Dodam Chicken (1亞太中心) (已結業)

今日約咗朋友喺APM交收，跟住想喺附近食午餐，商場嘅餐廳，又多人，又成日食，真係想試吓新嘢。行前少少，去1亞太中心，嗰座大廈都有好多餐廳。小朋友一望廣告牌，就想去食炸雞，咁我哋就去試吓。餐廳都幾寬敞，有大窗可以望風景，光線好充足，可惜我哋唔係坐窗口位。睇menu……..好多都好正喎……不過好多都辣，我小朋友唔食辣喎…….揭多幾頁，好彩都有好多唔辣嘅選擇。我哋叫咗黑松露卡邦尼意大利粉，瑪格麗特薄餅，香脆雞。脆香雞一黎到唔見咗幾嚿，小朋友急不及待叉咗嚟食，我想影張相留念都唔得😥。意粉好重黑松露味，好香。食食吓仲俾小朋友搵到芝士竹輪卷，佢好開心，因為平時西餐冇佢鍾意食嘅竹輪卷，佢即刻搵晒嚟食😅。薄餅邊勁脆，除咗平時嘅蕃茄醬同芝士，仲有一種啡色醬汁，甜甜地，成個Pizza走一圈，所以每一塊都有少量，幾得意。因為餐廳播住韓國流行曲，仲有個大電視。小朋友可以聽住歌食飯，心情特別興奮，一邊食，一邊跟着拍子點點頭。因為你開心，我也很快樂😀。之後我哋仲傾咗一陣計，小朋友仲爆咗同學秘密俾我知，我哋突然friend咗好多🤣🤣🤣。總括，各樣嘢也十分滿意，會再嚟，希望小朋友下次再爆秘密俾我聽😅。