莆田 (荃灣廣場)

營業中

休息中

上次去食莆田嘅時候餐廳做緊海蠣推廣優惠，今次知道餐廳推出鰻魚菜品，即刻同屋企人嚟試吓。本身對莆田印象都唔錯，價錢好親民，環境同傳統中菜館唔同，企理有裝修。店內嘅部長同侍應姐姐雖然大多係中年，但係講嘢絕對唔粗聲粗氣，斯文有禮！去到一坐低侍應就沖咗壺菊花杞子茶嚟，幾清香，我飲咗好多杯。仲有一碟份量唔少嘅酸菜作為餐前小食。✔️普寧豆醬焗鰻魚$188日式鰻魚成日食到，中式煮法鰻魚比較少食。喺Menu見到呢個菜式係主廚推介，同埋用蒜蓉豆醬焗香，幾吸引所以點咗。餐廳採用重量級活鰻魚，食得出鰻魚係新鮮嘅，肉質幾彈牙爽口，鰻魚切塊焗，幾入味。✔️石鍋滑豆腐$98隔籬枱點咗呢個豆腐鍋，一上枱遠少少都聞到勁香，於是跟住點。外層炸過嘅滑豆腐熱辣辣，非常有口感！個醬汁好好味，好濃郁，用來撈飯食應該好正！✔️福建特色海蠣煎$128呢個特色福建菜每一枱都必點，底層蛋餅底好薄，面層勁多海蠣，食落好有飽肚感。侍應提醒要配埋提供嘅辣椒醬一齊食，自己好鍾意食辣嘢，加咗辣椒醬係好味啲！✔️福建海鮮滷麵$118 個湯底加入咗蝦仁、蟶乾、花蛤、海蠣等去熬製，清清哋得嚟又有一齊熬製食材嘅味道。麵條軟硬度適中，幾啱食。