八焼鳥屋 (已結業)

近來個個都話食日式串燒, 我都忍唔住一於OPENRICE 睇吓, 見到呢度有生蠔又有串燒就同朋友去試一試。點都要試吓生蠔, 佢有好幾款蠔同幾款食法介紹, 我就要咗赤崎shooter、生食唐桑。上枱個造型真係不得了, 赤崎蠔身較爽海水味濃, 身形仲比想像中大隻肥美, 蕃茄加辣汁同生蠔跟本就係天生一對, 辣汁中和咗蠔既海水味, 令蠔既味道可以慢慢提升, 細嚼後蠔既回甘不斷係口腔內俳迴, 推介之作。另一款就係唐桑, 相對身型就比赤崎細同扁, 簡簡單單落少少檸汁就可以帶出蠔既鮮味, 質地同樣相當爽。串燒中我最欣賞明太子卷串同汁燒免治雞肉捧。明太子以為會係燒得乾乾既一款, 原來佢哋會用肉包住明太子燒, 咬落去你會有兩種口感, 而明太子一啲都唔乾仲非常juicy, 你會食到明太子一粒一粒咁爆開。免治雞肉捧, 係佢哋架招牌串燒, 一啲都唔起眼既免治雞並唔可以睇少, 雞肉中混咗細細粒雞軟骨, 令到你唔只有單一雞肉口感, 仲有軟骨既咬口同少少油香, 喜出望外。 同場見到好多都係日本人用餐, 氣氛都好好, 真係幾適合聚會既地。