泰地道 (已結業)

師傅自從試過呢間食店泰國菜後, 就念念不忘, 終於早幾星期前就再黎呢間食店, 希望能夠好好嘆番餐, 可惜事與願違!兩個人冇訂位入到去, 由於唔多人, 所以即刻有位! 一坐底即刻睇下有咩好食, 最後商量一陣決定要炒金邊粉, 泰式豬頸肉同咖哩牛筋腩!金邊粉同印象中嘅賣相好似唔同左, 一望埋去師傅覺得有少少倒胃, 不過試下個味道並唔係太差, 金邊粉依然係煙煙韌韌, 炒得唔油, 師傅覺得勉強合格啦; 泰式豬頸肉燒得好香而且切得好薄, 不過豬頸肉就油左d, 燒得未夠乾身, 而肉身望冇咁靚, 比上次黎食真係差左唔少, 幾失望; 咖哩牛筋腩嘅咖哩就非常香, 加上帶少少辣, 絕對唔錯, 而牛筋腩就夠鬆夠入味, 真係唔錯; 師傅都忍唔住叫多碗白飯呀!總括而言食物質素相退步左, 服務態度唔錯, 環境舒服, 埋單兩舊水到, 價錢都算抵食; 師傅覺得質素真係今非昔比, 可能師傅要求高左, 又可能真係成本上漲, 令到質料又差少少, 間接令師傅有少少失望, 笑臉真係比唔到喇, 仲會唔會再黎呢? 真係未知數!