程班長台灣牛肉麵 (已結業)

响公司OT完，正想著是否又去蛇王二，見程班長唔駛等位，就俾次機會佢吧。一進門，待應的招呼好一般，店內九成滿，安排坐門口第一個位，張櫈唔係幾好坐，可能梳化果邊會好啲，可惜俾個自由行女仕嘅戰利品霸咗。Scan下個餐牌有咩吸引，發現除咗台式食品，仲夾雜咗好多其他選擇，結果點咗個似係招牌菜嘅「紅燒三寶麵」，意猶未盡，見有鹵水大腸，姑且一試啦。先上嘅係大腸，肥嘟嘟脹卜卜，未食都知好味，一試果然唔錯，最正係腸中有肥膏，好好味！有一點不滿係已落辣油，唔食辣嘅朋友要留意。仲有如果份量多50%就perfect啦。跟著上麵，都幾大碗，細食嘅未必食得晒，三寶有牛肉、牛肚、牛筋，仲有半隻鹵蛋，牛肉好好，唔太韌又唔太腍，牛筋就唔得啦，腍到好似啫喱咁，個人喜歡有少少𡁻頭嘅，牛肚就一般，見店內海報講到湯底好似天下無敵咁，就喝了幾口，好清甜，感覺真係無味精，正！總括來講，都係值得推介嘅食店。