七月餐室 (已結業)

之前係九龍灣返工見到又有間新開嘅餐廳 — 七月餐室，聽講呢度有爆漿阿華田西多士，當然要試下！餐廳裝修以綠色同木色系為主，好乾淨企理同光猛，整體感覺好舒服。馬卡里牛肉飯（$70）七月其中一個招牌係馬來咖哩，呢度嘅咖哩款式好多，有馬來式、瑪莎拉、馬卡里，今次食左馬卡里，姐係印度式奶油咖哩牛肉，落左香料蕃茄，好濃嘅香料味，送飯一流！牛肉用左牛腩，份量都好多！日式讚岐冷烏冬配雞扒（$58）有沙律、兩塊日式甜雞扒配紫菜烏冬，另外有一碗鰹魚汁，口味清爽，好岩夏天食。七月漏奶華（$38）另一個招牌就係邪惡爆漿阿華田西多，超厚花生醬西多士面頭鋪滿阿華田粉，一切開就會爆奶，口味唔會太甜，一個人食曬都唔太膩！飲品就叫左啡豆同茶豆，紅豆幾綿密，配上香濃奶茶同咖啡，非常特別！好難得係茶餐廳有甘印度口味嘅咖哩，下次要再黎試Masala！而家新張期內，外賣仲要有8折至98折，好值得試！