魚川居 (金漢工業大廈)

營業中

休息中

天橋底成日有人派傳單，是日收到係酸菜魚店叫魚川居，都好喎好耐無食，就今日lunch time食佢先。跟住地址搵，原來係之前D&A二樓個舖，幾好呀，呢個舖位好大勁多位，不過lunch time呢啲繁忙時段都係爆場要等位嘅。午餐都幾多選擇，有辣有唔辣，是日同個嚐辣嘅同事黎試，梗係要點個辣餐啦。哈哈，落完單伙計話冰用晒，得返熱飲，自己就轉左要罐忌廉，同事就轉左要茶走，甜甜地正好解辣嘛。先嚟嘅係同事點嘅麻辣水煮肥牛淮山麵，辣度要左正常，賣相唔錯呀，紅紅綠綠咁好吸引。先試下個湯頭，麻香帶辣勁，但唔係死辣，辣得黎入口順喉，食下食下同事飲哂成碗湯咁濟。肥牛係正正常常嘅打邊爐肥牛，份量合理。淮山麵爽口有嚼勁，連湯食好正，整體黎講係一碗高質嘅麻辣湯麵，愛辣之人值得一試。自己就點左酸菜魚紅薯粉，辣度要小辣，賣相好正喎，勁多魚片，芹菜同酸菜，聞下啲酸味都飄埋嚟，流晒口水添。湯底夠酸，但小辣略微辣度不足，下次可以試正常先。雖然唔係點桂花魚，但魚片都超滑，無骨就係正啦。至於紅薯粉，呢度用上粗身薯粉，吸湯一流。酸菜同水煮都好食，唔知其他系列又點呢，下次黎試下先。