波記(大排檔) (已結業)

呢度其實我舊年曾經帶公司同事嚟過，但嚟到之後，同事一見啲坐位咁近個爐頭，怕咗啲油煙，立即打退堂鼓，所以就此作罷。今日突然好想食乾炒牛河，其然就想起波記。聽聞波記嘅師傅炒功一流，而乾炒牛河係非常講究「鑊氣」，需要猛火快炒，要炒勻之餘，手勢又唔可以太快，否則河粉會碎掉。油嘅分量亦要準確控制，如果唔係就會食到一口油，所以乾炒牛河被認為係考驗廣東廚師炒菜技術嘅一大測試。我都知食呢啲鑊氣嘢，堂食一定好過外賣，但為免食到成身油煙味，唯有將就吓算啦。返到公司，盒炒河雖然未至於仍冒煙，但温度適中，河粉每一條都上色均勻，牛肉亦唔韌，两者炒得好夠火侯，我不得承認，河粉嘅味道其實比牛肉出色，夾埋啲銀芽葱絲一齊食，很是美味。隨盒更附送原椒醬兩包。食完個盒底也沒有留下很多油，可見師傅控制油份，恰到好處。