Deli-O

營業中

休息中

信德中心電梯底嘅Deli-O，雖然屬於美心集團，但食物比起美心快餐高一班。價錢大約$50-$70，以呢度嘅環境同質素計，冇乜投訴。佢個菜單不時會轉，但主要圍繞意粉、焗飯、漢堡包同湯麵。選擇幾多元化，例如會有稻庭烏冬配豬扒，蛋包飯等日式食物；又有勒沙，咖喱配薄餅同ABC醬油炒飯等星馬菜。其中，我嘅至愛係魚柳包。一上檯，淨係果個open face嘅賣相已經先聲奪人。個包用牛油煎過，配上剛炸好嘅香脆厚身魚柳，一啖落去熱到辣口。雖然要M記嘅兩倍價錢，但佢帶俾你嘅滿足感絕對唔止double。薯條亦係粗切，比M記有咬口，略嫌只係配上茄汁，如果有他他醬就完美啦。