大吉居酒屋 (已結業)

是日與幾位朋友午膳，一點入座，大約1：05分我們四人就落單。接著，就是等呀等，等到花兒快謝了。13：25剛才幫我地落單既侍應姐姐話廚房電腦壞左，廚房唔知我地點左咩，問返我哋點左咩餐。我哋就逐一再點過。跟住我多口問清楚：咁電腦整返好未？姐姐話：未呀，不過頭先真係落咗單架啦，係廚房電腦壞左睇唔到落左咩。我：咁點解要依家再問我地？唔係出面部電腦有紀錄架咩？姐姐：廚房部電腦壞......我地幾個諗深一層，都覺得係姐姐唔記得落單，但又老作話咩廚房電腦壞咗既無稽之談。最後埋單時，單咪一樣print到我哋點左既餐。究竟佢係咪呃我......點左朝鮮角切刺身飯。據了解，朝鮮即係代表撈左少少辣汁咁解。蒸蛋一般，辣汁份量頗多，粒粒魚生都沾上。係就係無咁膩，又幾惹味，但就唔係好顯出魚生既鮮味。可能頭先疑似俾人呃完，硬係覺得佢係因為啲魚生唔夠新鮮，先要落辣汁......埋單盛惠$220，拜拜了！