阿爺八鮮鍋

營業中

休息中

任食火鍋食得多，但連海鮮都有得任食就比較少見，下午5點入座，任食2.5個鐘連加一都只係每位大約$400，所以呢間火鍋好抵食！呢度嘅火鍋套餐好豐富，開頭有個五指毛桃豬骨燉湯，好香好清甜，飲得出係好足料嘅老火湯，份量應該係兩碗有多。之後就係一個特色雞煲，我揀咗四川麻辣雞煲，雞肉充滿醬汁，夠淋夠入味，唔算好辣。跟住係一個刺身拼盤，擺盤好精緻，刺身款式多，有毛蟹、甜蝦、八爪魚、希靈魚、蟹子沙律、帶子裙邊，全部都好新鮮，而平時我唔食嘅希靈魚，呢度都好鮮甜，冇怪味，幾唔錯。終於到打邊爐，本身以為湯底係就咁加湯落個雞煲度，點知原來呢度嘅火鍋湯底係另外再上，所以我揀咗椰子雞湯底，清清地可以食到海鮮嘅鮮甜味。一開始有個霸王海鮮盤，有齊大部份海鮮：越南大虎蝦、澳洲大龍蝦、蘇格蘭聖子、蘇格蘭大元貝、台山奄仔蟹、新鮮鮑魚。之後我同朋友再點少少安格斯牛肉、黑豚肉、墨魚滑、菜同丸類，基本上已經超級飽，冇quota再叫海鮮，而呢度出前一丁亦有好多味揀，好誇張！我同朋友仲每人加$20蚊，可以任飲啤酒同飲品。鍾意食海鮮火鍋嘅話可以考慮呢間，一定比逐碟叫嘅火鍋抵食好多！