秀韓國餐館 (已結業)

去開尖咀行街，唔知食咩好，最後走入韓國街試下一直都想試嘅秀！估唔到平日七點幾嚟都要排，前面都有成十個人。好彩係二人位，等左十五分鐘就入得，眼見前面等四人枱要等好耐，因為入面得廿個位到，所以大枱就要耐心等喇。等位時，聽到啱啱有人食完走果時話“咁嘅服務真係唔會再嚟”，當堂嚇一嚇。入面都真係幾逼。落完單，就送上前菜，都係正路野,泡菜薯仔芽菜果d, 個泡菜都幾辣下。一場嚟到梗係叫有名嘅炆牛肋骨啦，索價$198(2pcs)，真係有d 貴。但試完真係物有所值，兩大舊牛肋骨。d 肉炆到好軟好入味，個汁好鲜甜，冬菇蘿蔔索哂d 汁，值得encore!另外再叫左個炒蘑菇豬肉粉絲伧($82)，一如各位所講，真係又大份又足料，食到尾都仲有好多肉，個粉絲煮得好入味！d侍應係無咩笑容，但叫佢加水都加得快嘅。用餐限個半鐘，就算未食完佢都會俾張單你埋。的確係趕客，但無計，外面都好多人等緊。見好多枱都叫部隊鍋，但聽到旁邊個枱話唔好食，仲要食剩幾多下。總括嚟講，哩到食物係不錯，但環境同服服務就麻麻lu。