安東尼小廚 (已結業)

星期六上網見到安東尼有咁多好評之下，決定同外母大人及老婆一齊試吓新嘢。去到真係比佢車仔麵既外形動搖咗少少信心，不過諗到啲食評就覺得定啲。我哋一坐落就點咗三客蘑菇湯，再ORDER個羊鞍，然後加個芝士龍虾。但點知突然聞到隔離枱傳過來陳陳久違了既味道，原來係客家炆豬肉。於是我心血來潮，唔理自己之前點落既西餐同個碟頭飯夾唔夾，一於嚟個客家滷肉飯。蘑菇湯、羊鞍、芝士龍虾當然好食，但個飯真係唔講得少，食到好耐以前婆婆煮既味道，好懷舊，好有客家風味。而且啲鹹菜同木耳仲好鬼正，入哂味，真係餸飯一流。後嚟我同老板娘傾傾吓先知佢係客家人，所以想煮啲家鄉菜比大家試吓。今次我覺得安東尼真係一個令人驚喜既地方，令人食得有家既感覺。