八月花 (又一城)

營業中

休息中

今日出左去又一城行街shopping，然後就嚟左八月花食晚餐，佢推出左一個$298蚊既1人套餐，有鮑魚有海參又有蝦，咁就補補佢啦。咁一坐埋位，當然都係有個小食，$16個都算係咁，都幾開胃既。到正式開始，先嚟左頭盤《冷鮑魚海蜇海螺》，海蜇比較淡無乜味，海螺片就有種似超級市場急凍御x皇既貨色味道一樣，就連鮑魚都好似罐頭開出嚟咁，實說真係有啲失望。然後，嚟左個《土雞蜜瓜日月魚》，燉湯都算足料既，既有蜜瓜清甜既味道，日月魚既鮮味亦同樣出色。《上湯焗大花蝦》，每位有2隻，賣相相當唔錯，花蝦亦都算大隻，不過咬口就唔係太彈牙，但都唔會話霉既，鮮味亦都有，算合格咁啦。《珍珠海參鹿茸》，海參爽口彈牙，吸收左湯汁既味道，入味之餘亦唔會太唸，算係比較好的一道菜。套餐上只係得返《珍珠雞》同《蜜餞脆麻花》，同飽都仲有少少距離，所以我地額外加左個《蟹籽蟹肉燴伊麵》，上枱既時候熱辣辣，賣相同味道都相當不俗，不過伊麵就唸左少少，如果煮短時間少少就更好喇。《珍珠雞》同《蜜餞脆麻花》應該算係同以上菜色最唔match既餸。珍珠雞本身又唔係特別出色，而脆麻花甚至可以講係難食，既不鬆脆，蜜糖又有一陣怪味，真係扣哂分。