楚撚記大排檔

營業中

休息中

想試好耐嘅楚燃記終於同屋企人試左。雖然訂左位但係去到都要等一陣，裝修都幾有特色，但係位置唔係好闊落唔好諗住會坐得好舒服😂。店員一開頭仲俾左一張好奇怪嘅枱我哋，唔係兩個兩個打對面，竟然係4個人好似排排坐咁，咁點樣傾計呢？後尾我哋堅持要坐反正常位，店員先安排反俾我地。講反野食，芝士琵琶豆腐幾特別，個芝士醬係分開上，咁就可以自己鐘意點幾多就幾多，又唔會整淋個琵琶豆腐。燕麥金沙蝦球無想像中咁好食，燕麥有好多蝦球得好少，同埋個啲燕麥唔係好痴到個蝦。楚燃記小炒王，都幾足料不過偏鹹，餸飯就好食啦！講開飯我哋都有叫楚燃豬油撈飯，用個缽裝住啲飯幾有懷舊啲感覺，除咗豬油仲有一兜芫茜蔥同埋豉油，咁就更加香。楚燃記秘製鳳爪，辣辣地整得幾入味，都夠淋。楚燃記脆皮燒BB鴿，燒得乾左啲無乜肉汁，有啲失望。野飲叫左一壺杞子龍眼菊花蜜，真係落足料喎！飲落好有蜜糖味，我哋就覺得甜得濟，所以每次都加啲枱面上面有嘅茶，咁就啱啱好，仲好襟飲飲極都有🤣最後每人送一碗糖水，有清補涼同蕃薯糖水，都算係咁，不過呢度嘅野食份量係偏細，所以可以叫多幾款。