蚊蚊豬老火鍋 (已結業)

今日去左深水埗行玩具街，順便想醫肚，咁岩見到深水埗新店既蚊蚊豬，即刻決定試下。深水埗既新店原來同太子好唔同，做緊優惠，每一枱都會送番個海鮮拼盤同埋牛肉選擇多左，有牛板腱同封門柳等既精選牛肉俾你揀，咪話唔抵食呀！不但止，依家期間限定，仲會送每枱一鍋羊腩煲，保身又養生。我地食左佢個海鮮拼盤，真係好足料，有好多隻海蝦，又大隻又新鮮。仲有鮑魚同青口，淡淡既鹽水味，就算無調味料都已經好好味，抵讚。仲有脆肉鯇，唔會有泥味，十分彈牙。我地仲叫左鴨血，味道好香，同豬紅比更好食，加少少辣椒油，就好似食緊麻辣鴨血咁，爽呀。我地仲食左雞雜，真係咩內贜都有，雞腎十分爽口，雞肝粉粉，十分香口。呢度環境好乾淨，而且好寬敞，令人坐得好舒服，不知不覺就坐左2個鐘啦！