桔梗 (已結業)

今日天氣好熱，行完朗豪坊冇地方好去，經過砵蘭街見到一間叫做桔梗嘅西餐廳，之前行過好多次都冇入去試，今日決定喺呢度食晚餐。一入到去地方好寬敞，滿滿嘅木系裝修，比人感覺好舒服，最緊要座位好大唔需要同隔籬左右逼住咁坐。咁熱坐低梗係要叫杯啤酒飲吓，happy hr 大大杯都係$40. order 左個二人餐。前菜兩款 主菜兩款 甜品一款。首先上嘅係慢煮雞肉沙律，慢煮雞肉好嫩滑沙律醬超級好味。水牛城雞翼香香辣辣非常惹味。黑松露野菌帶子意大利飯好香，啲飯唔會好硬好啱香港人口味。上面仲有隻溫泉蛋用嚟撈飯一流。紅咖喱牛柳意大利飯好特別，帶少少fusion嘅感覺。呢碟一樣有一隻溫泉蛋，非常加分。食完前面四樣嘢已經好飽，不過甜品係另一個胃，最後梗係要來返個朱古力心太軟，配上提子冧酒雪糕又凍又熱冰火交融，簡直一絕。第一次嚟桔梗食嘢俾我感覺好好，店員感覺親切有禮，食物賣相質素中上，絕對可以值得一試再試。