鮨匠 (裝修中)

今日，一行三人入嚟食午餐，無人得閒招呼，咪自己搵個卡位坐低，有位扎馬尾阿姐，叫住唔比坐，話係6人枱，OK理解，咁咪轉枱囉，轉個頭，所謂嘅6人枱，分別都係坐4人及3人，唔知咩安排。咁坐低即刻落單叫咗一個鯖魚定食、一個三文魚定食，出去自助吧取沙津菜，誤以為隔離係水機，被馬尾阿姐離遠呼喝問我㩒乜嘢，唔知啫，唔駛咁惡劣態度呀？另一位飯腳未到，大概比我哋遲叫10分鐘，佢叫牛舌丼。鯖魚好快上枱，轉頭10分鐘左右牛舌丼都到咗，最早叫嘅三文魚未有，等咗有25分鐘，咪追三文魚進度，佢入去厨房話整緊，再5分鐘都未有，朋友鯖魚食完，牛舌丼食咗一半，隔離枱遲十幾分鐘嘅食物都已經上晒，我條三文魚應該係游咗出大海未捉到，咁我話如果無就取消單，因為要趕返工，再等幾分鐘先有餐到，上菜阿姐仲補一句話，三文魚要煎得耐啲，呢個解釋真係“耐人尋味”，平心而論，食物質素OK嘅，但樓面態度要再培訓囉。