黑木亭居酒屋 (金馬倫道)

黑木亭居酒屋最近喺尖沙咀開咗新分店，最適合我呢啲九龍人。餐廳內裝潢充滿日式風味，聽講遲啲仲會加入新幹線送餐，睇嚟佢想走埋親子餐廳嘅路線。餐具採用一系列嘅櫻花設計，女士們就最欣賞。三點刺身盛分別有三文魚、劍魚腩同油甘魚，刺身嘅質素非常高質，而且厚切魚生令口感更豐富更滋味。鮮蝦青蘋果沙律入面除咗有鮮蝦、蘋果、沙律菜之外，仲特別加入咗牛油果，而且仲有大量蟹籽，味道非常清新。卷物我哋就揀咗鵝肝青瓜帶子海膽卷，呢個配搭比較新穎，其他餐廳都比較少有，而且仲有我最鍾意嘅帶子同海膽做食材，同時間有兩種享受！磯煮鮑魚醬汁已經滲透入鮑魚內，切成薄片，賣相精緻。吉列海鮮炸串分別有魚柳、生蠔、帶子、蝦、魷魚，食材用料上乘，而且炸得好乾身，食起上嚟唔覺油膩，如果鍾意食炸物嘅朋友應該可以自己食哂一整份！燒物方面，我哋分別揀咗汁燒牛肋串($42)、麻辣黑豚荔枝卷($38)同法式羊仔架($52)，調味選擇其實可以自己自由配搭，我尤其鍾意黑豚荔枝卷，既清新又清甜。