糖黐豆 (已結業)

4/3,同上次一樣,都係因為入嚟探靚女朋友嚟左呢度食,今次係第二次…頭盤要左蟹柳沙律,記得上次都有叫,佢整得好乾水,好爽口,而且蟹柳份量都唔少,足料…講返主菜啦,朋友要左個照燒雞扒拉麵,我就要左個黑椒牛扒拉麵,賣相同menu上面既都幾似,擺得好靚,而且都幾多,雞扒唔太乾,牛扒都有牛味,唔似出面有D餐廳,”那”到牛味唔見晒…輪到甜品喇…朋友話最鍾意佢個糖黐豆,貪佢多豆有咬口,所以今次都係食返佢,我上次都要左一個,又真係幾好食,唔會太甜,但都幾飽肚,如果係諗住以呢個甜品埋尾既話,記得之前唔好食咁多野;一場入到嚟,今次想試吓其它野,之前見有食家提過有個甜品叫雪糕黑白相思,係用涼粉同椰汁糕做主角既,兩樣我都鍾意,就要呢個啦…糖黐豆冇乜驚喜,因為上次已經見識過,朋友就話水準依然;涼粉唔會有咩特別,椰汁糕就唔太甜,好滑,加埋紅豆同雪糕,多重口感,感覺好幸福,但原來都唔可以睇少佢,事關都幾大份,食到中斷已經覺得飽,但本人係一個唔愛浪費既人,所以最後都將佢食清…呢度D食物賣相真係唔差架,師傅好有心機整,值得一試, hm…下次可以食埋其它款式喎…