café bar on 8

營業中

休息中

三年一度嘅一日重温急救課程嚟啦，St. John總部附近真係冇咩野食，好在今次有個同事話我知總部8樓其實有間餐廳，仲要係食buffet! 真係驚訝得嚟又驚喜，因為次次去都係上急救堂或暫考試，唔會諗到果座野仲有餐廳，咁就唔使走出外邊食，好方便。餐廳環境舒適，有落地玻璃窗，由於位處8樓，望出外面有種心曠神怡嘅感覺。Lunch係semi-buffet﹐每位入場98蚊，另外每人要叫1個main course ❨40-100蚊❩﹐其實價錢都ok。我地main course點咗口水雞pizza 2份❨@40蚊❩、千層麵1份❨60蚊❩。估唔到口水雞pizza呢個口味又幾得意，小小麻辣味，醒胃。個千層麵賣相唔錯，都好食。而buffet有沙律菜、冷、熱、甜品、生果都有，茶、咖啡任飲。海鮮有蝦、青口，冷盤有煙三文魚、幾款火腿、芝士，熱葷有中式咸/甜點心，糖水有紫米露，最讚係有豆腐花，仲有幾款蛋糕，生果都有好幾款。總括嚟講我欣賞main course多d﹐但係呢d高尚住宅區之內有呢個價錢嘅buffet都算係咁啦。