孖啡 (已結業)

岩放工想搵個地方鬆一鬆，去樓上CAFE食個晚餐其實都幾舒服。去過好幾間樓上CAFE，每間都各有特色。我都幾鍾意呢間CAFE D剪影，配合窗外環境，好似有個小故事要講咁。牆身貼左好多好靚嘅牆紙，營造樓上cafe嘅風格。凱撒沙律好新鮮，蔬菜好翠綠，食落好爽口，麵包粒夠晒乾脆。忌廉煙三文魚配天使麵，三文魚又大塊又有些少厚度，幼身嘅天使麵，唔會整得過淋。特式拼盤包括雞翼，薯角，春卷，咖哩角，魚手指，蟹子魚蛋雞翼外皮有些少爽脆，肉質嫩滑，蟹子魚蛋外層煙韌，內裏有好多蟹子，春卷及咖哩角皮脆，每一樣都整得唔錯。日式炒雜菜面頭蓋左好多木魚碎，見到佢地郁下郁下都幾有趣。紅莓果茶味道獨特，放小蠟燭係底下，紅莓香味越煲越香濃。心太軟外層鬆軟，包著流心嘅朱古力，連埋冰凍雪糕一齊食嘅口感好好。