咗喺垃圾桶，但係佢冇換過對手套就繼續喺度切青瓜😱係青瓜絲喎，佢執起嘅時候應該會觸碰到個地下，對手套好污糟㗎嘛，佢點解仲可以繼續處理食物架！之後，原來切片皮鴨又係佢負責！佢喺切青瓜嘅枱上面切片皮鴨，依然係嗰對膠手套。佢好純熟咁片好成隻鴨，亦切得好靚。我都戥呢位女仕應辛苦，因為佢又要切菜又切片皮鴨又要斟茶又要收碟，之不過佢都係一直帶住嗰對手套！！！講真，餐廳食物嘅味道係ok嘅，花膠雲吞雞嘅湯好鮮甜，塊花膠都算大塊。片皮鴨亦燒得好香脆，保留到肉汁。我哋全家人食完都無唔舒服，但係，餐廳真係要正視下員工對食物嘅處理手法！補充一下，餐廳地方唔大，眼見大堂有8張枱左右，不過成日見有仕應捧住食物出外面，可能樓上仲有一層。