食遇上海料理

營業中

休息中

今日又同老友食晚餐，佢話想順便係新北江玩夾公仔所以就選扯新北江搵食，作為美食家既我當然就上網搵下有無d新野食啦，發現到呢間應該新開無耐既上海餐小店未試過，就一於黎試試啦。新北江小店都出晒名真係好小，所以堂食就一定唔會好坐，鋪仔細細擺到出門口都係幾張枱，所以好多人都選擇外賣，見到店家都係咁收外賣單。好啦坐底睇下餐牌，主打都係上海麵食，都有菜飯，配菜都大同小異，係睇下跟飯定跟咩麵，小店形式貴精不貴多。椒鹽排骨擔擔麵擔擔麵湯底好濃厚，好細微既辣味加少少花生香，個人認為再加d花生碎就完美，上海拉麵估計係手拉麵，麵質爽口彈牙唔易斷，椒鹽排骨新鮮炸外皮香脆內裡就略乾dd唔太過份，加上椒鹽就比較惹味d。上海排骨擔擔麵擔擔麵同樣出色唔多講啦，上海排骨就比起我果份椒鹽排骨略淡d，但就炸得無咁乾同樣都好香脆。上海小籠包新鮮蒸起上枱已出晒煙，湯汁豐富，係外皮厚左dd。黑豆漿跟餐加8蚊有枝裝豆漿，有黑有白，不過都係來貨野味道一般，順帶一題呢度飲品只有豆漿同汽水，無奶茶咖啡果d的。整體黎講呢度擔擔麵幾出色，食物質素算唔錯價錢都唔貴，我會再黎食，環境就一般般介意既多數選擇外賣。